Итни кьини, май зурул 25-нний, Аьрасатнал Виваллил иширттал министерствалучIасса Жяматийсса советрал Президиумрал ххуллурдай мюхчаншиву дузал даврил хIакъиравусса заседание хьунни.
Му ларгунни АьФ-лул МВД-чIасса Жяматийсса советрал председатель Анатолий Кучеренал каялувшиннаралу.
А. Аьбдуллаева
Цинявппагу Аьрасатнал субъектирдащалсса видеоконференциялий Дагъусттаннал чулуха гьуртту хьунни виваллил иширттал министрнал хъиривчу МахIаммад ГъазимахIаммадов, ДР-лул Виваллил иширттал министерствалучIасса Жяматийсса советрал председатель, Аьрасатнал Правовой академиялул ректор, профессор Багьауттин МахIаммадов, мунал заместитель Анжелика ЦIаххаева, ДР-лул ГИБДД-лул хъунама Валерий Громов, Виваллил иширттал структуралул зузалтращалсса даврил управлениялул хъунама Сергей Макуха. Цалва ихтилатраву Анатолий Кучеренал бувсунни Аьрасатнал регионнал ххуллурдай мюхчаншиву дузал даврил тагьардануя бусласисса цалчинсса доклад бувну бивкIшиву 2013 шинал. Мунил агьаммур мурадгу бивкIшиву властьрал ва ялув бацIайсса органнал даврин кьимат бищаву.
Заседаниялий бувсунни Аьрасатнал субъектирдайсса Виваллил иширттал министерствалул органначIа ххуллурдай мюхчаншиву дузал даврил ялув бацIан сакин бувсса группардая.
Ххуллурдайсса тагьар цукунсса дурив, ххишаласса къулагъас цуми масъаларттах дан багьлай бурив кIул бан бюхълай бур агьалинал бусласимур сияхIрайн ласласисса «Дороги без проблем» тIисса интерактивная карта дурну.
— ЦIанасса чIумал ххуллурдай мюхчаншиву дузал даврил хIакъираву Жяматийсса советрал хIадур буллай буссар кIилчинсса доклад. КIицI ларгсса интерактивная карталийхчIин доклад хIадур бавриву гьуртту хьун бюхълай бур гьарица инсаннаща. Му карталийн буккан бюхъантIиссар дорогибезпроблем.рф сайтрай. Гьарица инсаннаща бюхъайссар ххуллул масъаларттая, ччя-ччяни хьунабакьлакьисса иширттая бусан. Бюхъайссар Аьрасатнал ххуллурдайсса тагьар ххуй даву, мюхчаншиву дузал даву мурадрайсса мюнпатсса маслихIатругу бан, — увкунни А. Кучеренал.
Ихтилат къуртал бувну махъ, ванал бувсунни 2014 шинал кIантту-кIанттурдайсса Виваллил иширттал министерствардачIасса Жяматийсса советирттал дянив баян бувну бивкIсса конкурсрал хIасиллая, кIицI дунни личIи-личIисса номинациярдаву ххув хьуминнал цIарду.
