Бакъахьунссар жулла лакрал мюрщи щархъаву Буттал КIанттул цIанийсса Хъунмасса дяъвилул щавщи биян къабувсса къатта. ХIисав дуллай, хъундакъасса жул ЧIяйннал шяраву гьарца ужагърайн, гьарца кулпатравун дяъви бувххун бур, язиминнацIа бувну бур кулпатру.

ЧIяйннал шяравасса ХIа­санхIусайнхъал Аьв­дул­лагьлул ва Уммуразиятлул хъунмасса къушлия дяъвилийн, душман ххит уккан ан, лавгун бур хъуними арсру Аьлил ва Сулайман. Хъунама арс Аьлил ятIа-тIар бакъаминнавух хIисав хъанай ур. Сулайманнун талихI хьуну бия дяъвилия ххувшавугу ларсун шавай зана хьун (угьара хьуну, накьлу хьуссар). Миннал кулпатраву ялагу миннаяр чIивисса ссу Ххадижат ва мунияр мюрщисса 4 уссу ялагу бивкIссар.
Колхозрал ятту Лаккуя арив куч буллай, аьвкъуну, къашавай хьуну ппу Аьвдуллагь ивкIуссар 1943-ку шинал. Къатлул щалла хъар дагьну дур ниттийн ва хъунмур ссийн Ххадижатлуйн. Дяъви байбивхьусса чIумал Ххадижатлун дурагу 14-15 шин диркIун дур. Душнил зирангшиву чIалай, шяраваллил ва колхозрал бакI дургьуминнал мунийн тапшур бувну бур шяравусса фермалийсса оьллу ва ницру. Фермалийсса ризкьилулссагу бувну, шаппа циярва мюрщими уссурвавралссагу бан чIун лякъайсса диркIун дур хъунмур ссил. Бавагу мудан душния рязину диркIун дур. Къурнил, ххалал чIумал, хьхьувай зурулух хIун лагай­ссияв тIий буслан дикIайва аьпа биву Уссуразият – жул ттаттал бава. Ххадижатгу хъанай бур жун буттарссу, дазу-зума дакъа ххирасса цинявннанмагу.
Та дяъвилийсса ххувшаврил кьини гъан дуллай зий бивкIссар къинттуллухмигу. Миннавух, гьай-гьай, буссар жул буттарссил бивхьусса захIматрал бутIагу. Фермалийгу, къурувгу зий, гьарцагу колхозрал давурттая ма­хъаллил къашайссияв тIий, буслан бикIай уттигу буттарссу. Цалгу, цинна ккаккан дурсса колхозрал хъу ттихIин шаппату бувккун нанисса нину ва душ, ниттин мюрщисса оьрчIалсса бан зана дикIан багьну бур. «Булу, ттул душ, мажал хьувкун дучIаннача», — куну бур ниттил. Нину дучIаннин хIуй булувкьуну, Ххадижатлул шанна дугьайсса хъу ахттая махънин къуртал дурну дур. Нину ялун дирну цIухлай диркIун дур, «Аман, бавал, вицIун цу уссия хъу ттихIлай», — тIий. Мукун давриву савсъсса, зий аьдат хьусса бия та чIумалсса душру. Ххадижатлул фермалийгу, къурувгу бихьлахьисса захIмат чIалай, мунин цимилвагу барчаллагь баян бувну бур тай дяъвилул шиннардийгу шяраваллил бакI дургьуминнал. Уссурвал бучIаннин ивкIусса буттахгу аьтIий, душманнайн­сса сситтул, зидлил, зий булувкьуну бикIайссияв чайва буттарссил. Мудан аьтIийнма бикIай дяъвилул цIарава зана къавхьусса уссих Аьлиллух. Сулайман тIима уссу дяъвилий унийгу танайн баян къабувссия учайва бутта ивкIусса, танал яхI къагъагъан. Так аьраяту шавай учIайхту, бутта чуври тIисса уссихьгу, ккурчIаври куну, аьтIаву дугьан къархьуну дур Ххадижатлуща.
Дяъвилия махъ буттарссил къуртал бувну бур шагьрулий машлул училище. Мугу къуртал бувну, жул буттарссил 35-хъул шин дурссар Каспийск шагьрулий продуктовый ттучандалий заведующийну зий.
Щар хьуссар шяраву махъ нанисса тухумрал оьрчIан – Лахъиаьлихъал МахIаммадлун, мунащал архIал хъунигу бувну, тарбия бувссар 4 оьрчI ва 1 душ. Аьпалувух ивхьунни ххирасса буттарссил ласгу. Хъунама арснал Анвардул бивкIулул дардгу духIан багьунни буттарссин, ливтIунни уссурвалгу.
Пенсиялийнгу танийва бувккун, цIанакул буттарссу ялапар хъанай бур Каспийск шагьрулий чIавама арсначIа ШамиллучIа.
Ххирасса буттарссуй! Жу даимангу икрам буллай буру ина бивхьусса захIматрал хьхьичI. Жу цинявппагу, вил уссурваврал кулпатру, вия пахрулий буру. ЧIа тIий буру вин цIуллушиву, иминсса, рахIатсса, чIярусса оьрмулул шинну, уттиния тиннайгу, талихI-тирхханну.
Цинявппагу гъан-маччанал цIания вил уссил арс
Арсен Аьбдуллаев