Ссайну дакIний лирчIри вин ларгсса нюжмар?
Укунсса суал ва мунинсса жавабру дулару жу лях-карах жулва кказитрай.
Казима Булаева, аьлимчу, генетик, биологиялул элмурдал доктор:
Ларгсса нюжмар дакIний лирчIунни Турциянал ца яла хьхьичIунма ва бусравма президент Сулайман Демирель дунияллия лавгсса кьурчIисса хаварданийну. 1995 шинал, Анкаралийн Дунияллул халкьуннал биотехнологиярттал конференциялул каялувчитуращал лавгсса аьрххилий, на хьунабавкьуссияв та чIумалсса Турциянал президент Сулайман Демиреллущал. Му хьунабакьаврий мунахь буслай бивкIра Дагъусттаннай нара дурсса генетикалул ххалбигьавурттая ва Туркнал ва жулва генетикалул ва биомедициналул аьлимтал хIала-гьурттуну зун аьркиншиврия. Сулайман Демиреллул Ккавкказуллал ва Турциянал халкьуннал генетикалул ххалбигьавурттал хIакъиравусса масъаларттал чIаравгу авцIуну, лавайсса кьиматгу бивщуна. ТачIав хъамакъабитай та хьунабакьаврий Турциянал президентнал дакI хъуншиву къадурну, элмийсса масъаларттавух хIалагу увххун, дунияллул халкьуннал дянивсса элмулул ахттаршиннардал дазурду гьарта-гьарза дувансса гъира-шавкь дусса, агьалинал къайгъурдайсса инсан ивкIшиврия. Мяйжаннугу тай шиннардий Туркнал ва Аьрасатнал дянивсса элмулул, машлул ва цаймигу арарду хьхьичIунну дуссия. ХIакьинусса кьинигу ядуллайнма бура та конференциялиясса, Турциянал президент Сулайман Демиреллул автографращалсса, Сертификат. Щалвагу Турциянал агьулданухь дакIнийхтуну жижара буллай бура, Сулайман Демиреллул рухI хъинний дишиннав, алжаннул ххари аннав.
Асият ХIамзаева, ишбажаранчи:
Ларгсса нюжмардий щалвагу билаятрай кIицI ларгунни Медициналул зузалтрал кьини. На махIаттал хьуну, хIайран хьуну буруглай бивкIра Цалчинмур каналданийсса 2015 шинал Аьрасатнал яла хьхьичIунми хIакинтуран «Призвание» тIисса премия дуллалисса передачалух. 15 шинал лажиндарай му премиялун лайкь хьуну бур 400-лихъайсса хIакинтал. Ми цинявппагу хIакинтурал захIматсса тагьарданувун багьсса цикссагу къашайшалт хъин бувну, цIуну дунияллийн буккан бувну бур. Цалва пишалийн дакI тIайласса, куртIсса кIулшивуртту дусса хIакинтурал, инсантал хъин буллай, медициналуву дуллалисса караматру ххалхьувкун, чурххавун зурзу багьлай, иттав макь дукIлай, гьалак буклай бивкIра нагу.
Гьашину «Призвание» тIисса бусравсса премиялун лайкь хьунни жула дагъусттанлув – Дахадаевский райондалиясса Уркарах шяраваллил азарханалий 53 шинай хIакинну зузисса Хасбула МахIаммадовгу. Цинявннанмагу кьюлтIсса зат бакъар махъсса ппурттуву инсантурал хIакинтурайн вихшала къадуллай, цалла цIуллу-сагъшиврул ялув бацIаву мурадрай, лаглай бур Аьрасатнавусса ва чил билаятирттайсса хIакинтурачIан. Сант дирирну дунура, бусан ччива жучIавагу бушиву ка сававсса, дакI хъинсса, куртIсса кIулшивуртту дусса хIакинтал. Вай на ялув кIицI лавгсса хасиятру дусса хIакинтал бур МахIачкъалаллал кIилчинмур азарханалул сочетанный хирургиялул отделениялул заведующий Рамазанов Расим Рамазанович ва вара отделениялул хирург МахIаммадсалам Темирбулатов. Вай мяйжаннугу цуяца къашайшала личIи къаувну, хъинну ялув бавцIуну, цалла даву дакIнийхтуну дуллалисса хIакинтал бур. Вай гьантрай ва азарханалий, ка сававсса вай хIакинтурал хIарачатрайну, на цIуницIа дунияллийн буккан бунна. Шиккун багьаннин на шагьрулул цикссагу азарханардайх бувккун, щилчIав ттуй операция буван бакIрайн ласлай бакъая. ДакIнийхтуну барчаллагь тIий, цIуллушиву чIа тIий бура къашайшалтрах аякьа дусса укунсса чумартсса хIакинтурахь.
Аьйшат Ттаттаева
