Аьралуннаву къуллугъ буллалисса жулва жагьилтурая рязисса барчаллагьрал чагъарду бувкIукун аьрали командованиялул чулуха, хъуннасса ххаришиву дикIай жагьилнал нитти-буттан, гъан-маччанан дакъассагу, щалагу щарнил жяматран, хаснува цIанасса, аьрали частирдаву саллатIнал дуллалисса тIулдакъашивурттая чIявуну баллалисса, чIумал. Мукун ххарисса хаварданущалсса чагъар бувкIунни уттигъанну Ккурккуллал шяравасса Аьвдуразакь ва Тутубика ЧупаловхъачIан вайннал тарбия увсса душнил оьрчI Сагидов Мурад Гъазиевич къуллугъ буллалисса Камчаткаллал крайрайсса 25030-15 аьрали частьрава.
А. Аьбдуллаева
Ва частьрал командир, 1-мур ранграл капитан Б. Богуш хъунмасса барчаллагь тIий ур Мурадлул бава-ттаттахь укун ххаллилсса жагьил тарбия увну тIий.
Мурад хъуна хьуну ур бава-ттаттачIа Ккурклив. Шиккува школагу къуртал бувну, 2013 шинал ноябрь зуруй лавгун ур аьралуннаву къуллугъ бан. ЧIирисса чIумул мутталий ас-намус бусса, мяърипатрал увччусса жагьил ххира хьуну ур командиртуран ва архIал къуллугъ буллалиминнан.
— ХIурмат бусса Аьвдуразакь МухIадович ва Тутубика ЖахIпаровнай!
Зул душнил арс Мурад къуллугъ буллай ур дакI марцIну, цайми аьралитуран эбратну. Ва цайнма тапшур бувмур лажин кIялану бартбигьлагьисса, аьралуннал низам ххуйну кIулсса ва мунийн мютIисса, яхI бусса жагьил ур.
Щак бакъар Мурад хъиннува сивсуну, кьянкьа-кьурчIи хьуну аьралуннавагу зана хьуну, уттиния тихунайгу зуха аякьа дуллай зул чIарав ацIлай икIаншиврийн, — тIий чивчуну бур аьралуннавасса чагъарданий.
Ххюва цалами оьрчIругу хъуни бувну, цалва-цалва ххуллийн бивчуну, оьрчIал оьрчIангу ххуйсса тарбия дулун хIарачат буллалисса Аьвдуразакьлущал ва Тутубикащал ва ххаришивугу кIидачIлай, Мурадгу дакI ххарину зана хьуннав тIий дуаьлий бур ва кулпатрал хIурмат бусса шяраваллил жямат.
Зу ттиния тихунмайгу зула оьрчIалгу, оьрчIал оьрчIалгу ххари буллай личIаннав.
