ХIАЖИМУРАДЛУЛ ДУШ КЪАРДАШОВА АСИЯТ
Хъунма хIаллай къашавайгу къавхьуну, цуппа ххирасса арсругу, арсурваврая бивзмигу, арсурваврал хъамигу къума-банд лаган бувну, дакIний-мазраймур бусай­сса ххирасса ссу Аслигу, муния бивзмигу цачIава хIурматрайсса ссийцIа, ниттирссийцIа бувну, ноябрьданул 23-нний аьпалувух бивхьунни дакI-аьмал хъинсса, яхI-къирият уздансса, дяъвилул щавщи бивсса, оьрчIшиву къа­ккарккун най буна хъуни хьусса оьрчIавухсса ца, ду-дакъасса къарцин шиннардил захIмат-жапардал сасан бувсса зунттал душ, хIакьсса нину, ГьунчIукьатIрал шяравату­сса ХIажимурадлул душ Къардашова Асият.

Асият бувну бур 1933 шинал ГьунчIукьатIрал шяраву ХIа­жимурадлул ва Нинул кулпатраву. Школа къуртал бувну махъ фельдшер-акушер шайсса училищагу бувккуну, зун бивкIун бур 1957 шинал БахIикIуллал шяравусса фельдшер-акушерский пунктрал хъунмурну. ХIурматрай бивкIун бур, цалва шяравунал бакъассагу, лагмасса щархъиял инсантурал дянивгу. Жагьилсса оьр­мулий итххявхсса зузала бушиву тасттикь бувну бур цуппа зузисса шяравугу, райондалийминначIагу. 1959 шинал, цила язи увгьу­сса гьалмахчу, оьрмулул уртакь Къардашов Аьбдулманаплущал кулпатрал хьуну, бивзун бур Каспийск шагьрулийн. Цилва язи бувгьусса пиша ххирасса Асият шагьрулийгу оьнма бивкIун ба­къар. Зун бувххун бур фельдшерну подсобный хозяйствалул шамулчинмур участокрайн. Шиккугу хъунма хIал къабувну, хъиннура кIулшивурттугу лахъ дуван, цинма кIулмургу инсантуран хайрданунну ишла буван, бувххун бур Асият 1961 шинал Каспийск шагьрулул оьрчIру бай къатлуву фельдшерну зун. Муния махъ, 2011 шинайннин, хаингу къавхьуну бур я цилва язи бувгьусса пишарайн, я оьрчIру бай къатлуйн. Ванин ялу-ялун ххира хъанай бия цилва оьрчIнийва язи бувгьусса пиша, хIурматрай бия архIал зузиминнал дянив, мува пишарай зузи бувуна чIивимур ссу Аслигу. Дуллуна Асиятлун бахшишру, хIурматрал лишаннугу дакIнийхтуну бувсса захIматрахлу. Багу къабяйкьуна оьрмулуву ва пиша язи бугьаврия.
Асиятлул ва Аьбдулманаплул хъуни бувну бур кIия арс, дуллуну дур миннан ларайсса кIулшивуртту, яла-яла лахьхьин дурну дур зун­тталчунал яхI-къирият, хъунанал хIурмат-иззат, даву нахIушиву, нитти-буттачIансса ччаву, буттал улклухсса щабуцаву. Асият (бунагьирттал аьпа биву) цурда ца кьини мяшну къаливчIуна душру бусса бавахъай, буну тIий ванил кIиягу арс цилва хIурматрайсса, душварал къабанмур буллалисса, цIими бусса. ЧIа тIунгу бикIайва гьарца лакку баван укунсса арсру.
Асият аьпалухьхьун лагаврил къумашивугу кIидачIлай, жижара буллай буру ванил оьрчIахь Аьла­нахь, Русланнухь, ссихь Аслихь, оьрчIал оьрчIахь, арснал хъаннихь, ссурваврая бивзминнахь, цилва ва ласнал щалвагу агьлу-авладрахь. Ванил барачат махъ ливчIун лякъиннав. Асиятлулгу рухI кIукIлуний, ссихI бигьаний хьуннав, пирдавс-алжаннул ххари баннав. Махънал оьрмурду лахъи баннав. Амин.
ГьунчIукьатIрал жямат,
дустал, кIулми

————————————————

МИРЗАЛ АРС АЛХУЛАЕВ ОЬМАРИ
Нанисса шинал ноябрьданул 18-нний, захIматсса азаруннища ххассал ан къавхьуну, оьрмулул 52-сса шинаву Москавлив азарханалий аьпалул хьунни ас-ламусрал увччу­сса зунтталчу, кIулшиву дулаврил пагьму лавайсса минахур Алхулаев Оьмари Мирзал арс.
Оьмари увну ур 1962 шинал Ккуллал райондалий, Ккуллал шяраву республикалий чIявучин кIулсса машгьурсса ризкьичи, Лениннул урдиланнал Алхулавхъал Мирзал ва нину-виричу Маликатлул кулпатраву. 1979 шинал буттал шяраву школагу къуртал бувну, ца шинай яттичIа ивкIун ур, яла кIира шинал мутталий – Германиянаву аьралий къуллугърай. 1983-1988 шиннардий МахIачкъалалий Да­гъусттаннал пединститутрал англо-географический факультет къуртал бувну махъ кьурахъул шиннал мутталий шавкьирай ва бусраврай зий уссия Къизлардал шагьрулийсса школардай ингилис мазрал ва географиялул дарсру дихьлай. Гания махъ, заманалул щавщи щухьун­ссия, касму даххана дурну, зий уссия строительнал, столярнал давурттай усттарну. Амма вай махъсса шиннардий Оьмари къарши хъанан ивкIукун, захIматсса аьзаруннищал талай, хъирив уклай уссия. Унугу, ххассал ан къабювхъуна. Мукунсса духьунссия чичру.
Оьрмулул чагъираву Оьмари лагаврил хъуннасса кьурчIишиву дакIнийхтуну кIидачIлай буру мунал аьзизсса кулпатращал ПатIи­матлущал, арснащал Камиллущал, душваращал Маринащал ва Лауращал, уссурвавращал, ссурвавращал, гъан-маччанащал. Алжаннул ххари аннав цув, рухI хъинний дишиннав! Амин.
Ккуллал жямат

————————————————-

Шамиллул аьпалун

Тти ина жун ххишала
Ххал хьун тIий акъассарав,
Утти Саланна-Зунттуйн
Сил диртссарив тIий буру.

Къагьассарив вил ниттин
Нязаннив ппу ивчIаву,
Цан дував мунил дакIний
Ца ттигу чулу щаву.

Цанъявав ххира нину
ЛухIи лаххан дувайсса,
Цанъявав утта хъачIру
ЛухIи гьаттал дугьайсса.

Жул банавша тIутIул ар
Аргъирай хъяхъа тIисса,
Бювхъу чассагул хIавий,
Нязаннив кIигъавгъусса.

Ци тахсир хьунававли
Вил уссу ХIусайннуща –
Я уссу, я ссу бакъа,
Ялгъузну личIан уван.

Вих аьтIийннасса ниттил нину,
ш. Бурши