Декабрьданул 1-нний МахIачкъала шагьрулул маршруткардах 17 къуруш тIалав дуллай бия, муния рязи бакъасса инсантал бия телевизорданувух багьа ххи баврия баян къабунни шагьрулул администрациялул, ккаккан ба администрациялул хIукму тIий. Маршруткалул шофер ия, жухь багьа ххи бан аьркиншиву механикнал бувсунни тIий. Му цу механикри куну цIувххукун, буслайгу акъая чувсса цу механик уссарив. Даврийн увкIун телефондалувух оьвкуну кIул бував му ивкIшиву «Махачкалатранс» организациялул зузала. БувчIлай бакъар ганахь ци ихтияр диркIссарив маршруткардахсса багьри ххи бара тIун шофертурахь.
«Махачкалатрансрая» ихтилат сукку хьувкун, бусанну укунсса затгу. «Махачкалатранс» ва «Махачкалатранс-1» тIисса 2 организация дур шагьрулий, микку зий ур сайки 120 инсан. Ци дуллалиссар миннал? Ссан аьркинссар миксса зузалт? ЦIухху-бусу бувну кIул хьунни, миннал гьарца кьини ххал дуллан аьркинссар маршрутрайн дуклакисса транспорт, тикку бусса бур механиктал зий. Амма иширайну маршруткарду ххал къабайсса бур, зуруй цал ххал баврийну гьа шайсса бур. Мунияту чIявусса ишру шай ххуллийх най буна пассажир ликкан бувну, машина зия хьуну бурча, цамуний щябикIияра чайсса. Маршруткардал шофертал бур, 120 инсан лап чIявуссарча, ца 40-50 инсан гьассар ца организациялий, тIий.
Гара кьини, декабрьданул 1-нний, ахттакьун чIумал «Дагестан» ГТРК-лул ва «Дагестан» РГВК-лул ккаккан дунни ДР-лул Президентнал уполномоченный Аьлибаг Аьлиевлул маршруткардал шофертуращалсса «разборкарду». Миннул ахир хьунни цалсса, цIусса шинайннин, багьри лахъ къабан. Р. Аьлиевлул бувсмунийн бувну, цIана ми «Махачкалатранс» ва «Махачкалатранс-1» МУП-ирдал даву ххал дуллай бур, миннал коммерциялул транспортраяту ратIлатIисса арцурду (3200-5000 къуруш цаннаяту) чун най дурив хъирив бацIлай бур. Декабрьданул ахирданийннин масъала чулийн буккан бантIиссар ва багьа циксса ххи бан бурив кIул бантIиссар. Цалсса ххуллул багьа личIлачIиссар 14 къуруш.
Халкьуннал зумувгу, мазрайгу бур жяматрансса транспорт (автобусру ва троллейбусру) циван бакъассар тIий. 2012 шинал баян бувну буссия, муния жугу чивчуну буссар, республикалун 300 автобус заказ бувну буссар тIий. Му щялмахъну хьунни. ДукIу буссия 200 автобус бучIантIиссар тIий чивчуну ДР-лун промышленностьрал ва транспортрал министрнащалсса ихтилатраву. Утти, вай гьантрай, ДР-лул БакIчинал тIайланнасса эфирдануву ДР-лул ХIукуматрал Председательнал бувсунни МахIачкъалаллан 55 автобус бучIантIиссар тIий. Бурганну му ссайн буккайрив. Жяматрансса транспорт дакъахьурча, маршруткардал шофертал ялтту бивхьуну ттярзлий гъалгъа тIий бур, цанма ччикунсса багьа тIалав буллай бур, даврийн къабукканну тIий агьалигу, шагьрулул хъунимигу нигьал буллай бур. Мунияту республикалул шагьрурдай автобусру ва троллейбусру чара бакъа аьркинссар. Бурхха ми занай Грозналий. На гьашину гъинттул хьура Грозналий, тикку автобусрах 10 къуруш ласай, автобусру инсантурал бувцIуну занай бур, амма маршруткарду МахIачкъалалив кунма ккуччу тIий бувцIуну занай бакъар, бачIвасса кIанттурдугума личIай. Циванни жучIавагу автобусру занази къабан, маршруткардайн щалла хъаргу къадуртун?
