Лакрал миллатгу ххирасса, миллатрангу хъиннува ххирасса, Дагъусттаннал Халкьуннал артистка Лариса ХIажиевал ташу дакIнийхтуну барча буллай буру жугу.
ПатIимат Рамазанова
Ччарча ящунал ябацIанну бакI-чурххал бювхъусса, ччарча гьунар бусса, ччарчагу аькьлу бусса, гьаннайсса, гьар чулуха яргсса душ бур жулва Лариса. Яла ххуйма, язима чувнал хъаралу лайкьсса бур. Мукунсса чув ухьунссар тIисса умуд бур Ларисал гьалмагъай, ЧIурттащиял шяравасса Назар Давыдов. Ччаврил Аллагьнал зул ядурцсса дакIру цIакьну, оьрмулухун арх къадуцанну дазиннав, Назар ва Ларисай!
Пагьму-гьунар бусса балайчи бушивруцIун, Лариса бур гьунарданун кьимат бищунгу кIулсса, ппухълунная бивсса ца ххазина – аслийсса лакку балай ябангу, гьаз бангу чялиш бувкнувасса ва мукунминнал кьадругу кIулсса инсан. Шиккува кIицI лаган ччива Ларисаву ттунна яла ххуй дизаймур ва хьхьичIунмур хасият душиву иш багьний кьянкьану миллатрахлу буккайсса, сивсуну ва аьнтну махъ учайсса, миллатрал цIаний хIатта цIаравунгума ххяххан хIадурсса бушивугу.
ДакIний бурив Редукторный поселокрайсса шагьраххуллуцIсса чIирай вирттаврал суратру дусса баннерду лахъайхту, Совет Союзрал кIийла Виричу АхIмад-Хан Султаннул суратрай ца ЦIуку бакъа къалякъайхту, Ларисал интернетраву му иширал ялув цуксса бакIцIуцIаву дурссарив? Ва анжагъ ца мисалли. Миллатрай дакIцIуцIаву дума мудан ххиранугу, бусравнугу уссар миллатран. Мунияту Лариса Санкт-Петербурграйн щар хьушиврул хавар баяйхту,мунил балайрду ххирасса чIявусса инсантуращал нагу дакI хъякуну бивкIра, Ларисал сахIна кьабитайривав тIий. Ларисал бувсунни цуппа цукунчIав сахIна кьабитан дакIний бакъашиву ва мукунсса ихтияр цихьра дакъашиву. «Ттул дакIнил кьамул къабанссар ттулва балайрду ххирасса, ттуйнна вихшала дусса инсантал балайрдая махIрум бувну кьабитан, ттул дакIниву мудангу цIакьну бивкIссар ва буссар ттулва миллатран хайрмуниха, миллатрал цIа-кьини гьаз данмуниха зун аьркинссара тIисса пикри, ттулва биялалиймур мукьахунмайгу буллалавугу ттуйвасса буржну ккалли буллай бура», — увкунни Ларисал. Ца талихI Ларисал оьрмулул гьалмахчу Назаргу мунил пагьму-гьунарданул кьимат куртIну кIулсса, Лариса щалвагу миллатрал рувхIанийсса ирс-ххазина бушиву бувчIусса инсан ушиву! Мукуннийри учайсса «тIайлану тIайла бавцIуну бур, бакьинну бакIрайн багьну бур» кунугу!
[tube]http://www.youtube.com/watch?v=HUSOhFP9p58[/tube]
Ччаврилгу, балайрдалгу буччиннинсса, щалихханнинсса оьрму булуннав зун. ЯлугьлантIиссару жу вил цIусса балайрдах, Ларисай, муданма кунма мякьнува. ЯлугьлантIиссару жува хIайран бувантIишиврул умуд куртIгу, цIакьгу хьуну жулла дакIурдиву.
