МахIаммадлул ва Саниятлул душ Асланбагова ПатIимат бувну бур Ккуллал райондалий 1-мур ЦIувкIуллал шяраву.
Къуртал бувну бур 1-мур ЦIувкIуллал школалул 7 класс.
Ва дакIнийн бутлай бур: «Жущал дуклай бивкIсса оьрчIру ЧIяйннал дянивмур даражалул школалийн лавгуна дуккаву къуртал дан, душрурив къагьан битайва, тай чIунну захIматсса дуну. Жул чIунархIал оьрчIая ххуй-ххуйсса къуллугъчитал хьу­ссар».

ПатIиматлул нину-ппу ятти-гъаттарал, хъу-лухччинул заллухъру бивкIун бур. ЧIивину бунува байбивхьуну бур ванил захIматрал ххуллу, нитти-буттан ка-кумаг буллай. Оьрмулул 15 шинава байбивхьуну, 70 шин хьуннин зий бакъавцIуссара тIий буслай бур ва. Ва зий бивкIун бур колхозницану, бригадирну, 35 шин дурну дур звеноводкану зий.
ПатIиматлул бригадалул цимилвагу бувгьуну бур хьхьичIунсса кIанттурду, хъуру дугьлайни, ттихIлайни, дурчIлачIисса, ххулув буллалисса чIумал ва кIинттул ницай ччарду дуллалисса чIумал.
Ва буслай бур:
«Щар хьура ттущала архIалсса, ца классраву дуклай ивкIсса, Асланбагов ХIасанхIусайннун. Таний жул дия 17-лла шинну. Щар хьуну 8 гьантта шайхту, 18 шин бартларгссар куну, ХIасанхIусайн армиялийн увцуна. Та чIумал аьрали къуллугъ биттур буллай чIярусса шинну дайва. Ваналгу дуруна 3 шин ва дачIи, Ташкент шагьрулучIа. Цувагу альпинистну, зунттайх лахълай ия. Пик Ленина тIисса зунттуйн лавхъун, хьхьичIун увккун, дуллуну дур лишан «Альпинист СССР» тIисса. ЦIанасса чIумалгу ванал костюмрай дур му. Лас тичча увкIун мукьах колхозрал давурттайн, Батагъалив, Бабаюрт-Бажиганнайн лагайссияв, — тIий буслай бур. Гьуртту шайсса ивкIун ур шяраваллил художествалул самодеятельностьравухгу. Ккуллал район МахIачкъалалив концертирттащал ларгсса чIумал, 1-мур ЦIувкIратуссагу гьуртту хьуну бур. Га шинал Ккуллал райондалул бувгьуну бур Дагъусттаннай 1-сса кIану. Микку ХIасанхIусайннул дирчусса къутри, ххаржантир­ттащалсса къавтIаву, мунал гьунар кIул хьуну, та чIумал А. Къапиевлул цIанийсса Лакрал театрданул директорну зий ивкIсса Минкаил Аьлиевлул увцуну ур артистну зун.
Буслай бур ПатIимат: «Ми­кку мунал 7 шин дурна. Ккуллал райондалий Культуралул къатта тIивтIуну, райондалул хъуниминнал тIалав увну, Гъумучату Ваччав директорну зун увкIуна. Миккугу 8 шин дурна. Цалчинмур ЦIувкIуллал шяраву тIивтIуну Культуралул къатта, шяраваллил хъуниминнал тIалав увну, увкIуна директорну зун. ХIасанхIусайн хьхьичIунсса культуралул зузалану кIулссар чIявуссаннан.
Ва ия хъинсса къавтIала, къут­ричи, балайчи, музыкант, хъинну ххирая цалла даву, мудан цалчинсса кIанттурду бугьайссия, зийгу уссия оьрмулул 70 шин хьуннин Культуралул къатлул директорну.
Лас тийх-шийх зий уну, хъун­мурчIин шардаллил хъаргу ттуйра дикIайва», — тIий бур Па­тIимат.
Ванил буцайсса бивкIун бур Къабади тIисса зунтту колхозрангу, цанмагу ххулув бан. Циллалу 25 дачIу дугьайсса колхозрал хъуру ттирхIуну, цимилвагу бахшиш ва 1-чинсса кIанттурду бувгьуну бур. Дяхтта колхозралсса, хьхьурай зурулух цалласса дуллай, дяхтта цалламунийн гьарчан, мухIру зехлай председательтал занан бикIайсса бивкIун бур.
«Лас шавай кIура авукун, хъинну хъунмасса кумаг хьуна, му цалчинсса цулуцала, гъайтIала, тIаннул-муххал усттар, буттукьри буву ия, хъинну ххирая цалла давугу, утти хъунав хьуну махъ мандолина канища къабукьай, балай тIий икIай, — тIий бур. — Жу нитти-буттал бувну буру 8 оьрчI-душ. На бияв кулпатраву мукьилчинмур. Ссу Аминат захIматрал фронтрайн гьан бувну, къашай хьуну бивкIуна, ца ссу ялагу бивкIуна. Ссу Мариян кIийла гьан бувну бур захIматрал фронтрайн. Жул нину-ппу ливтIуна ца шинал кIиягу, цаннан 40, цаннан 45 шин дия. Ца нагу, ца ссугу бияв ласкъатлул хьусса. Ялами мюрщиссия, уссурвавран гайннал лажинтрурагу ххуйну къакIулссия. Мукьва оьрчI ливчIуна дугьара хьусса ниттил ниттичIа. Оьрмулул сасан бувсса, захIматраву хъуни хьусса уссурссуру, жу», — тIий бур.
ПатIимат бур иминсса хасиятрал заллу, пиш тIинмасса, ккашилма-мякьма кIулсса. Оьр­мулуву щинчIав къаччан бикIан къабувссар учай.
«Лас театрдануву зузисса чIумал театр най бур ЦIувкIрав кувкун, хъинну ххари шайвав, бучIайва ласнащал зузисса чIумалгу, муния махъгу жучIан Шагьун Ибрагьимова, ХIасан Буттаев ва Рая Буттаева, Уди Аьлие­ва, Ахсар, ДинмахIаммад, Жинасат ва цаймигу. Ми ттун хъинну ххирая, ттулва гъан-маччасса бувкIссанияр ххари шайвав. БучIайва райондалияссагу, концертирттащал, укунма.
Жу ласнащал Анжилив бивзун мукьах, жу шилу бусса бавну, бувкIуна жучIан Ахсар Аьлиев ва ДинмахIаммад. Ца ххаришиву хьуна, хаварду буслай, му-та дакIнийн бичлай, балайрду тIий. Тти жу букIланну тIий, лавгуна. Цаппара хIаллава «Илчи» кказитрай цал Ахсар ивкIунни тIий, яла ДинмахIаммад ивкIунни тIий ккавккунни, гужну къащи хьунни, макь дайгьин хъанай бакъаяв ХIасанхIусайнгу, навагу. Алжаннул ххари баннав цив!».
Оьрмулуву ккавкмуния, хьунадаркьусса ххаришивурттая, захIматшивурттая бусларчан, ми дия хъинну чIярусса тIий бур ва, амма цумургу захIматшивунияр захIматри лякьлул дард. ПатIиматлуща хIакьинусса кьинигу лялиян ан хъанай бакъар ваниннин 16 шинал хьхьичI оьрмулул нязанниву ивкIусса, ххирасса арснал Асланнул бивкIу. Царагу ниттин лякьлул дард къаккакканнав тIий бур.
ПатIиматлул ва ХIасан­хIу­сайннул хъунигу бувну, ду­ккингу бувну, къатрал щаллу бувну бур 7 оьрчI-душ. Душ Оксана бур «Да­гъусттаннал медициналул лайкь хьусса зузала». Хъунмур душнил бувгьуну бур буттал пиша, вайми личIи-личIисса пишарттай зий бур.
ЦIанасса чIумал, оьрмулул бугьара хьуну, ПатIимат ва ХIасанхIусайн ялапар хъанай бур МахIачкъалалив. Вай рязину бур лякьлул оьрчIая, оьрчIал оьрчIая.
Ттул арс ва арснал щар ялапар хъанай буссия ПатIимат бусса хIаятраву, на миккун лагайссияв лях-карах, ганищал хавардай щябикIайссияв.
Ттун бувчIуна ва цукунсса инсан буссарив, ттул арс, арснал щар лавгссар гичча хъинну рязину, гиккуциригу ганил хъиншиврия рязину бия.
ХIасанхIусайннул ва ПатIи­матлул гьашину цачIу оьрму бутлай там хъанай дур 65 шин. Ва юбилейгу барча дуллай, чIа учин ччай бура вайннан вания тиннайгу чIярусса цIуллусса шинну, цаннал хIурмат цаннал буллай, нахIуну, бусраврай, цинявннан ххирану гьаннав тIий. Вайннан Аллагьнал дард-пикри къабулуннав тIий.
Тамара Рамазанова,
ш. Ккул