Специярду балжину дарувну бацIайсса бур къюкIлин туннурдан, ракрал цIуцIавурттан. Специярдаву бусса бур чIявусса антиоксидантру, вайннул тархъансса радикаллал инсаннал чурххаву окислительный процесс хьун буллалисса даву хьхьара дайсса дур. Ца къеп специялуву антиоксидантру бусса бур ца стакан хIаллил ахъулссаннувунияр чIявусса.
• Холестерин чан байссар куркумалул ва дарчиндалул (корицалул).
• Аьвкъу-гъели хьусса чIумал кумаг байссар кIяла жавжлил (имбирь), михакрал (гвоздика), дарчиндалул (корица), вайннул оь ххуйну щурущи байсса бур.
• Ахттайнссаннул хьхьичI дахьа нагьар дан дишайсса аьнтсса закускалулгума дукралухсса тамахI (аппетит) гьаз къабайссарча, ялунгума ччяни уччин увну, дукра чансса дукан айссар. Мунищала архIал специярдавусса капсаицин дайшишруну шайсса дур майлул клеткардан.
• Гормональный фон цила пурмалийн дуцайссар зяъпирандалул (шафран).
ХIазран бакъар учайсса лухIи жавж (мускатный орех) хъаннил, базилик арамтурал специяр куну, шивусса эфир маслордал цилла нирхираву дитайссар виваллил железордал секрециярдал даву.
• Ракрая ххассал буллай, специярду-антиоксидантру чялишну талай буссар канцерогеннащал. Куркумалуву ляркъуну дур бакIрал, ссурссулул дурухлурдащал талатисса затру. Хрендалуву лявкъуну бур ракрал клеткарду литIун буллалисса молекула.
• Лавралул чIапIал кумаг байссар дукра лялиян дан, хъинссар къюкIлин, хъинссар бурчул цIуцIавурттан ва артрит оьнийн дуркний, гайморитран. КъабучIиссар лякьлуву оьрчI бусса хъаннин.
• Хрен хъинссар ччаруллава чартту буккан бан, пурпухху сатиржан хьуминнан, цистит, подагра, ревматизма думиннан. ЦIусса хрендалул чIапIи щаращисса щинавун щуну, ягу парданийн бувгьуну биширча хъинссар лигьулул хьусса базулун, лажиндарал невралгиялуя, ревматизмалуя.
• КIяла жавж (имбирь) хъинссар дакI ларай нанисса чIумал, мигрень, артрит думанан, аьвкъу-гъили хьуний, хъугьулун. Япуннал халкьуннах вичIидиширча, кIяла жавж хъинсса бур щиртраягу.
• Шафран хъинссар дукра лялиян дан, лимфа, ттиликI марцI дайссар, ччаруллан хъинссар, хьхьа батIлатIинан хъинссар, ишлашиву дакъасса (застойный) туннурдавусса оь зузи байссар, лажиндарал ранг ххуй дайссар.
• Дарчин (корица). Гьарца кьини ца чяйлул къуса дарчиндалул хIачIларча, оьттуву нацIушивугу, холестерингу чан шайссар, давление нурмалийн дагьайссар.
• Михак (гвоздика). Михакрал масло гужсса антисептикри, гриппрал, ОРВИ-лул эпидемиялул чIумал бучIиссар миннул кьанкь дан къатлуву, хъинссар ккарччул къювулуя, бигьану ссихI бигьлагьи айссар.
ЦIуллуну битаннав
Т. ХIажиева
