Ва шин цила ххуллий тIайла дуклай, ххуллухъин тIий, хъиривссаннун мара зунна хъалул гургагу куну жува кьабивтунну. Ихтилат ссаятур? Цал бусанна ттунма тамаша бивзмуния, зунгу тамаша бизантIимуния: Дагъусттаннал парламентрал депутатътурал кьамул дунни чIявусса оьрчIру хъуни був­сса ниттихъан паччахIлугърал награда, Ниттил орден, дулаван ккаккан буллалисса закон.

ТIайлассар, законопроект цал­сса цалчинмур ххалдигьавриву (первое чтение) кьамул дунни, бувар ттигу цIакь дуван. Бувар, гьаннайсса, ламу лавхъун тий бацIан… Законопроектмур, найбунува учинна, ххуйри. Дагъусттаннал ХIукуматрал ва БакIчинал администрациялул управлениялул хъунмур Асият Аьлиевал бувчIин бунни Ни­ттил орден дулавантIишиву 10 ягу ххишаласса оьрчIру хъуни бувсса ниттихъан. Яъни, му дур хьхьичIава Нину-Виричунан булайсса Мусил ЦIукул кIанттайсса орден.
Му Ордендалун лайкь хьу­сса ниттихъан, чIана-чIавама оьрчIан 3 шин шайхту, гьа, дулавантIиссар кунни 50 азарда къуруш арцулгу! Хъалул гурга бакъа цамур учинсса къалявкъунни мукунсса чумартшивруйн, сахаватшивруйн. АцIва (!) оьрчI бусса ниттин 50 азарда къуруш ца телевизор ласуннив, ягу ххюя оьрчIан ххуйсса куртка, пальто ласуннив? Аьрасатнал генофонд цIакь даврия гъалгъа тIисса, гъалгъа тIийнма бунува, циванни 10 оьрчI бувсса, хъуни бувсса ниттихъан маткапиталданул лагрулийсса арцу дулун къабучIисса? Шиккува кIицI лаган, кIива оьрчI бувнангу, ацIва бувнангу цара-ца маткапитал дулаву тIайлашивурив? ЧIявусса къабикIантIиссар 10 оьрчI бан сисласисса ниттихъул. ПаччахIлугърал Думалул депутатнал ца зурул харж хIисавсса 400 азарда къурушрагу дулара Ниттил Ордендалун лайкь хьуминнан. Ягу ччимур министерствалул чиновникнан кумагран дулайсса, чIявумур чIумаллив, аьлахъан, хIаз бан, игьалаган дулайсса 300 азарда къурушрагу дулара, ахир.
Хъалул гурграйну хъин битлайнувасса агьлуру жува. Аьдатгу хъанай буру хъалул гурграйнгу, хъалул дарвагирттайнгу. Хъявринсса хIукмурдайнгу.
Ца аваза буссия махъппур­ттуву МахIачкъалалив, авай, «маршруткардахсса багьри гьаз бан аьркинссар» водительтурал чавай, «къагьаз бан битанну» мэриялул чавай. Шагьрулул администрациялул баян бунни январь зурул 1-нния тинмай маршруткалухсса багьа 17 къуруш бикIантIишиву. Мяйжан­ссар, баян бунни автобусругу бикIантIишиву шагьрулувух занай. КIира нюжмардийсса багьри гьаз бан къабитанъяв туну мэриялул му аьлагъужа, му къув-аьс?
Баян бунни дарурттугу къаххирахьунтIиссар куну. Ноябрь зурул ахирданий 100 къурушран лавсъсса Нурофен, лахьхьу-цархьхьу 200 къурушран ласав на. Мисалла буцлацисса. Электротехника, телефонну ххира шаврия гъалгъавагу тIий бакъара. Дуки-хIачIиягу 10-15 процентрал ххира хьушиву баян барчагу хIукуматрал, антимонопольная службалул баян бунни 17-20 процентрал ххира хьушиву.
Бусанна ххуймуниягу! ЯлунчIил так ххуймуния буслангу, так ххуймуния чичлангу хIадурну бура. ИншаАллагь!