Июньдалул 2-нний Дагъусттаннайн бувкIунни АьФ-лул Федерал Мажлисрал ПаччахIлугърал Думалул депутатътурал группа.
Делегациялувух бур «Единая Россия» фракциялул каялувчинал 1-ма хъиривчу Дмитрий Савельев, ПаччахIлугърал Думалул дунияллул халкьуннал иширттал комитетрал председательнал 1-ма хъиривчу Светлана Журова,
ПаччахIлугърал Думалул хъуслил иширттал комитетрал председательнал хъиривчу Владимир Афонский, ПаччахIлугърал Думалул жяматийсса цачIушивурттал ва диннал организациярдал комитетрал председательнал хъиривчу Ольга Козакова.
Миннащал архIал бувкIунни Дагъусттаннаясса депутатътал ХIажимет Сафараьлиев, Мурад ХIажиев, МахIаммадкьади ХIасанов.
Ми хьунабавкьунни бакIрай ДР-лул БакIчи Рамазан АьбдуллатIиповлущал. Ванал бувсунни хъамаллурахь республикалийсса политикалул ва социал-экономикалул тагьарданияту. Р. АьбдуллатIиповлул махъ буллунни АьФ-лул Президентнал сипталийнусса цинярда реформартту бакIуйн дуккан дансса. Бувсунни Дарбантуллан 2000 шин шаврийнсса хIадуршинная ва оьвкунни ПаччахIлугърал Думалул депутатътурайн ва иширан хасъсса шадлугъирттай гьуртту хьун.
Яла ПаччахIлугърал Думалул депутатътал хьунабавкьунни ДР-лул Халкьуннал Мажлисрал Президиумрал члентуращал. Парламентрал Председатель Хизри Шихсяидовлул, хъамаллурахь аьла-ссалам буллай, бувсунни цуксса хъуннасса мяъна дуссарив парламентирттал дянивсса дахIавурттал, ми дахIавурттал кумаг хъанахъишиву федерал ва регионнал законну ялунгу ххуй дан, агьалинал маэшат лавай бан.
Хизри Шихсяидовлул бувсунни Халкьуннал Мажлисрал структуралия ва давурттая, республикалул исполнительный властьращалсса хIала-гьурттушиврия.
Дмитрий Савельевлул бувсунни ПаччахIлугърал Думалувусса Дагъусттаннаясса депутатътурал дуллалисса давурттая, республикалий хъанахъисса дахханашивурттая.
Яла, ПаччахIлугърал Думалул каялувчинал тапшур бувмур биттур буллай, Дмитрий Савельевлул Хизри Шихсяидовлун дуллунни ПаччахIлугърал Думалул ХIурматрал лишан «За заслуги в развитии парламентаризма».
Хьунабакьаврий ихтилатру бунни Светлана Журовал, Ольга Козаковал, Владимир Афонскийл ва цайминналгу.
Хьунабакьаврил ахирданий Хизри Шихсяидовлул уттигу цал барчаллагь увкунни ПаччахIлугърал Думалул депутатътурахь республикалух къулагъас дуллалаврихлу.
ХIадур бувссар ХI. Аьдиловлул
