ШАКИРУЛЛАГЬЛУЛ АРС КЪАРДАШОВ РУСЛАН
Декабрь зурул ахирданий, хархавар бакъа хьусса апатIрал, оьрмулул 41 шинаву жуятува личIи унни ххаллилсса гьунчIукьатIиричу Руслан Къардашов.

Руслан увну ур Дянивмур Азиянаву, Узбакисттаннай, 1974 шинал, уздансса нитти-буттал Къардашхъал Шакируллагьлул ва Къардашхъал Кумсиятлул кулпатраву. Руслан школа къуртал бувну махъ зий ивкIун ур ус­ттаршиву дуллай, цащава буван шайсса кушу буллай. Совет ХIукумат лирну махъ, ппугу аьпалухьхьун лавгун, ниттищал МахIачкъалалив зана хьуну, шикку ялапар хъанай уссия.
Руслан ия хъунанал хIурмат бусса, инсаннан кумаг буван мюхтажсса адамина. Цибан­ссар, Аллагьнал чичру укунсса духьунссия.
Русланнул бивкIулул кьур­чIишиву кIидачIлай, жижара буллай буру ванал ниттихь Кумсиятлухь, уссу-ссурваврахь, нитти­уссурваврахь, ниттил­ссурваврахь, цинявппагу гъан-маччаминнахь. Цал бунагьирттал аьпа баннав, гьав нурданул дуцIиннав, алжаннул агьулданувух хьуну ля­къиннав!
ГьунчIукьатIрал жямат

——————————————

МАХIАММАДЛУЛ АРС АьЛИЛОВ САЙДУЛЛАГЬ
ЦIусса шинал дайдихьулий, оьрмулул 54 шинаву, чIун дакъа­сса бивкIулул жуятува личIи унни Буршиятусса МахIаммадлул арс Аьлилов Сайдуллагь.
Сайдуллагьлул бувтсса, хъун бакъасса, аьчухсса оьрму эбратну хъанай бур му кIулсса цинявннанмагу. Монтажникнал пишалия айивхьуну, гендиректорнал къуллугърайн лавхъссар «ЮгСтроймонтаж» ООО-рай.
Сайдуллагь чIявучил чIарав авцIуссар, кумагру бувссар жямат­рангу, райондалунгу. ЧIивисса оьр­мулий мунал дурмуния чичларчан, кказитрал лажин диял къахьунссар. Мунин лавхьхьусса инсантурал ччавугу, хIурматгу, хIукуматрал лишаннугу ларсъссар.
Му ия жяматрал, миллатрал хIакьсса арс, цаламурнияр, чIявучин аьркинмур хьхьичI дузал буллали­сса. Буршиялгу, миллатралгу тарихравугу мунал цIанил лайкьсса кIану бугьантIиссар.
Щалвагу Буршиял жямат хъуннасса кьурчIишиву кIидачIлай, жижара буллай буру мунал кулпатрахь, душваврахь, куявнахь, уссурваврахь, ссурваврахь, щалвагу Бюхттул МахIаммадлул наслулухь.
Цал гьав нурданул дуцIиннав, алжан нясив баннав. Махънал оьрмурдай барачат бишиннав. Аммин.
Буршиял жяматрал чулуха КьурбанмахIаммад
Кьурбанов

——————————————-

ХЪУТIУЛ АРС ХЪУТIУЕВ ХIАМЗАТ
Тамансса хIаллай къашавайгу ивкIун, аьпалу­хьхьун лавгунни Лениннул ордендалул кIийла кавалер, захIматрал ветеран, 1-мур группалул инвалид ХъутIул арс ХъутIуев ХIамзат.
ХIамзат увну ур 1937-кусса шинал Бархъаллал шяраву ХъутIул ва Гьажардул кулпатраву. Буттал шяраву 7 классгу бувккуну, лавгун ур аьралий къуллугъ бартбигьин. Му лавхъун махъ, 1956 шиная айивхьуну, 2006-ку шинайн ияннин зий ивкIун ур Каспийскаллал «Дагдизель» заводрай фрезировщикну ва ххаллилну буллай ивкIсса захIматрахлу хIалалгу дурну дур Лениннул 2 орден ва чIярусса хIурматрал грамотартту, бахшишру, барчаллагьру.
Ххишала бакъа хъунмасса хIурматрай ивкIун ур ХIамзат цащала зузиминнал дянивгу, кIулминнал ва гъан-маччаминнал дянивгу, дакI-аьмал авадансса, уздансса хасиятрал заллу хIисаврай.
ХIамзат аьпалухьхьун лагаврил хъуннасса пашманшивугу кIидачIлай, дакIнийхтунуса жижара буллай буру ванал кулпат ПатIиматлухь, душру Рукьижатлухь ва Басиратлухь, ссу Хатахь ва махъсса цинявппагу гъан-маччаминнахь. Цал бунагьирттал аьпа баннав, рухI рахIатний дишиннав.
Бархъаллал жямат