Ххувшаврил юбилейрацIун дархIуну уттинин дурсса ва дуллалисса давуртту лап ххуйри. Вана уттигу, юбилей кIицI дурну махъгу, мукунсса давуртту дацIан дитан къабучIир. Укун дуван лайкьсса, чара бакъа дувансса, ттулва пикрилий, даву дур та дяъвилуву жанну харж дурминнансса Аьпалул Лу сакин баву, чIири-хъун къакуну, гьарца шяраваллин.

Бюхъай учин, буссархха хьхьичIва бувсса аьмсса, гьарца шяравалливаминнал сияхIгу дусса, куну. ТIайлар, цила чIумал, дурагу къадуваяр, ва давугу ххуйя, бучIия. Амма ва даву хъамаличунал чу щинайн биян байни кунна, багьандаран кунна, хъап-шаплий, къадунни къачин дурсса даву дия чивияв. Цанчирча, му луттиравун, хъирив лавну, циняв лавсун бакъая, чIявусса бия «цал ппу», «цал уссу», «пулан, пустан» чивчуну акъая тIий, хъинну рязи бакъассагу. Яни чIявусса мивун къабагьну бия. ЧIявуссаннал фамилиярду, цавайннал цIарду тIайлану чирчуну дакъая. Кунналгу чулий цIарду чирчуну дия. Цикссагу бия цумур военкоматрая увцуну ивкIссарив, чув накьлу хьуссарив, чув увччуну уссарив тIайлану къачивчусса.
Дия цаймигу чIярусса диялдакъашивуртту. Масала, Ккуллал шярава му лу­ттирай цIардурагу дакъая уссурвал Аккуев АьвдурахIиннул ва Базал. Ягу Кьурбанов ЦIаххуй «Оьмаргаджиев» тIий чичаврищал, Ккуллал райвоенкоматрал аьрайн увцушиврий ур, учитель хъанай, институт къуртал буллай уну, МахIачкъалалия увцуну уна. Укуна Оьмаров Жамалуттин, Оьмаров Мусалав МахIачкъалалия бувцуну буна, Ккуллал райвоенкоматрал бувцушиврий бур. Мукунма цаймигу кIанттурду бия щаллу бакъасса. ЧIявуссаннал цIарду даччан дурну ягу чулий цIарду чирчуну дия (Аьллаев Кьуби, АхIмадов Разу, Акаев Ака, Базаев Разу ва чIявусса цаймигу). Хъиннува чIявусса бур бакIрачIан бувкIмур тIайлану къачивчуну, бигьанма «Без вести пропал» куну чивчусса.
Утти тания шихуннай цикссагу шинну ларгунни. Хъирив лаллай, чIявуссаннал бакIрачIан бувкIмур кIул бувсса, гьа­тардийн гъан-маччами лавгссагу хьунни, кказитирттай куннал дурсса къучагъшивурттаягу чивчунни. На нарагума цикссаннаягу очеркру чичав, кIул бував «ятIа-тIар бакъа бат хьусса» таманссаннал бакIрачIан бувкIмур. Ванийн бувну къулайну хьунссия гьарца шярава та дяъвилуву гьуртту хьуминнал, ливтIуминнал сияхIру, миннал суратру цачIун даврищал гьарцанная бюхъайссаксса гьарта-гьарзану чивчусса Аьпалул луттирду итабакьирча.
Вайннавухва захIматрал фронтрай гьуртту хьуминная ва гилува ливтIуминнаягу чичирча хъина. «Шяравалу фронтран» тIисса макьалагу къулайну хьунссия. Ва агьамсса давринсса харжлугъран ацIра-кьура къуруш къадулунсса къаикIанссар. Ягу хьунхьуви спонсоршиву данссагу.
Ва дувансса давугу цIанакул жуннанияр ялун нанисса никиранни аьркинсса.
На нарагу хIадур дуллайна ура Ккуллал шяраваминнаясса Аьпалул луттирансса материаллу. Укунма махъсса, на кунмамигу, ва агьамсса давривух хIала буххан ва бюхъайсса ка-кумаг бан аьркинни. Ца ялагу, гьарца къатлуваминнал, хаснува дук­лаки оьрчIал, студентътурал, цалва гъан-маччаная, кIулминная чичирча, аьркинмур цачIун дурну, дулурчагума, хъуннасса даву хьунссия. Ванийну та дяъвилуву Ватандалухлу талай бивкIминнал, хаснува жан дуллуминнал, рухIру ххари хьунссия.
Нани сакин баннуча гьарца шяраваллил, райондалул Аьпалул лу!
Гьарун ХIасанов