Ноябрьданул 26-нний «Каспийский завод листевого стекла» ОАО-лий хьунни Открытая власть» сериялувасса ДР-лул БакIчи Рамазан АьбдуллатIиповлул тIайланнасса эфирдануву халкьуннащалсса ихтилат. Ихтилатрал тема дия «Дагестан: курс на очищение и обновление».
БакIрайва ДР-лул БакIчинал бувсунни пюрунтру байсса заводрал хIакъираву ва тIайланнасса эфир ва заводрая даврил сававрая: «Жува аьркинссар производствалучIан, зузалтрачIан, элмийсса ва техникийсса интеллигенциялучIан гъанну бикIан, бугу бикIантIиссару», — увкунни Р. АьбдуллатIиповлул. Хъиривмур эфир, Дагъусттаннал БакIчинал пикрилий, дикIан тIий дур колхозрал хъувату, тиккугу захIматнийн багьсса масъалартту гьарзану бухьувкун.
Республикалул экономика лядуккан даврил хIакъираву Республикалул БакIчинал увкунни: «Дагъусттан хIакьину чялишну зий бур импортзамещениялул бутIуву – «Дагдизель», КЭМЗ ва цаймигу предприятияртту зий бур, зунгу аьркинссар хьхьичIунну. Дуккан дуллалисса хъус дикIан аьркинссар конкуренция духIан бюхъайсса, Каспийскаллал пюрунтрал завод кунмасса».
Яла ДР-лул БакIчинал бувсунни региондалул социал-экономикалул ккаккиярттал хIакъираву. Мунал мукунма бувсунни налогирттал база щаллу баврил агьамшивруятугу, хаснува муниципалитетирттай, шагьрурдай ва районнай. «Ттул пикрилий, ттул командалуву зий бур яла марцIну ва мюнпатну зун бюхъайми, мукун зун къабюхъайма тава-тагу укьантIиссар командалува. Жулва задача – республика мюхчансса ва уздансса даражалул ххуллийн дуккан давур…», — увкунни Р. АьбдуллатIиповлул.
Республикалул хъунаманал личIину бувсунни республикалул гужирдал ведомстварттал дуллалисса давурттая. Ганал мукъурттийн бувну, хIакьину тамансса дахханашиву хьуну дур террорчишиврущалсса ва экстремистшиврущалсса талатавриву.
ДР-лул БакIчинал гьартану бувсунни аэропортрал ва МахIачкъалалив бияннинсса ххуллул реконструкциялияту. «Дагъусттан цIубуклай бур. ХIакьину къашайссар флешкардайну инсантал нигьачIакIул буллан, утти чIявуми фанатиктал паракьат хьуну бур, республикалий чан хьуну дур терактру, литIавуртту. Мунияр ххишалагу, хIакьину Дагъусттаннал уммат группировкардайх бачIлай бакъар», – увкунни Р. АьбдуллатIиповлул.
Дагъусттаннал БакIчинал бувсунни республикалул СМИ-рдал давриву цукунсса масъаларттах къулагъас дуллан аьркинссарив. Ганал увкусса куццуй, СМИ-рдай гьар зуруй дикIан аьркинссар приоритетсса проектру дузрайн дуккан дуллалавриясса рубрика, жулва прокуратуралул низам дишавриясса, агьалинал мурадру буруччавриясса, силистталул комитетрал дуллалисса давурттаясса рубрикартту, материаллу.
Рамазан АьбдуллатIиповлул сукку дунни цаппара инсантал дукралия инкар шаврил (голодовка) тема. Мунил хIакъираву ганал увкусса куццуй, га даву дан дуллай бур дукралия инкар хьуминнал махъ бавцIусса инсантурал. Миннал мурад бувчIлай бур – тагьар оьлуккин даву. Му тачIав къахьунсса затри.
«Хъиривмур масъала – шиннардий зий бакъару ялун личлачисса къалмакъаллал хьхьичIалу кьукьавриха. Яла, гай масъалартту оьнийн багьувкун, ми къалмакъаллу федерал даражалийн дуккан дуллай буру. Мукун къабучIиссар. Аьркинссар бакIрайва масъалартту щаллу буллан муниципалитетрал, райондалул даражалий, яла – хIукуматрал ва БакIчинал даражалий», — увкунни Р. АьбдуллатIиповлул.
ДР-лул БакIчинал бувсунни Аьрасатнайн къаршисса экономикалул санкциярдал хIакъиравугу, ми санкциярдал асар куклу баншиврул республикалий буллалисса хIарачатирттаятугу.
Яла байбивхьунни Президентнахьхьунсса суаллу буллай. Интернетравух Р. АьбдуллатIиповлул страницалийн бувкIунни МахIачкъалаллал инсантал гьалак буккан бувсса маршрутрал таксирдай декабрьданул 1-нния тинмай дяхтта 17 къуруш ва ахттакьун чIумул 8 ссятрая махъ 20 къуруш даврил масъалалул ялувсса суал. Мунин жаваб дуллай, Дагъусттаннал БакIчинал увкунни: «МахIаммад ВалибахIандович шагьрулул мэрнал къуллугърай ивтсса чIумал, ганал увкуна, личIи-личIисса журардал закондалий дакъасса арцурду ласласаврил хьхьичIалу кьукьин аьркиншиву, мунийн чул бивщуну бюхъайссар ххуллухсса багьа чан бангу. Цалсса ххуллухсса багьри гьаз баврил хIукму кьамул бувну бакъар».
МахIаммад Сулаймановлул бувсунни му масъалалуву хасну низам дишин тIий душиву шинал ахирданийннин. ДР-лул ХIукуматрал Председатель Аьбдуссамад ХIамидовлул бувсмунийн бувну, гьашину цIусса шин дучIаннин МахIачкъалалив занан тIий бур цIусса 55 автобус.
Республикалул БакIчинал жаваб дуллунни аэропорт зий байбишаврил хIакъиравусса суалданухьхьун. Ганал увкусса куццуй, цIана аэропорт цIубуккан буллай бур, давуртту щаллу хьувкун, шикку бантIиссар цIусса Дагъусттаннал авиакомпания.
Суал буллунни Гимры шяравалличIасса сива тIитIаврил хIакъиравугу. ДР-лул БакIчинал бувсъсса куццуй, сива ларкьуну дур тикку террорчитал лабивкIун бивкIун тIий, КТО дан багьну бухьувкун. Ганал тавакъю бунни га шяраваллил жяматрахьгу, махъсса дагъусттанлувтурахьгу ихтиярду дуруччай органнан кумаг буллан, щалла шярава террорчитал буккан буллан, жулла ихтиярду, тархъаншивуртту ссуссукьу дуллан щищачIав къабюхъаваншиврул.
Суаллу бия сельхозтехника лизинграй ласун бюхъаврил хIакъираву, фермернал хозяйствалун кумаг баврил хIакъираву, цIинцI-ччюрк ду-дунийра кьаритлатиминнай аьчIа дишаврил хIакъираву, инвалиднан зузи кIану щаллу баврил хIакъираву ва цаймигу. Ми циняв суаллахьхьун Республикалул БакIчинал дуллунни балжисса жавабру.
ХIадур бувссар
ХIасан Аьдиловлул
