МАХIАММАДАЛ АРС
БАКРИЕВ БАКРИ
Январь зурул 25-нний бухIан, лялиян бан захIматсса, кIулбакъа бала ялун бивунни 1-мур ЦIувкIратусса Бакрихъал МахIаммадал ва Чапаевкалиясса ХIажиаьлихъал Асватлул ужагърайн – Москавлий аьрали бурж биттур буллалисса ца акъа-акъасса арснан Бакрин оьзру хьуну, ватандалий уччин лавсун бувкIунни.
1-мур ЦIувкIрав увсса Бакри дуккавриву итххявхсса, хьхьичIунсса жагьил уссия. ЧIярусса грамотардащал 2010 шинал 9 классгу къуртал бувну, Москавуллал областьрайсса Тучковский автотранспортный колледжравун дуклан увхссия. Школалий марцIну ххювардай дуклай, райондалул олимпиадарттай хьхьичIунсса кIанттурду бугьлай аьдатсса Бакрил му колледжгу ЯтIул дипломращал къуртал бувссия. Муния махъ дуклан увхссия Москавуллал машиностроительный институтравун, миккугу марцIну ххювардай дуклай уссия. Ноябрь зуруйя Бакри армиялийн увцуссагу. Август зурул 23-нний мунан 20 шин хьунтIиссия.
Азарийлагу хIайп!
Дуккаврил пагьму-гьунар бусса, бакI-чурххал оьвхъусса, гъан-маччацириннал ва шяраваллил жяматрал вихшала цIакь дуллалисса жагьилнал кьадарданул аьсившиву, кьурчIишиву! Бакриевхъал, Рамазановхъал кулпатру МахIачкъалалив мусиватсса терактрал ххутIахьхьун иривну ххассал къавхьусса, бакI-чурххал ххуйсса, оьвхъусса, давриву итххявхсса ТIажиблул бивкIулий аьтIий, цайнма цивппавагу бучIан бувассия. Утти лавмартсса бивкIулул, рахIму къабувну, хъап кунни Бакрийнгу.
Мунал аьсивсса бивкIулул кьурчIишиву кIидачIлай, жижара буллай буру Бакрихъал МахIаммадахь ва Асватлухь, ссурваврахь, щалвагу Бакриевхъал тухумрахь, ТIажиблул ва Кубралул наслулухь, цинявгу гъан-маччацириннахь.
Алжаннул ххари уваннав Бакри! Гьаттай нур дизаннав!
1-мур ЦIувкIуллал жямат
——————————————-
Загьирбаглул душ КIУРУХХЪАЛ ПАТIИМАТ
Вай гьантрай, захIматсса азарданущал хъунмасса хIаллай талайгу бивкIун, оьрмулул 52 шинаву ахиратрал хьунни Вихьуллал шяравасса КIуруххъал ПатIимат Загьирбаглул душ. Лавгунни дунияллия ххаллилсса инсан, дакI хъинсса нину, аякьа ххисса кулпат, хасият иминсса, чаннасса, гьарнащал хIал бавкьусса хъамитайпа.
Загьирбаглул душ ПатIимат бувссар Вихьуллал шяраву 1962 шинал, Загьирбаглул ва Хъунна-ПатIиматлул кулпатраву. ПатIимат школданийн лавгун цаппара шиннардива ванил кулпат бивзссар Къизлардал райондалийсса Бирдихин тIисса шяравун. Гикку къуртал бувссар ПатIиматлул школагу. Вихьуллал шяраватусса КIуруххъал Аьлиханнун щар хьуну махъ ПатIимат цила ласнащал яхъанай буссия Къизлардал райондалийсса Рыбалко тIисса шяраву.
Хъунисса къуллугъирттайнгу лавхъун, лахъисса наградартту къаласурчагу ПатIиматлул дуван багьсса давуртту хъинну кIанин дуртун, цилва лагмами рязи хьунну дайва, ва бия аьчухсса, гьарнащал хIал бавкьусса, бусса кIану ххуй байсса, дакI хъинсса инсан. Пиш тачIав зумату чан къашайва ПатIиматлул.
Аьлиханнулгу, ПатIиматлулгу, ххаллилсса тарбиягу дуллуну, дуккингу, ташурдалгу бувну, оьрмулул ххуллийн бивчунни кIия арс Шарап ва Аьзизгу, душ ПатIимагу. Карав буцин кьисмат хьунни ПатIиматлун арснал ва душнил оьрчIругу. ЗахIматсса азар ялун лирчуну махъгу ПатIиматлул, яхI кьацIул бувгьуну, хъару экьи къадирчуну, дайдирхьуна ганищал баранбалсса талатаву. ЧIалачIи бувна цуппа цуксса дакI кьянкьасса, чувшиву дусса хъамитайпа буссарив. Махъра-махъсса ссят дучIаннин ганил хьхьара къадурна, кьянкьану талай рухI дуллуна. Цибанссар, Аллагьнал чичрулун чаран къабикIай, хIайп тIурча бакъасса, пашман хьурча бакъасса, жущава цичIав бан къашай.
Ласнахь Аьлиханнухь, арсурваврахь Шараплухь ва Аьзизлухь, душнихь ПатIимахь жижара буллай, жу дуаьлий буссару хъунасса Заннайн, ПатIиматлул рухI хъинний дишиннав, бунагьирттал аьпа баннав, гьав нурданул дуцIиннав, Алжаннул агьлу баннав тIий. Амин!
Вихьуллал жямат
——————————————————
ИДРИСЛУЛ АРС МУСАЕВ МУСА
Февраль зурул цалчинсса кьини хархавар бакъасса, вих хьун захIматсса хавар бавунни оьрмулуву зирангнувасса, бити-тирх бусса, ххишала акъа тIайлашиву ххирасса, тIайласса ххуллийх цувагу нанисса, цалва кулпат, гъан-маччамигу буцлацисса кьянкьасса зунтталчу, яхI-намус, къирият уздансса инсан, дустурал ххаллилсса дус, дусшиву ядангу, дуруччингу кIулсса чув, даврил мухIлу-хIин кIулсса, даймуниву усттаршиву дусса минахур, КIямашрал шяраваллия ва агьлу-жяматрал тарих-таварихрая чивчусса луттирал автор Мусаев Муса Идрислул арс дунияллия лавгссар тIисса.
Муса увссар 1936 шинал КIямашрал шяраву Идрислул ва Нурижатлул хъунбакъасса кулпатраву. ГьунчIукьатIув школагу къуртал бувну, увкIун МахIачкъалалив, зун увхссар Бондарный заводрайн. Миккугу, Мурманск шагьрулийгу зий ивкIссар тамансса хIаллай. Цанма чан-кьансса даврил стажгу бувну, лавгссар Калининградрайсса мореходный училищалуву дуклан. Мугу бувккуну, зун тIайла увкссар Калининградуллал хьхьирил жамилий зун. 1961 шиная 1975 шинайн ияннин микку зий ивкIссар. Анжилийн увкIун махъ «Дагрыбпромрай» зий ивкIссар. Дуссия ванан дуллуну «РСФСР-данул чавахъирттал промышленностьрал ветеран» тIисса цIагу. Дуллуну дур ванан диялсса бахшишру ва барчаллагьрал чагъардугу. Чув, ци даврий зурчагу Мусал хIурмат хъунмая архIал зузиминначIа, дус-ихтивартурачIа, ва ххирасса шяраваллил жяматрачIа. Ина жун мудангу ххиранува, дакIнийнува икIантIиссара ниттиуссу Муса, буттауссу Муса!!!
Буттал шяравалу ххирасса Мусал биялсса захIматгу бивхьуну, къакIулмургу хъуниминнахь цIухлай кIул бувну, биялсса лавгзаманнул тарихгу ххилтIу бувну, буккан бувссар КIямашрал тарихрая, жяматрал бакIрачIан бувкIмуния чивчусса лу. Му луттираву чивчумургу хъанахъиссар шяравалу чIярусса шиннардий уттарану личIавринсса барашинна, цимирагу никирай цалла шяраваллия ххина-ккина кIулну бикIансса. Му ххаллилсса ссайгъатгу кьабивтссар, цалва захIматрай, хIакьлий басмаханалий лугу буккан бувну кIямашран Мусаев Муса Идрислул арснал. Ва луттирансса кьимат чIумулли бищунтIисса.
Мусаев Муса аьпалухьхьун лагаврил кьурчIишивугу кIидачIлай, жижара буллай буру кулпатрахь ПатIиматлухь, арснахь Идрислухь, арснал оьрчIахь Аьбдурашидлухь ва Сабинахь, арснал щар Бадрижатлухь, ссихь Жавагьихь, уссихь Орджоникидзехь, минная бивзминнахь ва щалвагу Мусахъал агьлу-тухундалухь. Махънал оьрмурдай барачат бишиннав, дард-буруккин яла лавгсса тирххандарайсса оьрму Заннал нясив баннав зул ужагърайцириннан, Мусагу, Мусал агьлу-авладгу ххиранан.
Мусал гьав нурданул дуцIиннав, Алжаннул ххари аннав, рухI бигьаний, чурх кIукIлуний хьуннав. Амин.
КIямашрал
ва ГьунчIукьатIрал жямат,
дустал, кIулми
——————————————————
МУХIУТТИННУЛ АРС АГЪАЕВ МАКЬСУД
Январь зурул 29-нний, оьрмулул 80 шинаву, аьпалухьхьун лавгунни ххаллилсса зунтталчу, гьунар бусса педагог, хъинсса хасиятралгу, дугърисса тIуллалгу заллу, Къяннал шяравасса Агъаев Макьсуд МухIуттиннул арс.
Макьсуд увну ур Къяннал шяраву 1934 шинал мартрал 22-нний, щаллагу Ккуллал райондалий бусравсса МухIуттиннул ва ПатIиматлул кулпатраву. Шяраву 7-мур класс, Гъумук дянивмур даражалул школагу къуртал бувну, 1953 шинал дуклан увххун ур Дагъусттаннал педагогический институтрал физико-математический факультетрайн. 1957 шинал институтгу къуртал бувну, зий ивкIун ур Вихьуллал дянивмур даражалул школалий, 1963-1980 шиннардий – Къяннал 8 класс бусса школалий. 1980-ку шинал Макьсудлун ва мунал кулпатран гьан багьну бур, цала къашавайсса арсгу увцуну, Туркманнавусса Байран-Аьли тIисса шагьрулийн. Ца шин дурну дур Макьсудлул ва шагьрулул 1-мур школалий математикну зий. 1981 шинал Макьсуд ивзссар цалва кулпатращал Каспийскалийн. Зий уссия оьрчIал колониялий, 6-мур ва 7-мур школардай пенсиялийн укканцIа математикалул дарсру дихьлай.
Макьсуд ия цалла даву лавайсса даражалий кIулсса пишакар, оьрчIругу ххирасса, гайннал хасиятгу кIулсса тарбиячи. Дуккаврил ва тарбиялул давриву хьун дурсса ккаккиярттахлу Макьсуд лайкь хьуссар чIярусса бахшиширттан. Миннувугу яла хъунмур – МакьсудлучIансса ччаву муначIа дуклай бивкIминнал, мунал бусравшиву щалагу Къяннал жяматрачIа.
Хъярч-махсартту бусса, тIул-тIабиаьтрал авкьусса Макьсуд ххира шайва цал ухьурчагу ванащал хьунаавкьунан. Макьсудлул цалва кулпат Сонящал, ххуйсса тарбиягу дуллуну, хъуни бувну бур 3 арс ва 1 душ. Мигу, буттал цIа лайкьну дуручлачисса, ххаллилсса инсантал хьуну бур.
Макьсудлул бивкIулул кьурчIишивугу кIидачIлай, жижара буллай буру ванал кулпат Соняхь, арсурваврахь МухIуттиннухь, ХIадислухь ва Кимлухь, душнихь Марияннухь, уссихь Климлухь, оьрчIал оьрчIахь ва махъсса гъан-маччанахь. Цал гьав нурданул дуцIиннав, алжаннул ххари аннав. Махъминнал оьрмурдай барачат бишиннав.
Къяннал жямат
