КIулсса куццуй, ДР-лул Культуралул министерствалул Республикалул халкьуннал творчествалул къатлул «Самородки» выставкалул проектрал лагрулуву уттинингу хьуссар цимигу выставка. Февральданул 10-ннийгу МахIачкъалалив Р. ХIамзатовлул цIанийсса Миллатрал библиотекалуву хьунни му журалул ирглийсса выставка – «Поэзия цвета» цIанилусса.
Бадрижамал Аьлиева
Выставка хIадур дурну дия ДР-лул Культуралул министерствалул, ДР-лул Культуралул министерствалучIасса Республикалул Халкьуннал творчествалул къатлул, ДР-лул Жагьилтурал иширттал министерствалул ва Р. ХIамзатовлул цIанийсса Миллатрал библиотекалул гьурттушиврийну. Ва шинал ахирданийннин тIурча республикалий дуван тIий бур мукуннасса ацIуннийн дирсса выставка.
Цинярдагу 100-нния лирчусса сурат дия ва кьини ккаккиялун дирхьуну. «Поэзия цвета» выставкалувух гьуртту хьунни цIа дурксса ва цалчинсса шаттирду ласласисса художниктал.
ДР-лул культуралул министрнал хъиривмур, Республикалул Халкьуннал творчествалул къатлул директор Марита МухIадовал увкунни:
— Вай хъанахъиссар мяйжаннугу ляличIийсса инсантал, ва жува пахрулий буссару вайннал творчествалуцIун жувагу бавхIуну бушиврия. Гьаксса ччива укунсса усттартал гьарзасса буну. Барчаллагь вайннан цалла дакIнил аваданшиву цалва лагма-ялттуминнайх дачIин бюхъаврихлу. Му ляличIийссава гьунарди. ХIайп цалва бусса оьрмулий, мюрщи оьрчIаща кунна, цалла дакI тIитIин цинявннаща къашайсса. Мукунсса инсантурайн жува «самородки» тIий буру. Барчаллагь зун зулвагу, жулгу оьрмурдив яргсса, гъилисса рангирдал буцIин буллай бушиврухлу, — увкунни Марита Велихановнал.
Гихунмай ванил барчаллагь увкунни «Самородки» проект иширайну щаллу дуван цанма кумаг буллалиминнахь.
Ялагу махъру лавхъунни Дагъусттаннал паччахIлугърал изобразительный искусствардал П. ХIамзатовал цIанийсса музейрал директор СалихIат ХIамзатовал, Дагъусттаннал паччахIлугърал Тахо-Годил цIанийсса цачIун бувсса музейрал директор Тамерлан ХIажиевлул, ДР-лул Художниктурал союзрал председатель Кьурбанаьли МахIаммадовлул, искусствоведтал Татьяна Петенинал ва Мариян Чалабова-МахIаммадовал, художник Марат ХIажиевлул.
Выставкалувух гьуртту хьуми цинявппагу лайкь хьунни ДР-лул Культуралул министерствалул чулухасса дипломирттан.
Выставка дикIантIиссар февральданул 17-ннийн дияннин.
