Декабрьданул 30-нний МахIачкъалалив Дагъусттан Республикалул Культуралул министерствалуву хьунни ххарисса шадлугърайсса батIаву.
Бадрижамал Аьлиева
Ва кьини ХIурматрал грамотартту дуллай бия ДР-лул Культуралул министерствалул «Культура – детям села» проект иширайну щаллу дуллалисса давурттавух шинал мутталий хьхьичIунсса гьурттушинна дуллай бивкIминнан. Шиккун бавтIун бия республикалул личIи-личIисса дуккаврил идарарттал преподавательтал, шагьрулул музейрдал вакилтал, актертал ва чIявусса цаймигу пишакартал.
ДР-лул Культуралул министерствалул ХIурматрал грамотартту дуллуминнавух къачанъя лакгу: Апанни Къапиевлул цIанийсса Лакрал театрданул артистал Саният Рамазанова, Луиза Шагьдилова, Аслан МахIаммадов, Дагъусттаннал филармониялул ва Г. ХIасановлул цIанийсса Музыкалул училищалул концертмейстер, гьунар бусса оьрчIансса Мурад Къажлаевлул цIанийсса школалул фортепианолул преподаватель Амина Гунашева (ш. Шахьуйми).
Вайннахь ва махъсса цинявннахьвагу барча тIий бахшиш, чIа тIий буру цIусса шинаву цIу-цIусса ххувшавуртту, хьхьичIуннайшивуртту.
