Сайки циняв журналистурал чичрурдал аьдатравун дурххун дур цара ца хасият. Ца организациялия ягу ца коллективрая макьала чичайни, хьхьичIва-хьхьичI цалва ихтилат байбишай га коллективрай каялувшиву дуллалиманая. Га коллективрал лагма лавгминнаясса, яла агьамми давуртту дуллалиминнаясса ихтилат тIурчан, лап ххялтIасса, ялттувасса бикIай. Ттуннив ва хъунда­къасса макьалалуву бусан ччай бур ца азарханалий къашайшалтрал дукайсса дукралул ялув бавцIусса шанма хъамитайпалуя: Хъун Ккуллал шяравасса Зина МахIаммадовая, Мукьариятусса Загьидат ХIасановая ва къумукьнал миллатраятусса Арифа Даибовая. Зина, Дагъусттаннал ДГУ-лул экономикалул факультетгу къуртал бувну, 25 шинай цилва пишалий зийгу бивкIун, 3 оьрчIал нину хьусса чIумал, зун бивкIун бур МахIачкъалаллал шагьрулул Центральный азарханалул пищеблокраву. Ва бур аьчухсса, къашайшалтран дулайсса дукралул ялув бацIайсса, тяхъасса хасиятрал инсан. Мукунмасса бур ванищал зузисса Загьидатгу, Арифагу. На вайннащал кIул хьура ванияр ца зурул хьхьичI, ялув кIицI бувсса азарханалул къюкIлил азарду хъин дайсса шамилчинмур отделениялий хъин хъанахъисса гьантрай. На усса палаталуву бия оьрмулул бугьара хьусса, кIия цаймигу миллатрал къашайшала. Гайннава оьрмулул 82 шин хьума лапва заэвсса, зулу-ккулу тIий заназисса ия. Архсса зунттал шяраву ялапар хъана­хъисса ганал ялун бучIаймигу бакъая. Бакъанугу, га цичIав чанну акъая.­Къашайшалтрал дук­ра дукайханалуву зузисса, ялув цIарду кIицI ларг­сса хъаннил ганаха ляличIиссара аякьа дия. Цалла шардаллил дукра (нисирал, къавахърал буркив, дикIул ххункIругума) ларсун бучIайва. Цивппа чIарав щябивкIун, «къа­чча, ишттахI бакъар» тIий уна, нахIу махъру буслай канаки айва. Нава кIанттул хьуну, шамилчинмур кьини га къужлун ах­ттайнсса ларсун бувкIсса Зинахь цIувххуссия: — Зинай, му къужа вин гъансса урив? Мунаха вилгу, вищал дукра дачIайсса Арифалгу, Загьидатлулгу ляличIисса къуллугъ буллай буру­хха? Юхсса му бигар зуй хIакиннал бивхьурив? — ХIакиннал даруртталсса бан­ссар, яла дукралия къашайшала махъунай хьурчан, дарурттаягу хайр бакъассархха. Та дукра дукай къатлувун цал увхма жун хъама­къаитай. Ва адамина ур оьрмулул угьарасса, заэвсса. Жун захIмат къашайхха ванан палаталувунна гьантлун шамилла дукра ларсун бучIан. Гьай-гьай, укунсса къашайшалт шикку цагу-кIиягу акъар. — Барчаллагь, ссувай, ина дукра дачIуну бакъача, хIакинну бикIан лайкьсса инсан бура, — учав на. – ВицIун Арифагу, Загьидатгу. Гара кьини гьанттайнмай га къужлучIан дукрагу ларсун був­кIун, ишттахI бакъар тIий уна, ваму-тамур буслай, гужирай канаки уллалисса Арифахь, хъярчирай кунма: — Ина, Арифай, оьрчIал ясли-багъравугу зий буссияв? – куссия. Цила цIимилул бувцIусса, хъунисса яругу ттух шаврийну бурган бувну: — Жувагуру хъунив хьунтIисса, — куна, на цIуххин ччимур був­чIуну. Яла ххи бувна: — Ттулгур бусса хъунив хьусса нину ва ппу. Навагу мукьва оьрчIал нинура. Ганил увкумунил ттул дакIнивун цирив ца аьчухшиву дуртуна. Ххарисса асардал щатIи щалва чурххал базурдавух экьилавгуна. ЧIавахьулттивух чIалачIисса мюрш гъарал аьраттал дуккан дурсса дуниялгума цакуну чанна дурксса хханссия. Ганихь ххишала ссихI къадуккарчангу, ттухьва нава ку­ссия: «Щукру, Арифай, цIикIа тIий цила базурдава буцлацисса ва гьалак бувксса заманнай ина кунма­ссагу, Зина ва Загьидат кунмассагу инсантал чансса бакъасса, оьмунил хьхьичIалу хъинмунил бащан буллан, бурувгсса янийну, увкусса пишлийну, уздансса тIуллайну зулва лагма-ялттуми ххари буллан. Барчаллагь зун, ссурвал!». Мирза Давыдов