Чачаннал бакIчинал пресс-службалул баян бунни МухIаммад Идавсил (с.аь.с.) карикатура ришлашисса магърибуллал СМИ-рдайн къаршийсса акция хьунтIишиву Грозныйлив. Чачаннал муфтиятрал сипталийну хьунтIисса му демонстрациялий гьуртту хьун тIий бусса бур кьатIаллил билаятирттаясса сий дусса инсанталгу.

П. Рамазанова
Январь зурул 14-нний дунияллийн бувккунни «Шарли Эбдо» журналданул цIусса номер. Мунил мужаллатрайгу цIунилгу Идавсил (с.аь.с.) карикатура дусса дур, журналданул лажинтирттайгу цаппара мукуннасса суратру. Шанма миллион тиражрал итабавкьусса журнал ца-кIира ссятрал мутталий хъямала бунни тIий баян буллай бур Европанал пресса.
Грозныйлив митинг дикIан­­тIишиву баян бунни январь зурул 19-нний ссят 10-нний кIюрххил. «Минутка» площадрачIату тIайла хьуну, АхIмад-хIажи Кьадировлул цIанийсса мизитрачIан бияннин бачин тIий бур демонстрациялийн бувкми. Чачаннал муфтий СалахI-хIажи Межиев ур митинграйн увксса гьарманахь, гиккува, майданнив чак баншиврул, дуаь даншиврул, чак­лилун бутай халичарду ласияра зущала тIий.
«Шарли Эбдо» журналданул 3 миллион экземпляр ца ссятрал дянив «бавххунавхьур», миннал хIукму бувну бур 5 (!) миллион ттигу итабакьин.
Ва ахирданийгу. Интернетраву бувсун бур Франциянаву 1890 шинал хьусса иширая. Франциянал чичу Марк де Парижлул Идавс (с.аь.с.) кьюкьин уллалисса спектакль ккаккан бувну бур, гацIана бусурманнал халиф Абдуль ХIамидлул франциянал паччахIнайн чагъар чивчуну бур му спектакль ккаккан буван къадагъа дувара тIисса. Франциянал паччахIналгу Султаннуйн жаваб чирчуну дур, спектакль кка­ккан бан къадагъа дуллали­сса резолюциялул жулва халкьуннал дянивсса дакьаву, дусшиву цIакь дувантIиссар тIисса. Мува спектакль Англиянаву ккаккан бансса хIарачатгу ссайнчIав къабувккун бур, Британиянал (танийсса бюхттул билаятрал!) му спектакль ккаккан бан сукку шаврихлува ялтту бучIияра куну бур Султаннухь. Вана укун. Ссавурданий ва аькьлулий.