Май зурул 24-нний ЦIуссалакрал райондалул КIулшивуртту дулаврил управлениялул хъунама Руслан МахIаммадовлул сипталийн бувну, АьФ-лул лайкь хьусса учитель Валериан Абакаровлул цIанийсса туристурал ва краеведтурал слет гьашину хьунни ЦIуссаминалий.
ЦIуссалакрал райондалул туристурал ва краеведтурал слетрай гьуртту хьунни 9 школа ЦIуминалиясса ва 2 школа ЦIуссалакрал райондалиясса. Муданна кунна гьашинугу слет дайдирхьунни Аьрасатнал гимн учаврийну ва Аьрасатнал ттугъ гьаз баврийну.
Шадлугърал даражалий слетрал даву дайдихьлахьисса мажлисрай гьуртту хьунни ЦIуссалакрал райондалул бакIчинал хъиривчу Аьли Исрапилов, ЦIуссалакрал райондалул КIулшивуртту дулаврил управлениялул хъунама Руслан МахIаммадов, райондалул школардал директортал, слетрал сакиншинначи Валериан Абакаровлул дустал, гъан-маччами ва мунал шяраваллил жямат.
Слетрал даву дайдихьлай, Руслан МахIаммадовлул кIицI лавгунни Валериан Абакаровлул хъунмасса захIмат бивхьушиву ЦIуссалакрал райондалул кIулшивуртту дулаврил даву ларай давриву ва чIава краеведтурал, туристурал слет хIасул даврийнугу, райондалул даража гьаз хъанахъишиву. Мукунма цинявппагу гьуртту хъанахъиминнан чIа увкунни тIайлабацIу ва сивсуну цалва бяст-ччаллу ккаккан бан бюхъаву. Гьуртту хъанахъиминнан слетрал даврил плангу дурчIин дурну, баян бунни жюрилуву бикIантIиминнал цIардугу. Жюрилуву бия МЧС-рал зузалт, цалчинмур категориялул ххассал бувулт Халил Мусаев, МахIаммад Абакаров, ВахIид Баратов. Цивппа бусса кIанттурду тIайлану кIул баврил ялув ацIаву дурну ия Дунияллул халкьуннал даражалул ххассал буву Зиябуттин НикIамахIаммадов. Укунсса даражалул жюри бушиврийнугу хъиннува гьаз хъанай бия слетрал даврил даража.
«Лучшие люди села, района» тIисса номинациялуха зий бивкIсса краеведтураща бювхъунни гьарта-гьарзану му тема аьч дуван. Цинявппагу школарттал дуклаки оьрчIал сакин дурну дия цалва-цалва школардан хасъсса эмблемартту, ттугъру, стендру, чIирал кказитру ва бивщуну бия чятирду. Слетрал даврил хIасиллу дурну, личIи бунни номинациярдаву ххув хьуми.
1. «Туртехника» номинациялуву 1-мур кIану бувгьунни ТIюхчардал школалул, 2-мур кIану Чапаевкаллал ва 3-мур кIану ДучIиннал школалул.
2. «Азимутальный ход» тIимур номинациялуву 1-мур кIану бувгьунни ТIюхчардал школалул, 2-мур кIану Чапаевкаллал 1-мур школалул, 3-мур кIану Гьамиящиял школалул.
3. «Краеведческий доклад» номинациялуву 1-мур кIану бувгьунни Шушиннал школалул, 2-мур кIану ДучIиннал школалул, 3-мур кIану ЦIуссаккуллал школалул.
4. «Краеведческая викторина» номинациялуву 1-мур кIану бувгьунни Чапаевкаллал 1-мур школалул, 2-мур кIану Чапаевкаллал 2-мур школалул, 3-мур кIану ЦIуссалакрал 2-мур школалул.
Мукунма жюрилул, школардал стендирттал, кказитирттал даврил сакиншиннарах бурувгун, личIи бунни хьхьичIунми ва миннангу дуллунни ХIурматрал грамотарду.
Ахирданий ва мероприятие сакин дурминнахь ва шикку гьуртту хьуминнахь барчаллагь увкунни Валериан Абакаровлул кулпатрал ва мунал арсурваврал.
