Декабрьданул 3-нний МахIачкъалалив Расул ХIамзатовлул цIанийсса Миллатрал библиотекалуву хьунни Аьрасатнал искусствалул лайкь хьусса ишккакку, АьФ-лул Музыкалул обществалул член, Дагъусттаннал халкьуннал артист, Аьрасатнал ва Дагъусттаннал ПаччахIлугърал премиярттал, Дагъусттаннал Лениннул
комсомолданул премиялул ва ХIажи МахIачевлул фондрал премиялул лауреат, профессор, пианист, актер Хан Башировлул 60 шинал юбилейран хас дурсса музыкалул вечер.
Бадрижамал Аьлиева
Муний махъру лавхъунни цикссагу инсантурал. Миллатрал библиотекалул директор Аьли Аьлиевлул цалва ихтилатраву кIицI лавгунни Хан Башировлул хъунмасса бутIа бивхьушиву музыка хьхьичIунмай бавриву ца Дагъусттаннай бакъа, мунил кьатIувгу, цIанагу зий ушиву ва цалла бусравсса даву дуллай.
Аьрасатнал ва Дагъусттаннал культуралул лайкь хьусса ишккакку, композитор Кьасум МахIаммадовлул бавтIми кIул бунни Хан Мирзахановичлул творчествалущал, щаллу бунни цалла репертуарданувасса цаппарасса балайрду.
Хан Баширов барча уван бувкIун бия лакрал шаэр, Дагъусттаннал культуралул лайкь хьусса зузала Ссугъури Увайсов, муналгу увкунни юбилярная хъин-хъинсса махъру, мукунма «Насип» ансамбльданул каялувчи, Аьрасатнал лайкь хьусса артистка Галина Кьурбанова. Ванищал архIал бувкIсса чIава къавтIалтрал ккаккан дунни къумукьнал къавтIаву.
Ва кьини юбилярнал цалвагу щаллу бунни Дагъусттаннал композитортурал цаппарасса произведенияртту.
Вечерданул лагрулуву хьунни «Яркий самобытный талант» тIисса выставкагу.
Хан Мирзаханович ххаллилсса пианист акъассагу, кIулсса куццуй, ур гьунар бусса актергу. Ва вечерданий ккаккан бунни «Тайна рукописного Корана» фильмравасса парча. Муниву дургьусса рольданухлу, Хан Баширов лайкь хьуссар ДР-лул ПаччахIлугърал премиялун. Мукунна ххаллилну ванал дургьуссар роллу «Похождения графа Невзорова», «Сказание о храбром Хочбаре», «Шамиль», «Платон» художествалул фильмрдаву, гьурттушинна дурссар «Мир Кавказу», «Мы верим», «Мурад Кажлаев. Снова в горы», «Моя дорога. Расул Гамзатов» документал фильмрдаву.
Хан Баширов увну ур 1954 шинал. 1978 шинал Ханнал къуртал бувну бур Астраханнал паччахIлугърал консерватория, 1988 шинал – ДГУ-рал тарихрал факультет.
2002 шинал СМИ-рдал Хан Башировлуйн «Человек года» увкуссар. 2002-2004-ку шиннардий ванан буллуссар Аьрасатнал Президентнал стипендия.
