ЦIуссалакрал райондалийсса оьрчIал ва мюрщи жагьилтурал спортрал школалий (ДЮСШ) ларгунни Пекиннайсса олимпий тIуркIурдал призер, спортрал мастер Мурад ХIайдаровлул завалунсса лачIун буккаврил VI-мур турнир. Бяст-ччалливу гьуртту хьунни республикалул районнаясса ва шагьрурдаясса 75 спортсмен, мукунма Чачаннавасса ва Самаралиясса спортрал вакилтал.
Гьарица шинах ва турнир дувай райондалий лачIун буккаву машгьур даву, жагьилтал цIуллу-сагъсса оьрмулийн кIункIу тIутIи баву, ми спортрахун бичаву мурадрай.
Турнирданий гьуртту хъанахъисса спортсментал ва хъамал барча буллалисса ихтилат бунни ЦIуссалакрал райондалул бакIчи ХIажи Айдиевлул, СССР-данул ва Аьрасатнал лайкь хьусса тренер, АьФ-лул лачIун буккаврил хъунама тренер МахIанмад ХIусайновлул, ДР-лул Халкьуннал Мажлисрал депутат Зайнуллагь Мирзоевлул.
Соревнованиялий гьуртту хьунни 50-нния 97-ннийн дияннинсса килордал кIушиву дусса спортсментал.
Цалчинсса кIанттурду бувгьунни Рамиз ХIамзатовлул (50 кг.), Сулайман Амираьлиевлул (55 кг.), Адамгири Межедовлул (60 кг.), Шуайп Лабазановлул (66 кг.), Хасавраясса МахIанмад ТIагьировлул (74 кг.), МахIачкъалалиясса Амин Агалхановлул (84 кг.) , Хасавраясса Шамил МахIанмадовлул (96 кг.). ХьхьичIунсса кIанттурду бувгьуминнан дуллунни арцуйнусса бахшишру, кубокру, ХIурматрал грамотарду ва спортрал яннарду.
Шиккува кIицI бан, ва турнирданий ххув хьуминнан бахшишру дансса харжлугъ гьарца шинал цала бакIрайн ласай Мурад ХIайдаровлул дустурал ва гъан-маччанал.
