Уттигъанну Къазахъисттаннайн аьрххилийн лавгун, ххарисса чаннасса асардащал зана хьунни жулва гьунар бусса балайчи ва художница Жанна Кьурбанова. Ва лавгун бия Къазахъисттаннайн Актау шагьрулий дуллалисса Дагъусттаннал Культуралул кьинирдавух гьуртту хьун оьвкуну. Жанна, тихун лавгсса гьарцагу дагъусттанлув кунма, махIаттал-хIайран бувну бур та билаятрал, тиккусса инсантурал.

Бадрижамал Аьлиева
— Дагъусттаннал Культуралул кьинирдавух гьуртту хьун Къаза­хъисттаннайн бувкIсса жул итталун хьхьичIра-хьхьичI дагьунни тийхсса марцIшиву. Актау шагьру цуппагу бия авурсса, ябацIансса. Инсантал цивппагу ххишала дакъа хъинсса дакIру дусса, хъинну ларайсса культуралул заллухъру бия. Актау шагьрулул аэропортрай жу иминну, дакIнийхтуну хьунабавкьунну Къазахъисттаннайсса Дагъусттаннал диаспоралул, Дагъусттаннал миллатирттал Къазахъисттаннал областьрал культуралул центрданул председатель Щахщаев Юсуп АьбдурахIмановичлул ва НакIлил ва хлебо-булочный заводрал гендиректор Заретта Фаталиевал каялувшиннаралу. Ватанлувтал жул хьхьичIун бувккун бия ябатIин къашайсса ххуйшиву дусса тIутIал кацIурдищал.
Хъиривмур кьини дайдирхьунни цирда шадлугъру, батIавуртту. Тийх хъинну чIя­вусса лак ва лазги бия. Уку-укун­сса аьрххирдал, хьунабакьавурттал миллатирттал дянивсса дусшиву цIакь дуллали­ссар, халкьуннал дянив цIу-цIусса ламурду бихьлахьиссар, — буслай бур Жанна ва аьрххилия.
Тийх хьуну дур Жаннал суратирттал ва канил давурттал презентациягу. Хьуну дур Актау шагьрулул мэр Едил Терикбаевичлущалсса хьунабакьавугу. Мунан хъинну ххуй дирзун дур Жанна Кьурбановал суратирттавасса ца «Глаза в глаза» (БарцI). Жулва диаспоралул му, ххуйсса багьагу буллуну, машан ларсун, пишкаш дурну дур дагъусттанлувтурал чулуха Актау шагьрулул мэрнан. Мунал Жаннахь тавакъю бувну бур Актау шагьрулийн концертрал ва выставкалул программалущал бучIан.
Хъирив гьантрай жулва делегациялийн оьвкуну бур кIанттул филармониялул концертрайн. Хъинну дахханасса ярг-яргсса номердая сакин хьусса программа диркIун дур му концертрал, яла-яларив – жува аьдатсса, жунна хасъсса цукунчIавсса фонограмма диркIун дакъар тайнначIа, гъаннурагу. Фольклорданул ансамбльданул ккавкказуллал халкьуннал балайрдал программагу ккаккан дурну дур цалва тамашачитуран. Жулламур культуралухсса тайнналмур бургавугу хъинну личIлулсса диркIун дур, фонограмма ишла къадурну жулва Жаннал тIутIисса балайрдахгу хъунмасса гъирарай вичIидирхьуну дур, миннун лавайсса кьиматгу бивщуну бур. Укун, Жанна Кьурбановал чIунил ва усттарсса каруннил дур­сса давурттал ясир бувну бур къазахъ цивппагу, миннал дянив ялапар хъанахъисса дагъусттанлувталгу, хаснува лазги.
Хъиривмур кьини жулва делегация бувцуну бур мубараксса кIанттурдайн «Бекет ата» цIанилусса. Му аьрххилулгу вайннайн хъунмасса асар биян бувну бур. Му кIану бивкIун бур Актау шагьрулия 300 км. архну, ча-чунгу авлахъирттайхсса ххуллийх. «Шопан ата» тIисса кIанайгу бацIаву дурну дур. Аьрщарал лувсса зияратирттал, мизитирттал оьрмулухун хъамакъабитансса асарду кьабивтун бур гьарцаннал дакIниву. Миккун гьарцагу кьини хъинну чIявусса инсантал бияйсса бур.
Укун, хъинну рязийну, авадансса асардащал зана хьунни дагъусттанлувтал Къазахъисттаннайнсса аьрххилия.