Ларгсса нюжмар кьини ЦIуссалакрал райондалул бакIчи ХIажи Айдиевлул кьамул бунни райондалул агьали. Аьдатравун багьсса куццуй, райондалул хъунаманал гьарица нюжмар кьини администрациялул къатраву хьхьичIра дурсса сияхIрайн бувну кьамул буллалиссар цала-цала масъаларттащал бувкIсса райондалул агьали. Ва хьунабакьаврий гьуртту хьунни ДР-лул Халкьуннал Мажлисрал депутат Зайнулла Мирзоевгу.
Ва кьини бувкIсса цинявппа инсантал кьамулгу бувну, миннал масъаларттал хIакъиравусса бувчIинбавуртту дунни райондалул бакIчинал. Райондалул хъунаманачIан агьали букIлай бур личIи-личIисса масъаларттащал. Амма чIявуми масъалартту цIусса миналийн бизаврицIун бавхIусса бур. Бур муни-танин ишла дувансса аьрщарал парча булара, даврий бацIан кумаг бувара тIисса тавакъюращал бувкIссагу.
Ва кьини райондалул бакIчинал кьамул унни 13 инсан. Цаппарасса масъаларттал хIакъираву ХIажи Айдиевлул гава цIана хIукму бунни. Гайми мукунсса масъалартталсса буллалисса администрациялул зузалтрачIан тIайла бунни.
