АЗДАРДУЛ АРС ШЯПИЕВ ШЯПИ
Уттигъанну, оьсса азаруннища ххассал хьун къавхьуну, ахиратравун лавгунни ххаллилсса зунтталчу, ЧIурттащиял шяравасса Аздардул арс Шяпиев Шяпи.
Шяпи увну ур 1951 шинал, шяраву бусравсса Аздардул ва Сарайл кулпатраву. Шяраву 8-мур класс, Гъумук дянивмур даражалул школагу къуртал бувну, гара шинал увхссар Буйнакскаллал кооператив техникумравун.
Къуртал байхту увхссар зун Лакрал райпорайн, цал общепитрал бухгалтерну, яла ревизорну. Зий унува, къуртал бувссар Дагъусттаннал паччахIлугърал университетрал машлул ва экономикалул факультет. Гара шинал бувккуссар Марксизма-ленинизмалул университет. 1986 шинал кулпатращал ивзссар МахIачкъалалив. Зий уссия шагьрулул Ленинский райондалул налогру датIай отделданул хъунаману. Пенсиялийн укканцIасса оьрму машлул даврий зий гьан бунни Шяпинал.
Шяпи ия цалла даву лавайсса даражалий дачин дайсса, грамотнайсса пишакар. МуницIун ва ия хъинну дакI хъинсса, архIал зузиминнащалгу, лагма-ялттунащалгу хIал бавкьусса, паракьатсса, хасият ххуйсса, ас-намус бусса, жяматравугу бусравсса инсан. Пенсиялийн увккун игьалагансса мугьлат къавхьунни, цибанссар чичру укунсса духьунссия.
Шяпи аьпалухьхьун лавгсса хъуннасса кьурчIишиву кIидачIлай, жижара буллай буру уссихь, ссурваврахь, арснахь, кулпатрахь, уссурссуннахь, гъан-маччанахь, цинявннахьвагу. Цал гьав нурданул дуцIиннав, алжаннул ххари аннав. Махънал оьрмурдай барачат бишиннав. Амин.
ЧIурттащиял жямат
—————————————
МАХIАММАДЛУЛ ДУШ ХIАЖИЕВА АСВАТ
Уттигъанну дунияллия лавгунни, вай махъсса шиннардий къашавай шаний, диялсса къювурдугу дуркуну, Шахьуйннал шяравасса ХIажиева Асват МахIаммадлул душ.
Бувну бур Асват 1936 шинал Шахьуйннал шяраву. Буттал шяравува байбихьулул школагу бувккуну, гихуннайсса дуккаву дурну дур Ккурккуллал дянивмур даражалул школданий. Муния махъ цила ниттилссийчIан Украиннавун Харьковрайн лавгун бур. Тийхва кулпатралгу хьуну, махъ ласнащал архIал Чимкентлив бивзун бур. Тийх Асватлул къуртал бувну бур медучилище. Цукссагу хIал бувну бур вайннал кулпатрал Чимкентлив ялапар хъанай, тиккува цила пишарайгу зий бивкIун бур Асват. Махъ бусравсса медициналул зузалал пишарай Асват зий бивкIссар буттал шяраву Шахьував, КIундив, МахIачкъалалив роддомрай, 25-хъул шинну дурну дур МахIачкъалалив Республикалул стоматологиялул поликлиникалий зий. Махъ, тIурча, къашавай хьуну, шанийн багьаннин, Асват бия дахху-ласулул аралуву зий, хIарачат буллай. Ва бия инсаннал чIара-карах бацIан, кумагран бучIан анаварсса, кагу, дакIгу тIиртIусса, лагма-ялттунащал бавкьусса ххаллилсса хъамитайпа. Зузисса кIанттурдайгу, щарнил жяматрачIа, лагма-ялттуначIа хIурматрай, бусраврай бикIайссия.
Цилва лахъи бакъасса оьрмулул мутталий Асватлул цикссагу дард, къюву кьюлтI увкуссар, ччяни ласнацIагу хьуну, махъ цила бусса оьрму хас бувну, ччаннай бацIан бувсса ца бакъа-бакъасса язисса душнил нязаннийсса бивкIугу бувхIуну. Махъсса шиннардийгу Асват, кIивагу ччаннацIагу хьуну, шанийн багьну, цукссагу кьянкьа дурна, яхI бувна. Цибанссар, чичрулул хьхьичI чIира бан щищачIавгу къашай.
Асватлул бивкIулул къумашивугу кIидачIлай, дакIнийхтунусса жижара буллай буру цинявппагу гъан-маччанахь, щалвавагу агьлу-авладрахь. Асватлул бунагьирттал аьпа баннав, рухI куклуний дишиннав, алжаннул агьулданувух хьуну лякъиннав.
Шахьуйннал жямат
————————————
МАХIАММАДЛУЛ ДУШ ДАВДИЕВА ПАТIИМАТ
Оьрмулул 99 шинаву аьпалухьхьун лавгунни лакрал гьунар бусса балайчи, миллатрал культуралуву ккалли бансса хха кьабивтсса инсан, ххаллилсса зунттал хъамитайпа, Къуруллал шяраватусса МахIаммадлул душ Давдиева ПатIимат (Гьажал ПатIи).
ПатIимат бувну бур 1916 шинал Лакрал райондалий Къуруллал шяраву. Цила чIумун лархьхьусса кIулшивугу ларсун, сайки бусса оьрмулухун зий бивкIссар шяраваллил клубрал каялувчину, дурссар хъинну хьхьичIунсса ва чIярусса давурттив. Ванил хIадур дурсса культуралул программартту, концертру мудангу сийлий диркIссар райондалул центрданий, бугьайсса бивкIссар конкурсирттаву хьхьичIунсса кIанттурду. ЛичIи-личIисса щархъаву ккаккан байсса бивкIссар ванил хIадур бувсса пьесарду. Зий бивкIссар колхозрал личIи-личIисса давурттайгу.
Лакрал цIадурксса балайчитураву, хаснува халкьуннал зумунусса балайрду учавриву, махъ бакъа, Къуруллал ПатIиматлул (Гьажал ПатIил) бувгьуну буссар ххишала бакъа лавайсса кIантту.
Ванил балай учаврил кьяйда, чIунил такьва щищакIуй дяйкьин дан бюхъансса къадикIайва. Ва бия так ца цихава цуппа лавхьхьусса макьаннал ва балайрдал пагьин. Лакрал радиолий яхьуну ливчIсса ванил балайрду хIисав хъанахъиссар лакрал музыкалул мусил фондравун духлахисса хъусну.
ПатIимат аьпалухьхьун лагаврил пашманшивугу кIидачIлай, дакIнийхтунусса жижара буллай буру ванил арснахь ва душнихь, миннал оьрчIахь ва махъсса цинявппагу гъан-маччаминнахь. Цил бунагьирттал аьпа баннав, рухI рахIатний дишиннав.
Къуруллал жямат
——————————————
АБАЧАРАЛ ДУШ АБАЧАРАЕВА ХХАДИЖАТ
Ххюлуссуннал шяравасса Абачарал душ Абачараева Ххадижат аьпалул хьунни оьрмулул 93 шинаву. Ххадижат хъуниминнащалгу, мюрщиминнащалгу хIал бавкьусса, дакI-аьмал уздансса инсан бия. Ванил цила ца акъа-акъасса арснахь, арснал щарнихь, душнихь ПатIиматлухь, вайннаятуминнахьгу бивчIан хьхьичI барчаллагь увкунни, цуппагу жяматрахь хIалал битира увкунни, цилагу циняв хIалал бивтунни.
Ххадижатлул чIявусса захIмат бувссар шяраваллил, колхозрал давурттай, дяъвилул шиннардий лавгун бивкIссар къанавртту дуклан, зий бивкIссар ризкьичину къутаннай, хъу-ххалал давурттай. ХIалал дурссар диялсса медаллу, бахшишру. Тай аьратталсса дяъвилул шиннардий «чIу ххуй Ххадижатлул» пасихIну балай учайсса бивкIссар, къумаминнал дакIру рахIат дувансса куццуй, бувхми бигьалагансса кьяйдалий. Заннайн имандалийсса Ххадижатлул дин-чак, зума тачIав къакьадитайва, чIюн канища хIура къабайссия.
Ххирасса Аллагьнал дунияллий бунува дуллусса «Ясир» тIисса цIанин. Ххадижат ахиратрахьхьун лагаврил къумашивугу кIидачIлай, дакIнийхтунусса жижара буллай буру арснахь МахIаммад-Ражавхь, душнихь ПатIиматлухь ва махъсса щалвагу агьлу-авладрахь. Лайкьну лякъиннав ина, жул ххирасса ва ххаллилсса Ххадижат. Вил рухI рахIатний дишиннав.
Ххюлуссуннал жямат
————————————————-
НАБИНАЛ ДУШ ЧАРИНОВА ЗЕМФИРА
Январьданул 21-нний, цилва хъатIи бувну дурусну кIира шин хъанахъисса кьини, хар-хавар бакъа жуятува батIул хьунни дакIнилгу, аьмаллалгу марцIсса инсан, ШавкIратусса Халилов Набинал ва Мадинал душ Чаринова Земфира.
Земфира бувну бур 1989 шинал ШавкIуллал шяраву.
МарцIсса ххювардай Гъумучиял дянивмур даражалул школагу къуртал бувну, бувххун бур Дагъусттаннал шяраваллил хозяйствалул академиялувун ва мукунма ххаллилну мугу къуртал бувну бур. Буссия ххарину мукьва-ххюва гьантлувун бансса чIивитIуя, хIадур дурну дуссия чIивитIун гьарица аьркиншиннагу. Кьабивтунни махъ шин ва дачIи хьусса оьрчIгу, лялиян дан захIматсса кьурчIишиврущал ласгу, нину-ппугу, гъан-маччамигу, лавгунни аьпалухьхьун ххаллилсса лаккудуш.
Земфира буссия дакI аьчухсса, гъан-маччаналгу, чIахху-чIарахналгу чIарав бацIан хIадурсса, на ххира бара тIисса инсан. Цибанссар, чичру мукунсса духьунссия, Аллагьнал цанма ххирами буцайссар тIун бикIайхха.
Нязаннивсса бивкIулул хъуннасса пашманшивугу кIидачIлай, дакIнийхтунусса жижара буллай буру Набинахь ва Мадинахь, лас Салманнухь, ссурваврахь, гъан-маччанахь ва щалвагу агьлу-авладрахь. Махънахьхьун цIуллушиву дулуннав. КьурчIишиву духIансса ссавургу Аллагьнал дулуннав.
Земфирал бунагьирттал аьпа баннав, гьав нурданул дуцIиннав, рухI алжаннул ххари даннав.
Кьукуннал
ва ШавкIуллал жямат
