Ва сурат ваниннин 54 шинал хьхьичI «Зунттал хъами» журналданул корреспондент П. Егорычевлул рирщусса дур. Суратрал лувсса чичрулийн бувну, суратрайми Ккуллал Гьарун Саэдовлул цIанийсса колхозрал 2-мур фермалул доярка­хъул бусса бур.

Вайннал цIарду цаппараннил дакъа чирчуну дакъар: ХIалима Кьурбанова, Гулистан КIарошова, Гульназ Аьлиева (вай циняв аьпалувух хьуну бур). Махъми бюхъайхха цанма-цанма бувчIин. Дянивсса адамина – колхозрал парткомрал секретарь, аьпа баннав цал, Рамазан ТIилиев ур, фермалул ризкьичитурахь агитация буллай.
Цалва ихтилатраву ва ур лавайсса пахрулий кIицI дуллай та чIумалсса республикалийгу хьхьичIунсса колхозрал захIматчитурал хьун дурсса ккаккиярттая. Масала, 1959 шинал колхозрал паччахIлугъран дарххунни: 354 т. ппалул, 573 т. накIлил, 109 т. дикIул. Колхозрал шинал доход 8 миллион къуруширттайн гьаз хьунни. КолхозрачIа бур 26 кьай духхай автомашина, 5 трактор, 2 хъу ттихIай комбайн ва цаймигу колхозниктурал захIмат бигьа бансса техника. Колхозрал харжирдацIух колхозниктурал оьрчIан цIуну бунни ясли-сад. Фермардайсса ризкьичитуран­сса къатри цIуну бангу личIи дурну дур 1,5 миллион къурушру арцул.
Шиккува парторг личIинура чIурчIав дуллай ур, шяраваллил агьалинал багьу-бизу, маэшат мархлуцIакул баххана хъанай, колхозраву цалла ляркъусса доход, шиная-шинайн гьаз хъанай, цивппа заллу­сса къатри цIудуккан дуллай, багъ-бахчардащалсса къатри цIуну буллай, къатраву радио-приемникру, мотоциклетру, автомашинардугу машан ласлай бур, тIий. Шиккува кIицI буллай ур бюхттулсса зунттал кIанай цIуну бувгьусса ахъулссаннул багъраву 1,5 гектарданийсса гьивчул мурхьирдая цалчин 70 ц. ларсунни, даэлийгу 20 га лухIитIутIул дургьуну дуссар, тIий.
Ттула чулуха шиккува бусан, ва фермалийсса ризкьичитурава республикалул Верховный Советрал депутатну бувчIуну буссия доярка Ххадижат Раджабова, муния махъ СССР-данул Верховный Советрал депутатъталну бувчIуну буссия цал – доярка ХIалима Кьурбанова, хъирив – фермалул бригадир Сяид ХIасанов, миннал хъирив бувчIуми къахIисавну. Ванийн бувну, къулайну хьунссия кIа суратрайсса жагьилсса (та чIумал) дояркахъал бакIрачIан ци бувкIссарив, цIанасса оьрмулия цивппа рязину буссарив, та чIумал щалла Союзрайхгума цIа машгьурсса миллионер колхозрая ци лирчIун дуссарив, му мукун шаврил савав ци хьуссарив, цIа дурксса ризкьичитурал шяраваллил сий цIунилгу гьаз даншиврул ци чаранну ккаккан багьлай буссарив чичирча.
КIа суратрайми лавайсса хIурматращал дакIнийн бичлай, Гьарун ХIасанов