Вай гьантрай Санкт-Петербурглив «Магнит» тIисса супермаркетраву Ленинградуллал блокадалуву бивкIсса 81 шинавусса хъамитайпалущал хьумур гьарнал зума-ккарччулу бия. Ттучандалул зузалтрал, ванил 2-3 нагьлил пачка бавцунни тIий, полициялул отделениялийн оьвкуну бур.
Леххаврий бувкIсса полициялул зузалтрал бувцуну бур «тахсир хьусса» Рауза Галимова Кронштадский райондалул полициялул отделениялийн Дежурный частьрай пенсионерка хIал бакъа хьуну, «Анаварсса кумаграйн» оьвкуну бур. ЦичIав кумаг бан къавхьуну му къуртал хьуну бур.
Ва иш чIявучин асар хьуну бия. Асар хьунни ттунгу. Ленинградуллал блокада дурхIусса пукьара цуппагу дунияллия лавгунни. Ленинград шалклува буккан бувну 71 шин бартларгун нюжмар хьусса гьантрай.
КъаливчIунни, къабивтунни Рауза Ххувшаврил юбилейрайннин. ДакIниву тIааьн бакъасса, сси-къащи дуллалисса асарду кьабивтунни ва иширал. Акъару жува цаягу лагма-ялтту, чIахху-чIарах бугьарасса инсантал бакъасса. КIулли бугьарасса инсантал, Раузал оьрмулувун бияннинссагума, гьанавиххину, зат хъамабитлати хьуну бикIайшиву, цал-цал цанма цивппа ци дуллалиссарив къакIулну, мюрщи оьрчIру кунма занакьулу бикIлан бикIайшиву. «Жители блокадного Ленинграда» тIисса Кронштадский отделениялул председатель Эмма Лешина бур Галимовал мукунсса тIул даншиврийн къавихра, мунил ххуйсса пенсия буссия, цила ларсмуних багьа булунсса каши дакъа бакъассия тIий.
— Жул пикрилий, Галимован ми хъамаливчIхьунссия. Яла цуппа полициялул отделениялийн бувцукун, хьумур лалавсун, му бухIан къавхьуну бивкIухьунссар, — тIий бур Лешина журналистурахь.
Къавихра нагу. Къавихра 300 къурушран бацIлацIисса ца-кIива нагьлил пачка мунил кьюлтI баншиврий. КьюлтI бувну бивкIхьурчагума, лажинни 300 къурушрал цIаний оьрмулул 81 шинавусса хъамитайпа, бикIувча блокада къадурхIусса, полициялул отделениялийн буцин аьркинссияв. Жагьилсса оьрмулувусса ттучандалул зузала, хъисрагу нач дакъа, хъисвагу пашман къавхьуну, цуппа инструкциялийн бувну зий бивкIшиву буслай бур. Ччива ттун щил-бунугу бувчIин бувну мунин так инструкциярттай оьрму бутан къашайшиву, оьрмулуву, ттучандалулсса дакъасса, духIи-дуциндарал, мяърипатрал инструкциярттугу дикIайшиву. Миннулгу жуятура ссавур, хъунанахсса хIурмат, угьаранахсса аякьа тIалав дуллалишиву. Цала бавахъал (къаниттихъал, бабушкахъал) оьрмулувусса хъамитайпа отделениялийн бувцуну лавгсса ихтиярду дуруччай органнал зузалтрая на гъалгъатIийвагу бакъара. Гьаксса дурурччуну дур миннал ттучандалул ихтиярду, хъуннасса хъус дарцусса хъамитайпа бувгьуну. Наварив ва хавар баяйхту учав: «Дагъусттаннай укунсса тIул щилчIав къадантIиссия», — куну. Бюхъай ттущал къарязисса, на тIутIимуницIун къабакьлакьиссагу буккан. Бюхъай ца-цасса, ас-намус бакъасса жучIавагу бикIан. ДакI дарцIуну бура чIявуми дагъусттанлувтурал мукунсса тIул къаданшиврий. Аьрасатнал агьулданун цуксса вахIшиталну, зулмучиталну жува чIаларчагу ягу чIалачIи булларчагу, чумартшиву, дугъришиву, узданшиву жула халкьуннал хьхьичIунми хасиятру дур. Ас-намус, мяърипат дусса жагьилталгу Дагъусттаннай цикссагу ххишаласса бур.
Ттула пикрилий, къадулунссия дагъусттан душнил хъуннар хьусса къари милицанайн. Дуцлай бухьурчагума, ганихлу махъ бусанссия. Къадуцинссия нагьлил къурши (пачка) бавцусса къари отделениялийн жула полицалтралгу. Бюхъайссар къарил нагьлихсса багьагума цала булун.
Нава цимилагу бара хьуссара жула чиваркIунналгу, хъаннилгу чумартсса, уздансса тIуллал. ДакIнийн багьунни цIана танийва хьусса ца иш. Маршруткартту бакъасса, автобусру заназисса чIун дия. Шагьрулия шяравун най бура. Автобус сукку тIун бикIайхту, ца къужа увххун, шупIирначIан кьус ивкIун, лагьну тавакъю бунни: «Арцу дакъар, бучIиссарив уххан, чув-дунугу къис дурну ачиннача», — куну.
— Инсантал ялугьи мабуллардача, анаварну укку, — увкунни арцу дакъа пассажирная къарязисса шупIирнал.
Му ихтилат бавсса жагьилсса адаминал увкунни:
— На дулуннача мунахлу арцу, ити уххан, — куну.
Цува ивзун, га къужагу цала кIанай щяивтунни. Мийра шиннардий хьусса ца-цамургу иш. ОьрчIал багъраву зузисса ттул ссу бувкIунни даврия нину-ппу хъирив къабувкIсса чIивитIугу цищала увцуну.
КIюрххил цила смена дакъа му ттухь иян ува увкунни садикрайн. Остановкалийн бучIайхту, чIивитIу къистта хьунни таксилий гьанну тIий.
Студенткасса нагу таксилух арцу дуллан къаччай, цIана троллейбус бучIантIиссар тIий маз-кьаз бихьлай бура. ЧIивитIурив такси, такси тIий рурцуну ур.
Жуяту арх акъа авцIусса кIулагу акъасса адиминал бацIан бувна такси. Циванни къагьан таксилий ванан ччай бухьувкун, — куну, чIивитIул бакIрайх кахгу куну, арцугу дуллуну жу таксилий тIайла бувккунав. Жува аьй-бювкьурду дулларчагу, жулва жагьилтуравугу цикссагу бур мяърипатрал бувччусса, адав-инсап дусса. Цимилагу ккаккай маршруткарттавугума хъунанал лувату бизлазисса оьрчIру-душру. ЧIявучин кIулссар, Аьрасатнал шагьрурдай жяматийсса транспортрай дарчIагьирай ччаннай бавцIусса къари-къужрал лувату къабизайссар жагьилтал! Ва пашмансса иш цуппагу хьунни дакI-аьмал ххуйсса, хъинсса агьлу буссар тIисса Санкт-Петербурглив, цуппагу щалагу билаятрай Ххувшаврил юбилей хьунадакьин хIадур хъанахъисса чIумал.
Жува буру ялун нанисса никиран тIайласса тарбия дулаврия гъалгъа тIий.
Укунсса ишру эбратран ккаккан буллайрив?
