ЦIусса шинал байрандалийнсса хIадуршинна ва кIани-кIанттурдай муния бакъа хавардугу, утренникругу, бал-маскарадругу къадиркIссания, М. ХIажиевлул цIанийсса кIичIиравусса РАН ДНЦ-лул корпусрал жанахIраву Дякъил Тта­тта, Марххаладуш, Аьжужа къари ва цаймигу магьлул персонажру ххал хьусса, цакуну шиккун агьманал бакIраву «вайксса бунияла­сса элмурдаха зузисса аьлимтал ва пишакартал цалла элмурдаха, хъиривлаявурттаха, ахттаршиннардаха къазий, ци дуллай бурвав», тIисса пикри загьир хьунссия.

Залму АьбдурахIманова 
Мяйжаннугу, байрандалул хьунийнсса декабрьданул ца кьини академиялул идаралуву дия оьрчIал, музыкалул, тяхъасса балайрдал, хъярч-хъяхъавурттал чIурдал гиву элмулуха зун дакъа чара бакъасса, щинчIав дурчIин захIматсса паракьатшиву кIутIу-кIусу дурну, чантI учин дурсса. Ххуйсса аьдат цIакь хьуну дур Мазрал, литературалул ва магьирлугърал институт, Горно-биологиялул институт ва Прикаспийскаллал биологиялул ресурсирттал институт бусса РАН ДНЦ-лул корпусраву зузисса пишакартурал ЦIусса шинал байрандалул хьунийн, цалва оьрчIал гьунарду ккаккан буллалисса выставка ва мюрщулт барча бан магьлул персонажталгу гьурттусса, тяхъасса шадлугъ сакин дуллай.
Выставкалий тамашалун дирхьуну дия оьрчIал карунних дирхьусса, ца ЦIусса шинан дакъа, оьрчIан цанна ччан диркIсса, кулпатран, цала ужагъран, тIабиаьтран, гъинттул щархъавун лавгун ккаркмунин хасъсса, ччийкунсса журалул суратру. Вай дакъасса, жанахIраву тамашалун дуккан дурну дия тIабиаьтравасса мурхьирдал къяртрая, чIапIая, чагъардая, аьрщарая ва канилусса цаймигу материаллая дурсса экспозициярду ва экибанардугу. Мюрщултрал канила дуркмур мудангу тIааьнсса, най дуна ххира хьунсса дикIайхха. Тамашалун дирхьусса шиккусса гьарцагу сурат, композициягу дия дакIнил ласунсса, гъилишиву ва чани нанисса. 
Ххюра-ряхра шинал хьхьичI цалва уртакьтурал оьрчIал гьунарду укунсса журалий тамашалун ккаккан буван дакIнийн багьсса РАН ДНЦ-лул ПИБР-данул лабораториялул элмийсса зузала, жулва миллатраясса, Ттурциял шяравасса Мисиду Аьлиевал сипта шикку цIана хъинсса аьдатрайн кIура дарну дур. Ванил бусаврийну, цIубакIрай выставкалийн дуккан дайсса диркIун дур так цивппа зузисса институтрал пишакартурал оьрчIал суратру. Яла вайннал дуллалимур ххуй дизлай, выс­тавкалувух ва оьрчIащал дуллалисса шадлугъравух гьуртту хьун ччан бивкIун бур академиялул ва корпусравусса институтирттал пишакартурангу. 
«Жу шиккун цалла давурттив ларсун бувкIсса цавагу оьрчI къулагъас къадурну, бахшиш къадуллуну къакьабитайссар. Жул циняв профсоюзру цачIун хьуну, оьрчIансса бахшишру ларсун, тяхъасса шадлугъ сакин дувайссар. Ялун-тулунгу гьуртту хьун гъира бикIаншиврул, жулва оьрчIру ххуймунийн, хъинмунийн, марцIмунийн кIункIу баншиврул дуллалисса маданиятрал даву дур ва. Гьарцагу инсаннаву оьрчIнияцIава хIасул хьун аьркинссар ххуймунил, хIакьмунил, марцIшиврул гьану. Ва жу дуллалисса давугу, жул пикрилий, мукунсса мяъналий дуллалисса давур», - тIий бур Мисиду Юсуповна.
Хъунмасса барчаллагьрайгу бур, цалла-цалла элмулул хъиривлаявуртту кьадиртун, гьар шинал цила чIарав бацIайсса, цила кумагчитал, ПИБР-данул лабораториялул элмийсса зузала Милана МахIаммадовайн, Елена Пеняскинайн ва Зарема Биарслановайн.
Выставкалия махъ академиялул актовый залдануву хьунни, оьрчIансса елкагу, магьравасса геройталгу гьурттусса, Дякъил Ттаттал бахшишру дачIлачIисса, ссигъри бувчIлачIисса, личIи-личIисса конкурсирттал тяхъасса шадлугъ.