Гьашину щалагу билаятрай бюхттулсса даражалий кIицI дунни Ххувшаврил байран. Жулва «Илчи» кказитрайгу чивчунни чIявусса ветерантурая, миннал оьрчIая. Ттунгу дакIнийн багьунни ттулла чIаххувщар ва дус, нину куннасса АтIа-бавая ца-кIива махъ чичин.

АтIа (наштIи-АтIа учайва), цил бунагьирттал аьпа бан, иминсса, дакI-аьмал ххуйсса инсан дия. На нава Ххувшаврищал бувсса бунугу,ттун ттулва гъан-маччасса, чIахху-чIаравсса ятин оьрчIал оьрму, ссуссукьусса ахIвал чIалан бикIайва ттунна хъис дунугу кIулши хьусса чIумал.Яла, махъ, хъуниминнаяту баяйва АтIал цилагу 2 арс дяъвилияту зана къавхьуссар тIий. Га цаннал 4 ятин ливчIун бия. Гаманал, жагьилсса жалин щарсса дакъасса, оьрчIза бакъая.
АтIа-бава, арсналми ятинтал кьабивтун, цила ужагъраяту дуркIун дия душнилмур кюрттарайн. Вайннал бутта дяъвилия зана къашаврицIун, нинугу, сакъат хьуну, дунияллия ларгун дия. Гайннал оьрчI ва душ – Пайнусат ва Мямма, АтIа-бавал хъуни бувна чIивисса цила маэшатрай. Шаппа оьл бия, чан-кьансса, вайминнавухсса, кумаг хIукуматралгу байва. Яла ка-кумаг буванссагу акъая, инсантурал цалла-цалла къушливугу мискиншиву дия.
АтIахъал чIаравва вайннал ссурахъал, буттауссил душру Разият ва Узлипат (аьпа баннав цал), бия. Вайнналгу ппу дяъвилияту зана къавхьуна, нину, чил шяравату эшкьи-ччаврий бувцусса ххуй ХIуриягу, ппу зана хьуннинма бивкIуну бия. Яла жул махъми къат­раву буссия Имаша тIисса душгу, ванил нину Бахугу. Вай ххюягу жун маччасса, ттул буттал ниттил Завлишаннул ссурваврал оьрчIал оьрчIруя.
АтIа-бава цурда илтIасса, лахъсса чурх бусса щарсса дия. Гъин­ттул чIумал я цала ягу колхозрал даврийн занай шаппа къабацIайва. ЧIивисса нагу, къари хьусса АтIагу дусталъяв, щинавгу, урттийнгу архIал лагайссияв.
Ялтту арнил гьанав цавай хъуни бугъри бикIайва бавхIуну, га цала лагмасса кIанугу бивххун, ппарт­ран бувну. Тай къабивми зума-къирагъраяту къеп-шеп тIий, жугу чантайрттавун маша бувну, зана шайссияв. Мукун гьарца кьини. Жухь къурайзулгу цикIуй къаучайва. АтIа-бава цила захIматсса оьрчIнийсса оьрмулиягу буслан дикIайва. Хъунмасса Аккухъал агьулданиясса дия ва. Иниярагу лахъан духьунссия, цув 13 шинаву щар дуллунавтIар ца мадарасса уздантураясса жагьилнан. Яла ци оьрму бухьунссия ванил.
На навагу буттал ниттичIа ЗавлишаннучIава хъунма хьуссара. Ванил ттису-кьукьу дувайва вай цинявгу ятинтуран, цищара шай­сса аякьа дувайва. Яла цамур ци банссия. Та чIумал дяъвилул щатIи къабивщусса акъахьунссия шяраву цукIуй. Цалла 17 шинаву, дахьа педучилищагу къуртал бувну увкIсса оьрчI хушрай дяъвилийн лавгун зана къавхьуна. Ганахгу, ссил кIия-кIия зана къавхьусса арсурваврахгу аьтIийнна, зума тIийнна, чIивисса нагу аьтIи бувна, дикIайва. Утти тай ятинтураяту ххуйсса инсантал хьунни. Цалва-цалва кулпатру, оьрчIал оьрчIру, гайннал оьрчIру бур. Так ца Узлипат ларгмур шинал дунияллияту лавгунни.
ЗахIматсса, кьянатсса дия дяъви къуртал хьуну махъсса шиннугу. ХIукуматрал зана хьуминнан, ветерантурал кулпатирттан шайсса кумагру буллайнма бур. Амма тай дяъвилул оьрчIан, зана къавхьуминнал нитти-буттан цикIуй къабунни. Му масъала гьаз буллай айивхьуна ца политик, амма, бивчIан бивтун, къулагъас къадурнуккар. Вай олигархтурал дюкьланмур чан хьун ххивав ва байрандалийннагу чан-кьансса, дакIний личIансса бахшишза дуварча.
Уттиния нину-буттахъул ливчIунвагу бакъар, так оьрчIру бур.
ЧIири-хъунсса къулагъас миннах дуварча къабучIиссарив.
М. Р. Оьмариева,
пенсионерка, захIматрал ветеран,
ш. Ккул
ХIадур бувссар Андриана Аьбдуллаевал