Декабрьданул 26-нний Ккуллал райондалул муниципал сакиншиннарал бакIчи Сулайманов Сяид ХIасниевичлул бувсунни ларгсса 2014-ку шинал райондалий дуван бювхъусса давурттая ва дуван дакIнийминнуя. Ва кьини администрациялул залданувун бавтIун бия циняв шяраваллал бакIчитал, райондалийсса идарарттал хъуними, администрациялул отделлал бакIчитал. БатIаврий гьуртту хьунни Сяид ХIасниевичлул хъиривми: Хизри Мутаев, Эдуард ХIажиев, Сабрина Илиясова.

Ялавай бишлай буру Сяид ХIасниевичлул бувсса док­лад, чан-кьансса кутIагу бувну:
— Ларгсса шинал, Да­гъусттаннал БакIчи Рамазан АьбдуллатIиповлул жулва хьхьичI бивхьусса масъалартту биттур буллай, жущава бювхъунни Ккуллал райондалул экономикалул ва социал масъаларттал бущи цахъис бухьурчагу хьхьичIунмай хъит учин буван. ТIайлар, социал иширттаву, инсантуран яхъананшиврул хIасул дувайсса хIаллихшивурттаву дуван къархьусса давурттив чансса дакъар. Амма райондалул администрация мудан зий буссар бюхълахъимур буван хIарачатрай. Утти ихтилат буванна дурсса давурттаяту.

Шяраваллил хозяйство

ХIисавравун ласун багьлагьисса захIматшивуртту хьхьичIун дагьлай духьурчагу, райондалул шяраваллил хозяйствардал давуртту хьхьичIуннай най дур. Шяраваллил хозяйство жулла райондалий хъанахъиссар экономикалул гьанусса давуну. Райондалий яхъанахъисса инсантурал агьаммур касму хъанай дур, муданнагу диркIсса, ятту-гъаттара ябаву. Вайннувугу – ятту куч баву. ЦIана райондалий дур 18 СПК, 1 агрофирма, 167 КФХ ва 2 947 тIювалул хозяйство. 2014-ку шинал шяраваллил хозяйствалуха зузиминнал сияхI дур 3 150 инсан. Ми хъанай бур райондалий яхъанахъисса инсантурал 27,9%.
Шяраваллил хозяйствардал давуртту дачин дуван бюхъай­сса аьрщарал лагру дур 126 089 гектар. Вайннува 2 792 гектар хъу дугьан шайсса аьрщарал, 45 гектар багъирдал, 3 769 гектар ххалазаннал, 113 363 гектар ятту-гъаттара гьухъаллийн лагайсса аьрщарал дур. Хъу дугьан шайсса аьрщарая 42,8% дакъа жува дугьлай бакъару. ХIатта республикалий ва цифра 57,8% бунува. Райондалий дучIан дурсса бакIлахъия хIисавравун ларсъсса чIумал, ми хъанай дур ца инсаннан 45,6 азарда къурушрансса. Дагъусттаннай ва цифра бур 36,1 азарда къуруш. Райондалийсса шяраваллил хозяйствардаха зузисса инсантурал дучIан дурсса бакIлахъиялул сияхI дур СПК 12,8%, КФХ – 65%, тIювалул хозяйствардал – 22,2%.
2014-ку шинал райондалий дучIан дурну дур 5 380 тонна нувщул, 398 тонна къалмул, 45 тонна ахъулссаннул, 900 тонна дикIул, 10 500 тонна накIлил, 450 тонна ппалул, 600 азарва ккунук,15 тонна ницIал. Вай 2013-ку шинал дучIан дур­сса бакIлахъиялияр ххишаласса хъанай дур. Райондалий ябуллалисса лухIи гъаттарал сияхI дур 16 490 бакIлийн бивсса, ятту ва цIуртти бур 189 829 бакI. КIицI бувсса яттивату, ттардан дотация хIисаврай дулун, райондалийн дуркIун дур 6516,0 къуруш. Ятту-гъаттарал гьанна ххуй баврин дуллуну дур 3375,0 къуруш. ЦIуну хъанахъисса фермертуран – 3366,0 къуруш. Амма шяраваллил кIанай ятту-гъаттара ябуван, къурату бакIлахъия дучIан дуван ччисса инсантурал хьхьичI уттигу дайшишру чансса дакъар. Му хъанай бур жучIара техника хъинну чанну дакъа дакъашиву. Думигу чIумува дурксса, ишла дуван къахъанахъисса дур. Ми цIусса ласунсса гужгу жула СПК-дал, КФХ-дал бакъар. Улу цивппа кIулшиву ларсъсса механизатортал, ятту-гъаттара ябаврил касмурду дусса пишакартал бакъар. Ялунссаннун райондалул вивсса СПК-даву зузисса зузалтрал харж 2 азарда къурушрая, дахьва 3 азарунния ливчусса бур. Сайки циняв СПК-дал цахьрасса хъу дугьай аьрщи, дукъагьлай, хан аьрщарайн, ххалазаннайн, бизанттайн кIурадаен дурну дур. Бабаюртуллал райондалийсса аьрщи зузи къадурнува личIлай дур. Ялув кIицI дурсса диялдакъашивуртту хIисавравун ларсун, жулва хьхьичI бавцIусса масъалартту бур: хъит учин хъуру дугьавриву ва ятту-гъаттара ябавриву; ятту-гъаттарал, дугьайсса бакIлахъиялул гьанна ххуй бавриха зун; дугьайсса аьрщараха къуллугъ буван; щин дишайсса, яни мелиорациялул системарду цIудуккан дуван; механизмарду ижаралий ласаврил хIаллихшиннарду ххи дуван, цIусса механизмарду машан ларсун; райондалул вивсса дугьай аьрщарал лагру ххи дуван; гьарза дуван райондалул вив так-тукну къазий, кооперация, цайми цаннал гаманащал зузисса, агрономиялул кооперацияртту; хIасул буван райондалул вив инвестицияртту кIункIу дувансса проектру; муданма зузисса шяраваллил хозяйствалул бакIлахъия даххайсса рынокру хIасул буван райондалий; кумаг буван жулва инсантуран цалла дучIан дурсса бакIлахъия да­ххаван.

Промышле­н­ность

ХIакьинусса кьини Ккуллал райондалийсса промышленностьрал давурттан хIисав хъанай дур ччатI шашаву ва пластикалия дувайсса кьай-кьуй. Вай давурттай зузисса зузала ур 28. ХьхьичIава райондалий бикIайссия нис дувайсса заводру: Ккулув, Вихьлив, 2-мур ЦIувкIрав. Бурчу кIивкIуну, гайннуя рахIурду бувайсса цех бикIайссия Ккулув. Лимонад дувайсса, лаххия дувайсса цехру бикIайссия. Вай кIицI дурсса давурттив ва цаймигу цIунил дуллан администрация хIарачат буллай буссар. Вай ишру бакIуйн буккан буваншиврул дувансса давурттал сияхI дур укунсса: хIасул дуван райондалий экономикалул зумунусса шартIру, хайрданун зузисса промышленностьрал идарартту зуншиврул; хIасул буван райондалий шяраваллил хозяйствардал бакIлахъиялия ва цайми задирттая хIадурсса хъус итадакьайсса мюрщи цехру, миннун аьркинсса хъус диян дуллансса шартIру; райондалий итадаркьу­сса хъус машлуй гьан дуван жулла республикалий дакъагу, дазул кьатIувсса регионнащал дахIаву дуллан.

Инвестициярду

2014-ку шинал жулла райондалийн дуркIун дур 175, 5 мл. арцул. Вайннува производствалувун харж дурну дур 119,9 мл. арцул. Шяраваллил хозяйствардан дуллуну дур 71,8 мл.арцул. Ми харж дурссар «Племхоз Кулинский» кооперативрал гъаттара жагьил буван, «Цовкра-2» агрофирмалул ларсъссар уттизаманнул шяраваллил хозяйствалуву ишла дувайсса техника. Ххуллурду бакьин буван, транспортран ва связьран харж дурссар 30 мл. арцул, 37 мл. инвестициярдал арцу ва 22 мл. арцул кIанттул бюджетрава харж дурссар производствалул къахIисавсса кушурдан. Вайннувату 22 мл. арцул харж бувссар «Образование» сфералун.Таксса къатри дувултрал харж дурну дур 18537,0 азарда къуруш. ХIисав хъанай дур 1500 квадрат­рал метра яхьунсса къатрал дуршиврун. Мукунма таксса ишбажаранчи Расулов Аьбдуллул 20 мл. цалла арцул харж дурну, Бажиганнал даралуву 1000 бакI яттил лагайсса ппал бувну бур. ЧIяйннал шяравасса таксса тIювалул хозяйствалул заллу Ибрагьимовлул лухIи гъаттара буч буллансса ферма дуван харж дурну дур 15 мл. арцул. Мирзоевлул бувну бур хIухчалтрансса къатта, лухIи гъаттарансса ва яттинсса ппал, 5,8 мл. арцул харж дурну. Вай хъинну ххуйсса давурттан ккаллиссар.

ЧIиримур ишбажаран­чишиву

2014-ку шинал чIири ишбажаранчишивруха зузиминнал цалла дурсса хъус даххан дулаврищал архIал ва хIаллихшиннардал давурттив дурну дур аьмну 408,3 мл. къурушран. Вай давурттай зузиминнал сияхI дур 618 инсан.

ТIалавшиннарал рынок

ХIакьинусса кьини райондалий бур 21 Райпорал, 47 ишбажаранчитурал ттучан. Ттучаннай дахлай дур дуки-хIачIия, лаххия, цамур хъус ва стройматериаллу. Ххуйну зий бур 6 пекарня, 4 столовая.

Давурттал щаллушинна

Райондалий яхъанахъисса инсантурава зузисса хъанай ур 5832 инсан. Ми хъанай бур зун бюхълахъисса инсантурал 96%. Даврих луглагисса инсантурал сияхIраву ур 84 инсан. Ялун нанисса шиннардий даврих луглагисса инсантал чан хьунссар тIисса умуд бур. Му бакIуйн букканшиврул райондалий инвестициялул программарттайн бувну давуртту дайдишайхту, стройкарттай 150 инсаннансса даву хьун тIий дур. Мукунма 100 инсаннан сезондалий зунсса кIантту хьун буван бюхъан тIий бур.
2014-ку шинал райондалий увну ур 146 оьрчI. Дунияллия лавгми дукIунияр 5 инсан чан хьуну ур. Мунийну жулла райондалий 95 инсан ххи хьуну ур.

Ххуллурдал хозяйство

Ларгсса шинал райондалул ххуллурду бакьин буван харж бувссар 30 мл. арцул. Бакьин був­ссар 15 км. лахъишиврийсса ххуллурду. Гьануну бакьин бувссар Вихьлия Къянив нанисса 3 км. ххуллул, ЧIяту Вихьлив нанисса 4 км. Ххуллурдал фондрава райондалун итадаркьусса 11,4 мл. арцул харж дурссар шяраваллал вивсса ххуллурду бакьин буван. Ххарисса иширан ккалли буван багьлай бур ШавкIрату Ваччав нанисса ххуллийх асфальт бавкьусса проект дуллай байбишаву, мукунма ШавкIуллал лувсса неххайхсса ламул проект дуллалаврия. ЯлунчIинсса шинал вай давурттан итадаркьусса 100 мл. арцунсса давурттив биттур дуван хьунссар тIисса умуд бур.

Пассажиртал буцлацаву ва связь

Райондалий бур гьарца кьини пассажиртал бувцуну заназисса 10 чIиви автобус. Ми хъанай бур: МахIачкъала-Ваччи-Ккул, Каспийск-Ваччи- Вихьул-Къян, МахIачкъала-Ваччи- Ккул-Хъусращи ва райондалул вивсса маршрутру.
Райондалий зий дур: «Мегафон», «Билайн», «МТС» связьру, цифрардал телевидениялул 10 канал, радиолул 3 канал. Интернет ишла буллай ур 500 абонемент.

Экология ва тIабиаьт ишла дуллалаву

Ккуллал райондалий марцI-чапалшиву кIучI даврил масъала хъинну чарагьатну бур. Мунийн бувну, санитариялул ва эпидемиологиялул ишру ххуйну бакъар. Царагу шяраву чапалшиву дартIун, дичайсса кIантту ба­къар. Дакъар контейнерду, Ваччав дакъа. Хъинну ххуй бакъасса иш бур ЧIяв, Ваччав, Ккулув, Хъусрахь, ЦIуйшав, Вихьлив, Хъюй, 2-мур ЦIувкIрав, ЦIущарнив, СумбатIлив. ХIатта шяраваллал бакIчитурай аьмну 192 000 къ. аькIрал дирхьуну дунура, масъала ххуйчулинмай зана битан къабюхълахъир.
Ванихара лархьхьусса тагьар дур инсантал щинал дузал бавриву. Шиккугу 44 азарда къуруш аькIлул дирхьуну дур. Ванийн бувну, ва шинал шяраваллал бакIчитуран чара бакъа дуван багьлай бур вай давурттив: дуруччин шяраваллаву марцIшиву, гьарца шяраву къахъанарча, кIира-шанна шяраву буван чапалшиву дичайсса полигонну, кьутIи чирчуну хасъсса транспортрал заллухъруннащалгу, чара бакъа, шяраваллая архну, ливтIусса ятту-гъаттара буччай­сса къувирду дуван, райондалул ветуправлениялущал маслихIат ккавккун.
Шиккува кIицI буван ччива жулла райондалий бушиву 731 гектар вацIрал. Буруччара мигу.

Муниципал сакиншиннарал хъус

Ккуллал райондалул муниципал сакиншиннарал канилу дур 77 сияхIрал хъус. Ва мукунна хъанай дур 38 муниципал идаралул учредитель. 2014-ку шинал ижаралий дуллуну дур 595 гектар аьрщарал, ци дулунну 5 кьутIи чирчуну. Администрациялул аьрщи ишла дуваврил масъалалущал бавхIусса 247 инсаннал тавакъю биттур бувну бур. Мунийн бувну, налогру дулаврил давурттив хъит учин дуваншиврул, 2357 строительствалущал дархIусса объект ххал дурну дур.

Бюджет

Жулла райондалул къажанжи дур 230,7 млн. къуруш. Ми 2013-ку шиналнияр 47 мл. чансса хъанай дур. Харж дурсса арцуну хъанай дур 225,6 млн. къуруш, 2013-ку шиналнияр 55,9 млн. чансса. Республикалул бюджет­рава жучIанна къадуркIун дур ккаккан дурну диркIсса 21 млн. арцул. Райондалул вив хьусса къажанжилул сияхI дур 30,5 млн. арцул. Ми 2013-ку шинал хьуминнуяр шамлийну ххисса хьуну дур. ЖучIанна дучIайсса арцу бюджетрал сфера зуншиврул ва социал хIаллихшиннардан харж хъанай дур. Налогру дузалну тIалав дулланшиврул, шяраваллал администрациярттан аьркинну бур ххуйну зун. Багьлай бур налогирттал инспекциярттал тIалавшиннарду биттур дуллан. Шяраваллавусса кIичIирттай, къатрай номерду бивхьуну, щил ци хъус дуссарив кIул дуван бю­хъаншиврул. Му даву хьхьарану най дур. КIицI буван ччива налогир­ттал инспекциялул шяраваллал администрациярттащал дахIаву хьхьарасса душиву. Мунийн бувну налогирттал база дузал буван бюхълай бакъар багьайсса кьяйдалий.

ТIювалул давурттив

Вай давурттуну жулла райондалий хъанай дур чаннал идарартту вихшаласса кIанттайн кIункIу бавуну. Трансформаторду, ххаллу даххана дуван, цаймигу давурттан харж бувну бур 10 млн. арцул.

ЦIуллу-сагъшиву дуруччаврия

2014-ку шинал райондалий­сса цIуллу-сагъшиву дуруччаврил идарартту инсантуран кумаг буллай, диспансеризация дуллай зий бивкIунни. Диспансеризация дурну дур 2423 инсаннал. Вайннавату 266 инсан, цIуцIавуртту дусса кIул хьуну, сияхIрайн лавсун ур. Мукунма 913 оьрчI ххал бувну бур. Амма уттигу къабювхъунни райондалийн тIалав буван анестезиолог, хирург, УЗИ-хIакин, оьрчIал хIакин, терапевт.

КIулшиву дулаву

Райондалий бур кIулшиву дулаврил 26 идара. 5 оьрчIал багъравун занай ур 182 оьрчI, 15 школалий дуклай ур 1017 оьрчI, ххимур кIулшиву дулайсса 6 идаралийн занай ур 450 оьрчI. Амма ларгмур шиналнияр дуклаки оьрчIал сияхI чан хьуну дур 112 оьрчIал. КIулшиву дулаврил давурттай зий ур 284 учитель ва пишакар.

Жямат социал буруччаврия

ХIукуматрал яла агьаммур буржну хъанахъиссар жямат социал чулуха буруччаву. Ми иширттан жулла райондалул харж дурссар 9,7 млн. арцул. Вайннувату 2,8 млн. арцул – гьарца зуруй­сса тIювалул хIаллихшиннардан, 3,93 млн. арцул – оьрчIан булайсса пособиярттан. Социал хIаллихшиннарду ласлай ур 5170 инсан. Ми хъанай бур райондалий яхъанахъисса инсантурал бачIиннуяр ххишаласса.

Нинушиву ва оьрчIшиву

Райондалул администрациялул янилу муданмагу бу­ссар ниттихъахсса, оьрчIахсса ургъил. Амма, цуксса пашманнугу, райондалий ур нину-ппу бакъасса 13 оьрчI. Ми яхъанай бур гъанссанначIа, цIимилул инсантурачIа. Ца оьрчIан къатта ласун 407 814 къуруш дуллуссар. Вай хасну Федерал ва Республикалул бюджетрава нанисса арцур. 2014-ку шинал оьрчIру ябуван дуллуну дур 606 азарда къуруш. Цал булайсса хасъсса пособия буллуну бур кIия оьрчIан аьмну 27483 къуруш, — увкунни Сяид ХIасниевичлул.

Райондалул хъунаманал мукунма бувсуна райондалий ушиву 3 296 пенсионер, пенсиялул дянивсса лагру душиву 9806 къуруш. Къатта-къушлинсса хIаллихшиннарду ишла дуллай усса ия 845 инсан. Миннун харж дурну дия 400 азарда къуруш.
Райондалийсса физкультуралул, спортрал давуртту кIицI дуллай, бувсуна 1340 инсан мудан спортрахун агьну ушиву, райондалий мудан дувайшиву футболданул, волейболданул, велосипедрай ссур баврил, лачIун буккаврил, кроссрал ва цаймигу спортрал тIуркIурду. Амма Сяид ХIасниевичлул кIицI бувна хъинну хьхьарану най душиву Хъусрахьсса, Ккулувсса, Вихьливсса жагьилтурал ва оьрчIал спортрал школардал давуртту. Бувсуна спортрал давуртту хъиннура хьхьичIуннай дачиншиврул, ЧIявсса спортзал, Ваччавсса стадион бувну къуртал буван багьлай бушиву.
Райондалийсса культуралул ва искусствалул давурттая ихтилат буллай, кIицI бувуна душиву клубрал 14 сакиншинна. Шикку гьуртту хъанай усса ия 7000-ннийн ивсса инсан. Бусса бия бугьараминнал 14, оьрчIалгу 14 фольклорданул ансамбль. Ларгсса шинал культуралул пишакартурал дурну дия 48 байран. Дагъусттаннай шайсса культуралул иширттавух, байраннавух гьуртту хьушиву бувсуна райондалул культуралул зузалт. Райондалул культуралул клубран Дагъусттаннал клубир­ттаву 1-мур кIану буллушивугу бувсуна. Вай барча буван буллуну бия диплом, багьлул ххирасса зава ва 100 азарда къуруш. Рамазанова Гулжагьрал ларсун дур пагьму бума культуралул зузалан дулай­сса 50 азарда къуруш грантрал.
Райондалийсса туризмалия ихтилат буллай, Сяид ХIасниевичлул кIицI бувна райондалий дувайсса «Щунудагъ», «Пагьламан», «Наследие» фестиваллайн бучIайшиву туристуран хIисавсса хъамал. Ми гьантта бикIан шайсса хъамаллурал къатри бусса бия Ваччав, ЦIущарнив, Хъювхъав. 2015-ку шинал райондалий туристурал маршрут тIитIин кьутIи чирчуну дусса дия «Джага» турист фирмалущал.
Жагьилтурал дянивсса политикалия буслай, кIицI бувна 14 шинава 30 шинавун ияйсса 1897 жагьил янилу увгьуну, миннал оьннасса чIун цанна ва жямат­ран хайрданун харж дувансса хIуччарду ляхълай бушиву. 2014-ку шинал райондалий зун бивкIун бур жагьилтурал администрация. Жагьилтал гьуртту хъанай бусса бур политикалия, мяърипатрая лекцияртту буккавривух, субботникру дувавривух, спортрал тIуркIурдавух. Даврих бакъасса 49 жагьилнан даву ляркъуну дур. Райондалул жагьилтал гьур­тту шайсса бур республикалий дувайсса циняв форумирттавух. Мунихлуну буллуну бур республикалий 2-мур кIану. Сяид ХIасниевичлул кIицI бувуна райондалийсса циняв структурардаву яла бущилий зузимур Жагьилтурал отдел душиву.
Ихтияр дуруччаврия буслай, кIицI бувуна райондалий паракьатшиву душиву. ХIасул бувну бусса бур терроризмалийн къаршисса хасъсса комиссия. Му комиссиялул дурну дия 7 заседания. Амма полициялул сияхIрай усса ия вихшала дишин къабучIисса 13 жагьил. Миннащал мяърипатрайсса ихтилатру бувайсса бия.
Сяид ХIасниевичлул бувсуна цала рисалалийну райондалийн инвестициярду цукун кIункIу дуллай буссарив. Вайннуяту гьарта-гьарзану бусанну кказитрал хъиривмур номерданий.
Ихтилатру, мукунма, бувуна райондалул бакIчинал маслихIатчи Хизриев Шамххалал, УО-лул хъунама АхIмадов Шамиллул, Вихьуллал школалул директор МахIаммадов Аьлиллул, Ваччиял оьрчIал багърал хъунмур Чупалаева Асватлул, администрациялул информациялул ва аналитикалул отделданул хъунама Маммаев Рамазаннул, райондалул финотделданул бакIчи Амучиев Кьурбаннул ва м.ц..
Райондалул администрациялул чулухасса грамотартту дуллуна Вихьуллал ансамбльданун, Вихьуллал клубрал худрук Оьмариева Камилатлун, 1-мур ЦIувкIуллал пагьламантурал школалун, райондалул досуговый центрданул худрук МахIаммадова Асиятлун. Оьрмулул 65 шин шаврийн бувну (пенсиялийн буклай), администрациялул отделлал бакIчитал Оьмаров МахIаммадлун, Маммаев Рамазаннун дуллуна грамотартту, арцущалсса конвертру, чIирайн лахъайсса хъунисса суратру.
Макьала хIадур дурссар ХIажимурад ХIусайновлул