РАМАЗАННУЛ АРС РАМАЗАНОВ ЮСУП
Хархавар бакъасса азаруннища ххассал уван къабювхъуну, июньдалул 1-нний жуятува личIи хьунни цIанихсса захIматчи, сакиншинначи-каялувчи, чIявучин бусравсса ва хIурматрайсса инсан, Ккулатусса Рамазанов Юсуп Рамазаннул арс Сайки 77 шинал мутталий Юсуплул бувтсса оьрмулул ххуллу ччиманан эбратрансса, хIакьсса зунтталчунал ххуллуну хьуссар.

Юсуп чIивисса чIумал оьрмулухун хIухчусса цала бу­ттал чIявуну цачIана яттикъушлийн уцайсса ивкIун ур, мунан ххира хьуну бур яттугу, ризкьичинал пишагу. Дарсирдая оьна­сса чIумал, хаснува каникуллай, цащава шаймур буллай, цала буттал кумагчину ивкIун ур.
Школа къуртал бувну, аьралуннаву къуллугъ бувну махърив, бухгалтер шайсса курсругу бувккуну, буттал шяраву колхозрал ризкьилул учетчикну, ревкомиссиялул хъунаману зий уссия. Хъирив тIурча, колхозрал председательнал цалчинма заместительну ивтун, 18 шинал мутталий шярава 500-600 километралул архсса къутандалий кулпатращал архIал ва хъинну захIматсса къуллугърай зий уссия. Юсуплул, зий уна дук­лай, Шяраваллил хозяйствалул институтрал зооинженертал хIадур бай факультетгу къуртал бувссар.
Юсуплул ва къуллугърай зий уссаксса хIаллай къутаннайсса колхозрал, жяматрал ризкьилул ва ризкьичитурансса минардал, аьмну маэшатрал ва багьу-бизулул тагьар мархлуцIакул даххана дурссия. Къамушрал магъивгу дусса, аьрщаравусса кунмасса къатран, сарайрдан кIанай, къалмукьнава автомашинардай бивчусса чарттая дурсса ххаллилсса минарду хьуссар. ТIивтIуну буссия библиотека, клуб, школа, медпункт, столовая. Ссуттил-кIинттул яттичIасса чIявуми хIухчалтрал цалва хъами, мюрщисса оьрчIругу цащала буцайссия.
Ца цамургу. Колхозрал къутан­далий Бакресслив кIин­ттулнин ризкьилун диялсса лазуни хIадур дансса шартIру дакъа, мия-тия машан ласлан багьай­ссия. Юсуплул хIарачатрайну Ставрополлал совхозирттал, Тарумовкаллал, Къизлардал районнайсса хозяйствардал лухччая цанмагу гьурттуну хIадур дуллай, ризкьи биялну щаллу баврищал, чIаххувсса колхозирттангума иш багьний ка-кумаг байссия.
Тамансса шинну дурссар Юсуплул та яла аварасса перестройкалул чIумал Ккуллал колхозрал председательнугу. Ккуллал колхоз республикалий ва Союзрайгу хьхьичIунминнувух дикIайссия. Цимилгу ххув хьу­ссия соцбястливу. Ва ишираву тIурча председательнал заместительну зузисса Юсуплулгу хъунмасса бияла бартбивгьуссар. Заманалул щатIахьхьун иривну, МахIачкъалалив изан багьсса Юсуплул цува ишбажаранчину чIалачIи увссар. ХIасил лажин кIялану, махъминнангу эбрат­ранну щаллу бувссар Юсуплул цайвасса каялувшиврул ва инсаншиврул бигарду.
Цалва оьрмулул гьалмахчу Тамарищал архIал Юсуплул бувну, хъуни бувну, оьрмулувун буккан бувссар ххаллилсса 3 арс ва 4 душ.
ДакI марцIну ва лябукку буну буллай ивкIсса захIматрахлу ванал хIалал дурссар наградартту, грамотарду, бахшишру. «Муксса хIаллай дакI марцIну зий, чIявучингу мюнпат биян буллай, хIарачатрай урахха, вин бахшишругу дуллухьунссар­хха?» – увкукун, пахрулий ва ххарину пишгу куну, Юсуплул учайссия: «Гьаксса чIярусса дуллуссар. Амма ттуннарив яла хъунмур ттуннасса бахшишну чIалан дикIай ттущава ттунмагу, махъминнангу мюнпат буну зун бюхъансса тавпикь дулаву, яла-яла нава рязисса кулпатраву хъуни хьусса, куннащал кув бавкьусса, нава ххари уллайнмасса оьрчIру ттулва бушаву. Ялагу нава чIявучин, хаснува дустуран, ххирасса, ттулва хIурмат буллалисса бушаву».
Юсуп дакIний уссия цалла 80 шинал юбилей гьарта-гьарзану кIицI лаган. Цибанссар, кьадарданул ва жуятува личIи унни.
Юсуп жуятува личIи шаврил кьурчIишиву дакIнийхтуну кIидачIлай, жижара буллай буру ванал кулпатрахь, оьр­чIахь, уссихь, уссурваврал ва ссурваврал оьрчIахь, махъсса гъан-маччанахь. Махъ ливчI­миннахьхьун цIу­ллушиву дулуннав, оьрмурдай барачат бишиннав. Ванаяр чIивину дунияллия гьансса къабукканнав. Юсуплун дакIнийну дуван къархьумургу оьр­мулуву щаллу дансса цIуллушиву ва тавпикь дулуннав.
Юсуплулгу бунагьирттал аьпа баннав. РухI хъинний дишиннав.
Дустурал, гьалмахтурал цIанияту Гьарун ХIасанов

————————————

БАШИРДУЛ АРС ТТУПЧИЕВ МИККУЛАТ
Уттигъанну, цIуцIи шаний лахъигу къалавгун, аьпалухьхьун лавгунни хIакьсса зунтталчу, Хъурхърал шяравасса, лакрал дянив машгьурсса тухумраясса, Ттупчихъал Баширдул ва Аминатлул арс Миккулат.
Увну ур Миккулат Хъур­хърал шяраву 1932 шинал. Шяраву школа бувккуну махъ, къуртал бувну Щурагь педучилище, хъирив аьрали бурж лахълай Москавуллал областьрай 3 шин дурну дур. Зана хьуну махъ зун ивкIун ур райкомрай пропагандистну. Яла шагьрулийнай ивзун, зий ивкIун ур личIи-личIисса давурттай. Пенсиялийн укканнин зий уссия сепараторду бай заводрай мастерну. Чув, ци даврий зий унугу, Миккулатлул ккаккан бувна цува гьарцаннащалагу хIал бавкьусса, инсаннал чIарав ацIан, ка-кумаг бан чялишсса, дакI-аьмал хъинсса, яхI-къирият дусса, мяйжаннугусса зунттал чувнал хасият дусса инсан ушиву. Мунияту бусравну икIайва цува зузисса коллективравугу, жяматравугу. Мунищала архIал Миккулат ия цалва кулпатрал ва оьрчIал ххаллилсса ласгу, ппугу.
Миккулат ахиратрал шаврил хъуннасса кьурчIишиву кIидачIлай, жижара буллай буру кулпатрахь ТIагьиратлухь, арсурваврахь, душнихь, уссурваврахь, ссурваврахь, гъан-маччанахь цинявннахьвагу. Цал гьав нурданул дуцIиннав. Алжаннул къапурду тIивтIуну лякъиннав. Махънал оьрмурдай барачат бишиннав. Амин!
Хъурхърал жямат

————————————-

Уссил Сергейл аьпалун

Агь, аскисса цIуцIавуй,
Ххира уссицIа бувсса.
«Арс, аьзизсса арс!» — тIийнна,
АьтIий нину кьадиртсса.

Вила аьзизсса кулпат,
Уссай, щийн аманат бав?
Жавгьарду хьусса оьрчIру
ЖучIа ци тIий кьабитав?

Ина, зунттал хъачI куна,
Жула хьхьичIун увккукун,
Загьир шайва дакIурдий
Виясса пахру-ххара.

Леххавугу учинна,
Уссай, щала жяматрайн,
Ина кунмасса арсру
Гьарца къушлий хьуннав тIий.

Ялагу миннат банна
Ва щаллара дунъяллухь,
Уссурваврал Кьини дан
Ссурвал батIира куну.
Дайганат, ш.Ккул

——————————————

Бавай, багъишла ити!
Ниттил Сабиратлул аьпалун
Гьич ттун хъамакъаритай,
Бавай, ттулла оьрчIшиву.
Гьунарду бувайссар тIий,
Дайсса авлия къеллу.

Бавай, хъамакъабитай
Вил цIимилийсса яру,
Кувни нава сававну
Хъювуссул буклакисса.

Бавай, багъишла ити
Дард ххи дурсса вила оьрчI:
ДакI дур, дакIнийн багьтари,
Ттиратти кьуцIу хъанай.

Къавхьунни, сагъну дуна,
Багъишла ити учин,
Гьич пикри бакъассия
ВицIа хьуну личIансса.

Бавай, на вил бивкIулийн
Вих хьун хъанай акъара.
Гьарца бивзсса шаттирах
На вих луглайна ура.

Дукра къадукавияв,
Ккашилна ацIавияв,
Так вил ххира кьаркьала
Ттула чIарав дуния.

Мякьнугу ацIавияв,
Кьакьари кьакьаннинцIа,
Ми вил аьзизсса яру
Ялугьлай ттух бухьурча.

ХIатталлицIух лагара,
Вил гьаттайн икрам бара.
Бавай, ттул ххира бавай,
На бизар хъанай ура!
Вил арс Салман,
ш. Гьуйми

———————————————

ШАМИЛЛУЛ ДУШ ЧIИВИЕВА-АХIМАДОВА АМИНАТ
Май зурул 21-нний, нюжмар кьини, тIабиаьт тIутIайх дирчусса чIумал, оьрмулул 67 шинаву, хар-хавар бакъа ялун дирсса лавмартсса азардануща ххассал хьун къавхьуну, жуятува лавгунни ххаллилсса зунттал душ ЧIивиева-АхIмадова Аминат Шамиллул душ.
Аминат хьхьичIва зий би­кIай­ссия Гъумук пионертурал къатлул директорну. Хъинну цилла даву, оьрчIру ххирасса бикIайва, минная хъуниминнан вихшаласса ник тарбия дуллай, хъунмасса захIмат бувссия Аминатлул. Лайкьсса захIматраха лар­хьхьусса бахшишругу ласай­ссия республикалий.
Яла кулпатращал ялапар хъанай буссия Къазахъисттаннай, Узень шагьрулий, школалий учительницану зий, коллективравугу хъинну бусраврай.
Арс чIивину уна ласгу ив­кIуну, цилалу хъуна увну, дуккингу увну, кулпатгу бувссия арснан. Цила душ кунмасса арснал щарниятугу, цила арснал оьрчIаятугу хъинну ххарину, рязийну бикIайва. Цибанссар, Аминатлул кьадар захIматсса хьунни.
Цинма ххирасса арснал оьрчI­ругу ххирасса мяммал дадах луглай кьабивтун, уссур-ссуннал дакIругу гъюжу дуккан дурну, цинма ххирами ва цуппа ххирамигу микIлачIун бувну кьабивтун, лавгунни Аминат ахират­равун. Лажиндараву пиш чан къашайсса, дакI-аьмал ххуйсса, халкьуннан хъинбаларду буллан дунияллийн бувксса, цила лагма-ялттунал дакIру ххари дуллали­сса инсан бия Аминат.
Аминатлущал ца классраву дуклай бивкIсса оьрчIал ва душварал чулуха хъуннасса кьурчIишиву кIидачIлай, жижара буллай буру арс Русланнухь, мунал кулпат Сагибатлухь, уссу Мяммихь, мунал кулпатрахь, ссу Нафисатлухь, уссил арсурваврахь, миннал кулпатирттахь ва махъсса гъан-маччацириннахь. Я раппий, я Аллагь, цил рухI кук­луний дишиннав, гьав нурданул дуцIиннав. Цин Пирдавс-Алжан нясив баннав!
Аминатлун къабуллусса оьр­му арснан, арснал оьрчIан, кулпатран, махъсса циняв уссур-ссуннан булуннав. Амин!
Бадиулжамал Мусиева,
Аминат ххираминнал цинявннал, чIунархIалминнал цIанияту