Жулва ппухъруннал, тухумиртталли миллат ябувсса. Цинявппагу дяъвирдай виричушивуртту ккаккан дурсса, элму-техника хьхьичIуннай давривугу, иш-бажаранчишиву давривугу хIарачат буллай бивкIминнал цIарду уттарассар. Ми жунна дакIнийссаксса, миллатрал гьану яхъанахъиссар. Миннаясса бусалартту хъанахъиссар жулла культуралул агьамсса бутIану, тарихрал ва историялул исхIанну. ДакIний бикIан багьайсса, лайкьсса ппухъру бусса тухум хъанай бур Гъумучиял Аллабуттахъулгу.
ХIукуматрал миллатирттахсса бургаву даххана хъанай, чIун наниссаксса, хьхьичIавасса ппухъруннал цIарду хъамаритлан дикIай. Цаппара буттахъал цIарду журналистурал ва чичултрал хIарачатрайну цIунил ялун личлай, утта дуклай дачай. Мукун, Аллабуттахъал ппухъругу хIалану, 2006 шинал Щурпаева Миясатлул «Гъумучиял ппухъру» тIисса макьала дия «Илчи» кказитрай. Мунийра дия миннал суратругу, цирдагу та чIумалсса кказитрай щала ххуйну къачIалачIисса. Аллабуттахъал ва ЧIютIухъал ппухъруннаятусса бусала кIул хьуну бия Пир-Сулайманхъал ХIасаннул кулпат Оьмарова Жариятлуя. Жариятгу дунияллия лавгун шинну хьунни, амма ганил бувсмур чивчуну яхьунни.
Тти махъ, «Гъумучи ва Гъумучиял тухумру» тIисса лу МахIаммад-ХIажи Къаплановлул итабавкьукун, ттун ччан бивкIуна Аллабуттахъая бюхъайссаксса гьартану чичин, вайнная чивчумургу лув лавсун, бавккумургу тIайла бувну, ттунма кIулмургу ххи бувну. Жарият дунияллия лавгун бухьурчагу, ганил душнил Къаяхъал Уммукусуннул ттухьхьун дуллуна цинярдагу Аллабуттахъайн дагьайсса суратру. На гайгу, ттучIарамигу цIунил компьютерданийгу дакьин дурну, шикку ришлай ура.
Шиккува учин ччай бур хъунмасса барчаллагь Щурпахъал Миясатлухь, ванил хъинну чIярусса давуртту дунни ларг чIумул сиппатру аьч дан, луттирдайхну бикIу, укунмасса статьярдайхну бикIу. ХьхьичIва чивчусса ца статьялулгума кьадру хIакьинугу, чIун наниссакссагу хъунма хъанай най бур. Хъунмасса кьимат бивщунни буккултрал МахIаммад-ХIажи Къаплановлул чивчусса луттирангу. Ванил кьиматгу шинну наниссаксса хъиннува хъун хъанай бачинссар. Бюхъай ца 10-15 шинава ва лу цIубуллай уккан МахIаммад-ХIажи. Навагу умудрай ура, ва на чивчумургу мунангу, лак ххираминнангу шинну наниссаксса хъинну лякъинссар тIий.
Гихунмай, бигьашиврун, Миясатлул чивчумунийн Оьмарова Жариятлул бувсмур куну учинну, МахIаммад-ХIажинал чивчумунийн гъан-маччанал бувсмур учинну.
ХьхьичIазаманнай кулпатру хъунисса бивкIссар. Аллабуттахъал тухунгу байбивхьусса, хъуннасса нясав жучIанна къадирну дур, так кIулну бур Аллабуттая дайдирхьушиву Буттаев тIисса фамилия. Алла-Бутта тIисса цIа цукун хьуссарив кIулну бакъар. Амма вайннал хъаннил ирсирайсса ххуттай Аьли-Бутта тIисса цIа тикрал хьуну дур. Бюхъай му цIагу Аьли-Бутта тIисса цIания хьуну дикIангу.
КIулну бур Алла-Буттал арсная Кьаланнуя (1850-1930) бивзшиву вайннал тухум.
Аллабуттахъал Сиражуттиннул кулпатраву яхьуну дур кIия жагьил, ярагъуннилгу балгусса, щябивкIун рирщусса хьхьичIазаманнул сурат. Мунил бакIрачIангу биялсса бивну бивкIун, ттуща ттигу му ккаккан дан бюхъайсса даражалийн дуцин къархьунни ва цума цумаривгу бувчIин къавхьунни, бусанмагу акъар.
Ца чулухагу ттунма баявугу дия Буттаев Сиражуттиннуя цала тухумрал инсан Японнащалсса Оьрусатнал дяъвилуву гьуртту хьуссар тIаву. Ттун бакIрайн дагьунни «Бутаев Ахмад Бутаевич» тIисса цIа Хаджи Мурад Доногол чивчусса «Дагестанцы на русско-японской войне» тIисса луттирай (366 чI.).
АхIмад Буттаев
АхIмад увну ур 15-мур январьданий 1882 шинал. Ванал биографиялуву чичлай бур «из потомственных дворян» тIий, мунил буслай бур жулва уздантал ккалли байсса бивкIшиву дворянтал кунма. Щурагь реальное училищагу бувккуну, увххун ивкIун ур Елисаветградрайсса бурттигьалтрал училищалувун 1 разрядрал. Армиялуву къуллугъ буллай айивхьуну ур 1901-ку шинал. Гьуртту хьуну Японнащалсса дяъвилуву 1904-1905 шиннардий, кIийлла щавугу дирну дур. Ва дяъвилуву ванан дуллуну диркIун дур орденну «Св. Анны» чичрулущал «За храбрость» кIира, «Св. Станислава 3 и 2 ст. с мечами» кIира.
АхIмад гьуртту хьуну ур Цалчинсса Дунияллул дявилувугу 1-мур Дагъусттаннал бурттигьалтрал полкираву ротмистрну, поручикну, цуппагу бивкIун бур 3-мур Ккавкказуллал къазахънал дивизиялуву. Ванал ялагу орденну ва цайми наградарттугу ларсун дур. Польшанаву, Рокитино тIисса шяравалличIа 6-мур августрай 1915 шинал дирсса щавулул къуртал увну ур. Увччуну ур Гъумук. Ванал бивкIун бур кулпат Ттуплислиятусса, 6 шинавусса арсгу. Вайннаяту ххишаласса бусавугу дакъар.
АхIмад Аллабуттахъал тухундалул ци къяртта хъанай дурив ххал дан, цаймигу вайннал ппухъруннал шиннах бурганну цахъи махъ.
ЦIанасса Аллабуттахъал тухундалул къяртлул дайдихьу дарчуну дур Кьаланнуя. Кьалан ивкIссар тIар та заманнай хъинну машгьурсса, сий дусса савдажар ва канил гьунар бусса арцу-мусил усттар, кьалан битаврил чулухунай цIа дурксса. Гъан-маччанал учаврийн бувну, Кьалан тIисса цIа – чулий цIари тIар, цIа дурксса кьалан-биту ивкIун тIий. Кьаланнул 10-15 чагурт зузисса заргал къушгу бивкIун бур.
Жариятлул бусаврийн бувну, ванал Гъумук бакъассагу Латвиянаву, Литванаву бивкIссар ттучанну, цанмагу кIулну бивкIссар чIявусса мазру. Чил хIукуматирттая, хIатта Китайнаватугума, хъус ларсун укIлай, цалва ттучаннай дахху-ласу дуллай. 19-мур векрай ванал каялувшиву дурну, ванал хIарачатрай Гъумук ярмарка тIитIайсса бивкIссар, щаллусса нюжмардий щалвагу Дагъусттанная, Азирбижаннава Гъумукун маша бан савдажартал бучIайсса бивкIссар.
Кьалан хъинсса найрдучигу ивкIссар, кIанал цала цIияллай 60 най бивкIссар, кIайннул хIал ххуйну кIулну, Лаккуй найрдал иш-тагьар хьхьичIуннай дуллай ивкIссар. Революция хьуннин Кьалан ишла буллай ур немецнал къама марцI бай машина, бавтIун бур техникалул ва художествалул литературалул библиотекагу.
Кьаланнул къатригу цIанасса Аллабуттахъал къатрацIун ларчIсса, хъахъисса хъунмасса дарвазагу бусса къатри диркIссар. КIирайрагу къатрава вих ххуллугу бивкIссар. Аллабуттахъал къатрачIасса щинал кран бусса кIанттул ялувсса багъгу Аллабуттахъал бивкIун бур, кIиккугу найрду бишайсса.
Кьаланнул кулпат бивкIун бур Лаччухъал Агъал душ ТIагьират (1872 -194.?), ганил нинугу ЧIютIухъаятусса. Вайннал бивкIун бур оьрчIру: Камил, Жарият, Юсуп (1888-1950), Бутта (1890-194.?), кIинничалт – Асият ва Аьвдуллагь, МахIаммад-ХIанапи (1895-1995), Аьвдулвагьав (1902-1942). Камил чIавану уна ивкIуну ур. Аьвдуллагьлул бакIрачIан бувкIмуния цичIав ливчIун бакъар. Ва сияхIгу Оьмарова Жариятлул бувсмунийну дурссар, ва суратралгу тасттикь дуллай дур. Гъан-маччанал бувсмуниву Аьвдуллагьлул цIа дакъар.
Кьаланнул кулпат
Суратрал махъ лакку-оьрус мазрай чивчумунийн бувну: «Алла-буттахъал Кьалан, жена ТIагьират. Справа кIинничалт Асият ва Аьвдуллагь. Здесь все его 4 сына кроме Бутта. Юсуп, Аьвдуллагь, МахIаммад-ХIанапи, Аьвдулвагьав».
Бувсса шиннах ва хъуни хьуну махъ рирщусса суратирттах бурувгун учин бюхъанссар: бавцIуминнаву кияха урчIахунмай бур Юсуп, ТIагьират оьрчIащал, Кьалан, Аьвдуллагь.
ЩябивкIми: МахIаммад-ХIанапи, Юсуплул кулпат Шагьважи, Жарият, Асият, хьхьичI утту ивхьуну Аьвдулвагьав.
Сурат рирщуссар тIар 1918-ку шинал. Мукун бухьурча, ШагьважичIа бавцIусса душ бикIан бюхъай ганил душ Нину, ТIагьиратлучIамургу ганила душ Загьидат. Му чIумал Жарият щар хьуну бивкIун бур ЧIютIухъал Аьвдуллагьлун, цила оьрчI къабивкIссар. МуничIамагу икIан бюхъай ЧIютIухъаятусса мачча оьрчI.
Оьмарова Жариятлул дурсса чичрурдайн бувну, Кьаланнул 2 щарсса дурцуну дур. Цалчинмунин цIа Нину диркIун дур. Му щиятуссарив къакIулну бур. Мяйжаннугу, Кьаланнул шиннах бурувгун, ТIагьират махъсса шиннай бувцуну бур. Кьалан увну ур 1850 шинал, ТIагьират 1872 шинал. ХьхьичI дурцусса щарсса Нину диркIуну, хъирив ТIагьират бувцуну бур. Юсуплул цалва хъунмур душнингу Нину тIисса цIа дирзссар.
Бюхъай щак багьан АхIмадгу хьхьичI арсри тIисса Кьаланнул. Мукун бухьурча, цанна цIагу Бутта дикIан аьркинни. Амма мунал цала арснангу Бутта дирзун дур. Мунияту му Кьаланнул арс акъар.
Бюхъай жунма къакIулсса уссил арс, ягу ссурахъил арс икIан. Гихуннайсса суратиртталгу буслай бур Кьаланнул арснал Бутталгу, АхIмадлулгу хъуннасса лащин душиву.
Гихунмайгу буссар
Аьбиди ХIайдаев
Тти жува бацIанну Кьаланнуя бивзсса Аллабуттахъал ппухъруннай.
Аллабуттахъал ХIусайн, Сиражуттин, Оьмар.
Юсупгу, цала ппу куна, хъинну итххявхсса арцу-мусил усттар ивкIссар. Революция хьуну махъ бухгалтернал касму дургьуссар. Ванал кулпат бивкIун бур Баратхъаятусса Оьмардул душ Шагьважи (1892-1964). Вайннал бувну бур 6 оьрчI: ХIусайн, Нину, Загьидат (1918-2003), Сиражуттин, ТIагьират, Оьмар.
Юсуплул арсурвараятугу дарчуну дур Аллабуттахъал тухумрал ца къяртта. Ванал хъунама арс ХIусайн ивкIун ур дуккавриву итххявхсса, спортрахун ва физикалухун агьсса. Буттал КIанттул цIанийсса Хъунмасса дяъвилийн лавгун ятIа-тIар бакъа бат хьуссар. Дяъвилия бучIайссия уссурваврайн чагъарду, дуккавриву яхI бара тIисса, насихIат бусласисса. Ванала уссу Сиражуттингу (1922-1985), дахьва школагу къуртал бувну, дяъвилийн лавгун, щавурдугу дирну, га къизгъинсса дяъвилул цIараву биялссагу ккавккун, увкIун, мединститутгу къуртал бувну, хирургну зий ивкIссар цал Гъунив, яла Гъумук. Амма дяъвилий хьусса щавурдал инжит уллай, ччяни дунияллия лавгунни. Къашайшалтрал мудангу мунал цIа ххуй чулий дакъа зумух къаласайва, ка усттарсса, къашайшалал ялув хъунмасса ургъил байсса хIакин ия. Ванал наслулуву душру бакъа бакъая. Юсуплул чулухасса тухумрал къяртта ванал арснал Оьмардул оьрчIал дачин дунни. Ванал наслулувугу бур 3 душ, 4 арс. Оьмаргу (1928-1985), армиялувусса къуллугъгу лавхъун, шоферну зий, ванал машина къабивсса Дагъусттаннай кIану бакъахьунссия.
Бутта.
Кьаланнул арс Бутта увну ур 1890-ку шинал, ва ивкIун ур хъинну итххявхсса жагьил. Санкт-Петербурграй Горно-инженерный институт къуртал бувну, хьуссар ваная муси-арцу дуккай мяъданнал инженер. Ттуплислив тIайла увкссар зун. Мунан буцин ччан бивкIссар хъинну авадансса Кативхъал Мюртазалил душ Муъминат. Душ буциншиврул кIира ккило мусил дулун багьссар, аьщун кIанай дикIу, кьалиндалун кIанай дикIу. Магьаргу ЦIахъарав бивхьуссар 1915 шинал.
Муъминатгу бувцуну, Ттуплислив яхъанай, ваннал кулпатраву Асват тIисса душгу, Гьарун тIисса арсгу ххи хьуну бур.
Гихунмайсса ванал оьрмулул ххуллия бусаву личIи-личIийсса дур, амма ми куннихун кув дахчайсса дакъар, цаппара кIантту личIаннин.
Оьмарова Жариятлул бусаврийну, Бутта тIалав увну ур зун Египетнавун (Мисрилив). Цува тихун наниний Буттал кулпатгу, оьрчIругу биян бувну бур Гъумукун. Мугу диркIун дур 1922-ку шин. Тийх ХIабаш-ХIажинал ванахь миннат бувну бур, Ттуплисливсса цала кулпатгу, оьрчIругу цачIанма биян бувакьай ХIабашнавун (Абиссиянавун), куну. Га чIумал Бутта Египетнавусса давугу дурну, махъунай Ттуплислив зана ивкIун най ивкIун ур. Буттагу, танал хатир личIан къабаннача тIий, Ттуплислияту танал кулпат бувцуну лавгун ур ХIабашнавун, тиха цува махъунай Ттуплислив зана икIансса пикрилий. Мугу диркIун дур 1924-ку шин. Амма паччахIлугърал дазуй Бутта ацIан увну, шихунай къаитаакьлан бивкIун бур, дазу ларкьуссар, тIий. Ванал баян бувну бур кулпатран, укунсса иш-тагьарданувун агьну урача, оьрчIругу бувцуну, вищава шихун бучIан шайрив ххал бува, тIий. Лавгун бур Муъминат оьрчIащал Ттуплислив. Тичча дазул кьатIув гьан ванихьхьун ихтияр къадуллай, мюрщисса оьрчIащал дачIи шинай тай ккашил шиннардий органнайх занай ванин чIявусса ккавккун бур. Яла гуж-балагьрай махъунмай Гъумукун бучIан бювхъуну бур. Буттама ливчIун ур дазул кьатIув.
Гъан-маччанал бусаврийн бувну, Буттаятусса бусала укунсса бур. Ва бувсун бикIан бюхъай Буттал уссил арснал Каланнул. Магьар бивхьуну махъ Бутта цалва кулпатращал Гъумук буттан кумаг буллай, арцу-мусил усттаршиврий ивкIун ур. Революция хьукун, байбивхьуну бур дяъвирду ятIулминнал ва кIяламиннал. Кьаланнул цала арсурваврахь увкуну бур: «Дуниял ччя-ччя даххана хъанай дур, ттул зухь бусансса насихIат – анаварну насияра зунма чун ччай бурив, шикку къабавцIуну».
Мукун Бутта, чIун дуркIукун шавай зана икIансса нанижатрай, лавгун ур дазул кьатIув, тихва личIантIишиву къакIулну. Цал агьну ур Франциянавун, Марсель шагьрулий арцу-мусил усттарну зий ивкIун ур, яла лавгун ур Абиссиянавун.
Аьвдулвагьаблул арснал Каланнул бусаврийн бувну, 1920-ку шиннардий бучIайсса бивкIун бур чагъарду, кIюласса марцI-мусил чIапIащал, хъинну миннат буллалисса цалва кулпат цачIанма гьан банмур бувара тIисса. Амма му даву щищачIав дан къархьуну дур. Махъва-махъсса чагъарданий бия тIар, цува ивкIукун ЧIирайннал хIатталлив увччуну ччива тIисса. Ми гьарза дан къашайсса затруну лирчIссар.
Тихва ХIабашнаву Буттал бувцуну бур хъинну цIа дурксса гъумучиричу ХIанапи Абиссийнскил душ. ГаницIагу 2 душ бувну бур.
1946-ку шинал аьрая зана ивкIсса ца лаккучунал бувсун бур Гъумучиял арамтуннахь, цивппа Албаниянаву бавцIусса чIумал, цачIан увкIуна хъинну авур дусса, чIантIив кIяла хъанахъисса адамина, Дагъусттаннаятусса цучIав урув тIий цIухлайча, яла цала бувсукун цува Дагъусттаннаясса лаккучу ушиву, та хъинну ххаригу хьуну, цащал лакку мазрай гъалгъа тIун ивкIуна, амма чIалай бия танан лакку маз ххуйну къакIулшиву тIий. Бувсуна тIар цува Гъумучатусса Аллабуттахъал Бутта ушиву, махъунай учIан ччай, итакъаакьлай цанма ккавкциригу, миннат буллай ия тIар цала кулпатрахьхьун, оьрчIахьхьун дулун арцу ласи тIий. Амма аьралуннащал талай нанисса, гьунттий цала бакIрачIан ци бучIавив къакIулсса лаккучунаща къабювхъуну бур танал бигар бакIрайн ласун. Тания мукьах Буттаяту щинчIав цичIав къабавну бур.
Буттал ва Муъминатлул душ Асват (1917-1955) щархьуну бур Аьвду-Бугъданхъал Аьвдун. Арс Гьарун (1919-1987) кIира шинал пединститутгу къуртал бувну, математикалул дарс дихьлай, школалул директорну зий ивкIун ур Герменчиклив Бабаюртуллал райондалий. Гьаруннулгу кIийла ташу бувну бур. Цал Оьчурханхъал Мусал душнищал ПатIиматущал, кIилчинсса – къумукь кулпатрацIа бувну бур 2 арс ва 6 душ. Арсурваралгу къумукь хъами бувцуну, Аллабуттахъал насру хъун хъанай най бур къумукьнаву.
МахIаммад-ХIанапи цалва кулпатращал ва цува жагьилни.
MaxIaммад-ХIанапинал (1895-1995) къуртал бувну К. А. Темирязевлул цIанийсса академия, хьуну ур цIанихсса агроном-виноградарь. ЧIярусса шиннардий зий ивкIун ур «Геджух» тIисса цIа дусса совхозрал директорну. Мукунма ванал каялувшиврий зий бивкIун бур Дербентливуллал вокзалданийсса ресторангу. Ванал Ира тIисса оьрус кулпатгу, Людмила тIисса душгу бивкIссар.
Тикку зий унува заочныйну къуртал бувну бур ялагу 2 институт. 1952-ку шинал Чачаннал хъуниминнал тIалавшиннарайн бувну, ХIукуматрал ва тIайла увккун ур Грозный шагьрулийн. Цувагу увччуссар Грозналий. Ххишаласса ваная бусаву дакъар.
Аьвдулвагьав (1902-1942).
Аьвдулвагьав дуклай ивкIун ур Москавлив, ппу къашавай хьукун, учIан багьну бур Гъумукун. Зий айивхьуссар цал налогирттал инспекторну, яла увхссар республикалул кинофикациялул управлениялувун.
1930-ку шиннардий, ваная мазру бувну ва къаччиминнал, ва анекдотру, махсарартту хъуниминная буслай ия куну, дуснакь увссар. ИвкIуссар дуснакьраву 1942-ку шинал.
Аьвдулвагьавлунгу кIийла ташу бан багьссар. ХьхьичI Маркьатусса Маммаева Муъминатлущал. Муъминат зий бивкIссар Щурагьиял КПСС-рал Горкомрай инструкторну. Ва хъинну дурккусса, каялувшиву дан бюхъу бусса хъамитайпа бивкIссар. ВаницIа бувссар душ СултанпатIимат. КIилчинмур кулпат хьуссар СайдхIусайнхъал Гъазинал душ Аьжа (1903 – 1997). ВаницIагу увссар арс Калан. Каланнулгу, Москавливсса Бауманнул цIанийсса МВТУ-луву дуклай ивкIун, чIяву-чIявусса пишардугу бувгьуну, гьам журналистну, гьам физикну, гьам инженерну, гьам «Эльтаврай» лабораториялул заведующийну зий ивкIссар. Ванал кулпат – Оьмарова Зумрут СулайманхIажинал душ. Вайннал ур 3 арс, Аллабуттахъал насру хъун буллай най бур.
Укунсса бур Гъумучиял ца тухундалул ппухъруннал оьрмулул ххуллурду.
Аьбиди ХIайдаев
