Жулва билаятрай лахъа-хъунну, лавайсса даражалий хьунадаркьунни Бюхттулсса Ххувшаврил 70 шинал юбилей. Мунийнсса шадлугъирттавух гьуртту хьунни цинявппагу — оьрчIал багъирдал тарбиячитурая тIайла хьуну, Билаятрал Президентнайн бияннин.
ХьхьичIунсса гьурттушинна дунни ми иширттавух жулва республикалул школарттал дуклаки оьрчIалгу. Мукунсса оьрчIавух, республикалун ва билаятран агьамшиву дусса иширттавух гьуртту хъанахъисса, дуккавриву ва низамраву эбратрансса бур Каспийскаллал шагьрулул Аьрасатнал Виричу М. Оьмаровлул цIанийсса 6-мур школданул 8-мур «М» классрал дуклаки душ КьурбанмахIаммадова Асия МахIаммадкьадинал душ. Шиккува кIицI лаган, Асия жулва ххаллилсса балайчи ва гьунар бусса актриса Саният Рамазановал душри.
Бадрижамал Аьлиева
Ххувшаврил юбилейран хасну, уттигъанну МахIачкъалалив хьунни дуклаки оьрчIал дянивсса конференция, ДР-лул КIулшиву дулаврил ва элмулул министерствалул ва ДГУ-рал сакин бувсса. Мунивух гьуртту хьун Каспийскаллал шагьрулул 6-мур школдания язи увгьусса 4 инсаннавух хьунни Асия КьурбанмахIаммадовагу. Конференция цуппагу хьуссар ДГУ-раву. Мунивух гьуртту хъанахъими ДГУ-рал личIи-личIисса факультетирттайн бивчуссар, миккугу личIи-личIисса секциярдайх бавчIуссар. Асия щаллагу республикалул школарттаясса сайки 40 инсаннавух багьунни тарихралмур факультетрайн, гьуртту хьунни «Дагестанцы в годы Великой Отечественной войны» секциялувух. Ванил даврин цIа дия «Абдулхаким Исмаилов — человек, первый водрузивший флаг над Рейхстагом». Ва конференциялий Асиял республикалул школардал хьхьичIунсса оьрчIал дянив бувгьунни 1-мур кIану.
— Ттун ттунма хъинну тIааьнну бия укунсса инсанная буслан. Амма 1-сса кIану бугьанссар тIисса пикривагу бакъассия, хIатта циняв ттул доклад ххуйсса хьунни тIурчагу, ттун ттунна цирив диялкъахъанахъисса кунма чIалай бия. Конференция къуртал хьуну, хIасиллу дуваннин бацIанмагу ччай бакъассияв. Му най хъунмасса хIалгу хьуна, бувххунгу бияв. Мукун, шаппай бачин нанисса кIанай, ттулва учительница Дильшад Балабековнал бацIаннуча увкуна, щил ци кIанттурду бувгьуну бурив ккаккан. Махъ кIул шайхту нава цалчинсса кIану бувгьушиву, хъинну ххари хьура. Рязийра Бюхттулсса Ххувшаврил 70 шинал юбилейраву ттулва чулухасса хъун бакъасса бутIа бишин бюхъаврия. Укунсса хьунни ттул цалчинма цалчинсса республикалул даражалийсса конференция. Гихунмайгу укунсса давурттавух гьуртту хъанансса гъира-шавкь ххи хьунни, — тIий бур Асия.
Ва конференциялувух гьуртту хьуну, 1-мур даражалул диплом кIунттил бугьаннин Асия цилва аьзизсса школданийгу лайкь хьуссар наградарттан, школалий буллалисса «За страницами школьного учебника» конференциялувух гьуртту хьуну. Муния махъ тIайла бувкссар ва республикалулмур конференциялийн. Дуккавриву хьхьичIунсса Асиял гьунар, бюхъу чIалай, школалулмур конференциялувух гьуртту хьун ва язи бувгьуну бур ванил тарихрал ва обществознаниялул дарсирдал учительница Дильшад Балабековнал. Ва иширал цал ххишалагу чIалачIи буллай бур цуксса агьамшиву дуссарив оьрчIавусса гьунарду хIисав хьуну, ми гихунмайгу бачин бувну, хъиннува итххяххан бувансса, ялун личин бувансса давурттив дувансса, гихунмай хъиннува ххуйну зунсса гьавас миннаву чантI учин бувансса инсантал, нину-ппу тIий, педагогтал тIий, оьрчIал чIарав бушиврул. Асияннив му чулуха тIайлабацIу хьунни, ванил чIарав дуккаврил ва тарбиялул ялув бавцIусса личIлулсса нину-ппу ва учительтал бур.
Школалул конференциялийннин хьхьичI тIурча Асия ххув хьуссар Каспийск шагьрулул обществознаниялул олимпиадалий. Мунийва лайкь хьунни грамоталун ва арцуйнусса бахшишран (1 000 къ.). «Вай на ляркъусса цалчинсса арцур», — хъяй бур Асия.
Школалий марцIсса «ххювардай» дуклакисса Асия занай бур Каспийскаллал С. Агабабовлул цIанийсса музыкалул школданийнгу. ХьхьичIунну дугу дуклай, вай конференциярдайн хIадур хъанай, хIатта цилла каникуллайгума, Асиял хъунмасса захIмат бивхьуссар. Циняв дарсирдал ххюварду бунугу, миннувурив ванин яла-яла ххирар математикалул, химиялул, оьрус мазрал дарсру. Тархъансса чIун дусса чIумал ххирар музыкалух вичIидихьлан. Бур ваниву назмурду чичаврил гьунаргу.
Цуксса дуккаврихух лавгун бунугу, Асиян лякъай чIун шаппа ниттин кумаг буванссагу, цила буттаха ва чIивима уссийха аякьа дуванссагу. ЦIанакул чIявуми оьрчIру телефоннавун, интернетравун «кьувтIусса», миннаву дарсирдах бургансса, нитти-буттащал цачIу щябивкIун, дакIнийхтунусса ихтилат бувансса гъира бакъасса чIумал, Асия кунмасса душругу, укун куннащал кув хIаласса, бавкьусса, архIал хьхьиричIан тIий, зунттавунмай тIий, тIабиаьтрайн буклакисса, куннал дакIниймур куннал ласласисса кулпатругу бушиврия дакI ххари хъанай дур.
КIай ххувшавурттащалгу барча буллай, чIа тIий буру Асиян ванияр гихуннай хъунисса ва чIярусса хьхьичIуннайшивуртту цаймигу, гьарца дуллалимуниву тIайлабацIу, дакIниймур щаллу шаву. Щак бакъар Асиял цIа жунна ххуй чулий уттигу цимиллагу баянтIишиврийн. Амин.
