Майрал 29-нний ДР-лул Роспотребнадзорданул Управлениялий Элеонора Оьмариевал каялувшиврулу хьунни цаппара ведомстварттал цачIусса совещание. Ххалбигьлай бия «О водоснабжении и водоотведении» тIисса 416-мур Федерал Закон Дагъусттан Республикалий биттур дуллалаврил хIакъиравусса масъала.
ХIасан Аьдилов
Щинал щаллу баврил хIакъиравусса 416-мур Федерал Закондалия бувсунни Роспотребнадзорданул Управлениялул хъунмур Элеонора Оьмариевал. Ведомствалул бакIчинал мукъурттийн бувну, га Закон зун диркIссар 2013 шинал январьданул 1-нния шиннай. Роспотребнадзорданул тамансса давуртту дурну дур ДР-лул муниципал органнащал цачIу Закондалул тIалавшинну биттур даврин хасну:
— КIантту-кIанттурдай бувну бур семинар-совещанияртту районнал ва шагьрурдал округирттал бакIчитуращал, ЖКХ-лул управлениярттал хъуниминнащал, щинал щаллу байсса ва эксплуатация байсса организациярдащал;
— Дурну дур 2014 шинал шяраваллаву ва шагьрурдай хIачIайсса щинал мониторинграл хIасиллал анализ;
— 2014 шинал хIачIай щинал анализирттал ккаккиярттал хIасиллал хIакъираву баян бувну бур кIантту-кIанттурдайн.
Миннуяр ххишала дурну дур цаймигу давуртту. Миннувасса цаппара укунсса дур: ДР-лул Роспотребнадзорданул Управлениялул предписанияртту биттур къадуллай тIий, 591 аьчIа дирхьуну дур, миннува юридийсса ведомстварттай 260 аьчIа 5 млн. къуруширттансса; судирттайн тIайла дурккун дур 331 административсса материал; прокуратуралул органнайн тIайла бувккун бур 120 хIукму муниципал сакиншиннал бакIчитурал хIакъираву; 88 материал судрайн тIайла дурккун дур.
Хъирив ихтилат бунни гава управлениялул санитар надзорданул отделданул хъунмур Лариса Пантинал. Ганил бувсмунийн бувну, агьали хIачIай щинал щаллу баврин хасъсса анализ дурну, кIул бувну бур, 2014 шинал 1 млн. ва 41 азаллий 410 инсан – 37,3% щаллу увну ушиву ххуйсса, хIачIан бучIисса щинал (2013 шинал 39%).
Мунияр чансса къаххуйсса, амма хIачIан бучIиссаксса щинал (условно доброкачественная) щаллу увну ур 1 млн. ва 329 азаллий 75 инсан – 47,7% (2013 шинал – 48,0%).
Къаххуйсса, хIачIан къабучIисса щинал щаллу увну ур 416 азаллий 394 инсан – 14,9% (2013 шинал – 13,0%), 22 административ территориялий.
Органолептикалул ккаккиярттал чулуха (хъунмурчIин оьлукъаву) къаххуйсса хIасиллу хьуну дур 2014 шинал Каспийскалий, МахIачкъалалив ва чIарахсса шяраваллаву, Избербашлив, Хасавюртлив, Гергебиллал, Ахвахуллал районнай ххалдан ларсъсса щинал анализирттал.
Микробиологиялул ккаккиярттал чулуха ДР-лий гигиеналул тIалавшиннардацIун къадаркьусса анализру хьуну дур разводящая сетьрава ларсъсса щинал – 2014 шинал 17,1% (2013 ш. – 17,8%), гьашину 5 зуруй – 10,8%.
