Вай гьантрай Ингушетиянаву хьунни Щалвагу Аьрасатнал конференция «Сердце матери — сердце России» цIанилусса. Мунивух жулла республикалия гьуртту хьун лавгунни «Матери России» цIанилусса Щалвагу Аьрасатнал жяматийсса суккушиннарал Дагъусттанналмур отделениялул председатель МахIаммадова Таисагу.
Конференция хьуну бур Ингушетиянал Республикалул БакIчинал, АьФ-лул Федерал Собраниялул Федерациялул Советрал вакилтурал ва цаймигу хъуни-хъунисса къуллугъчитурал гьурттушиврийну. Конференциялувух гьуртту хьуну бур жулва билаятрал 62 региондалиясса делегациярду, миннувух Къиримнавасса ва Севастополлаяссагу, рувхIанийсса управлениялул вакилтал.
ХIурмат бусса хъамаллуравух бивкIун бур Ухссавнил Ккавкказуллал ГО-лул, тIабиаьтрал бала-апатIирттал иширттал, чрезвычайный ситуациярттал ликвидациялул региондалул центрданул начальник Николай Литюк, Ухссавнил Ккавкказуллал бусурманнал Координациялул центрданул председатель Исмяил Бердиев, МахIачкъалаллал ва Магасуллал епископ Варлаам ва цаймигу.
Конференциялий ххалбивгьуну бур Украиннайсса тагьардануцIун, кулпатрал чул буруччаврицIун бавхIусса масъалартту.
«Жува хIакьину шиккун бавтIун буру дунияллий яла ххирама яла хьхьичIунма инсаннал — ниттил, савлугъран. Жуятува хIакьсса инсантал хьун бувну, жува тарбия бувсса цинявппагу ниттихъал хьхьичI ник ришлай бура на. Хъунмасса барчаллагь Ингушетиянал БакIчинан, профсоюзрал организациярттан, «Матери России» региондалул суккушиннаран, укун ххаллилсса даврихлу», — увкуну бур «Матери России» жяматийсса суккушиннарал председатель Валентина Петренкол. Гихунмайсса ихтилатраву ванил кIицI лавгун бур республикалий буссаксса хIаллай цивппа кIул хьушиву ингушнал авадансса тарихращал, культуралущал, кIул хьушиву цанма шикку ялапар хъанай бушиву цайми миллатирттал хIурмат бан кIулсса, бусса инсантал.
Ингушетиянал Республикалул Федеральный инспектор Виталий Смирновлул дурккуну дур Аьрасатнал Президент Владимир Путиннул чулухасса адрес.
Гихунмай хьуну бур чIяву-чIявусса цайми ихтилатру, кулпатрайн, ниттийн багьайсса, миннал ихтиярду дуруччавриясса.
Конференциялул ахирданий, мунил хIасиллайн бувну, цаппараннан дуллуну дур ХIурматрал грамотартту. Кулпат цIакь бавриву бихьлахьисса хъунмасса захIматрахлу, чIярусса шиннардил дянивсса жяматийсса ва политикалул даврихлу, Ниттил кьинилунгу хасну, Ингушетиянал Республикалул БакIчинал ва «Матери России» Щалвагу Аьрасатнал жяматийсса суккушиннарал чулухасса ХIурматрал грамоталун лайкь хьуну бур Таиса МахIаммадовагу.
Укун, бахшишращал ва гихунмай зунсса гужрал ва гьавасрал бувцIуну, рязийну зана хьунни Таиса Билаловна Ингушетиянава.
