Дагъусттаннал БакIчи Рамазан АьбдуллатIипов гьуртту хьунни Аьрасатнал Федерациялул ХIукуматрал Председатель Дмитрий Медведевлул регионнал бакIчитуращал дурсса совещаниялий. Ххалбигьлай бия 2015 шинал экономика хьхьичIуннай хьун даврил ва социалсса цалий бацIаву щаллу даврил масъалартту.
АьФ-лул ХIукуматрал Председательнал увкусса куццуй, кризисрайн къаршисса чаранная мюнпат хьунтIиссар властьрал циняв даражардал органну цаннищал ца хIала-гьурттуну зурча.
«Давуртту дачин дантIиссар цаппара ххуллурду язи бувгьуну. Гьарцаннуяр хьхьичI аьркинссар кабакьин жулва оьрмулун хъуннасса агьамшиву дусса макроэкономикалул ва социалсса цалий бацIаврил иширттан, промышленность лядуккан давринсса шартIру щаллу дуван, шяраваллил хозяйствалуха, цIушиннардаха зун, миннуйну экономика лядуккан дансса шартIру дузал дан», — увкунни Дмитрий Медведевлул. Ганал мукъурттийн бувну, Аьрасатнал компаниярттал продукция къуруш заэв шаврийну конкуренция духIай хьуну дур. Апрельданул 1-нин цIакь дан тIий дур импортозамещениялул программа яла агьамми бутIраву.
Промышленность лядуккан даву мурадрай хIукуматрал итадаркьуну дур ца триллион къурушру. Мунияр ххишалагу паччахIлугъ хIадурну дур банкирдал хьхьичI цаппара предприятиярттал чулухасса поручительтал хьун, миннуща кредитру ласун бюхъаншиврул ва цалла давуртту тихуннайгу дулланшиврул.
Дагъусттаннал хIакъираву тIурча, 2014 шинал хIасиллайну республикалул гьануми экономикалул ва социал ккаккиярттал динамика (бущи) хъинчулийсса хьуну дур. 2014 шинал бущи, хьхьичIмур шиналмуних бурувгун, хьуну бур: шяраваллил хозяйствалул бакIлахъиялулсса – 108,7%, основной капиталданувунсса инвестициярду – 110,0%, строительствалулсса – 109,1%, розницалий хъус машай дуккан даврилсса – 107,0%, агьалинан багьлухсса хIаллихшинналсса – 104,3%.
ХIадур бувссар ХI. Аьдиловлул.
