Гъумучиял лицейраву хьунни Лакрал райондалул учительтурал ирглийсса батIаву. Муний гьуртту хьунни: Бавасулайманова Роза (Гъумучиял школа); Исмяилов Аьвдулмажид, Нажаева Анисат (Гъумучиял лицей); Какваева Дайганат (ШавкIуллал школа); ХIусайнаева ПатIимат (ЧIарттал школа); ХIажиева Наида (Кьубиял школа); Кьурбанова Бадрижат (ГьунчIукьатIрал школа); ЦIаххаева Сивана (Щардал школа); Сулайманова Индира (Хьурттал школа); Гъазалиева Саният (Карашрал школа); Шихлаева Абризат (КIундиннал школа); Мавраева ХIабибат (Ххюлуссуннал школа); Кьадиров Мурсаби (ЧIурттащиял школа).

Зулайхат Тахакьаева
БатIаву дачин дурну бия КIулшиву дулаврил управлениялул лакку мазрал дарсру дишаврил методист Буттаева Каминат.
БатIаврий ихтилатру бия шиная-шинайн чIяву хьурча бакъасса, чан къашайсса лакку мазрал дарсру дишаврил буруккинттая. Анжагъ, ца Исмяилов Аьвдулмажид личIаннин, сайки цинявппагу учительтал кIицI лаглай бия оьрчIру лакку мазрай гъалгъа тIутIи бан захIмат хъанай бушиву, мунил ялув оьрчIал нитти-буттахъахь шикаят байхту, гайннавугу чIявуминначIа ниттил маз ккалли-сан бакъашиву асар хъанай бушиву. Хаснува махъсса шиннардий, ЕГЭ-рду сававну,10-11 кла­ссирттал дуклаки оьрчIал лакку мазрал дарсирдахсса къулагъас хъиннура чIири хьушиву. Аьвдулмажид Исмяилов тIурча ия цаллами дарсирдай оьрчIал так лакку мазрай бакъа гъалгъа къабайссар тIий, цанчирча оьрус махъру ихтилатраву хIала буллалисса оьрчIахь ганал учайсса бур, цан оьрус маз къакIулссар, куну. Дуклаки оьрчIру оьрус маз къакIулсса учительнай махIатталгума хъанай бикIайсса бур, цайми оьрчIахь жул учительнан оьрус маз къакIулссар, тIий буслангу бикIайсса бур. Аьвдулмажид Исмяилов цувагу ур лакку маз марцIну ябаврицIун, му авадан бангу бунияла хIарачат буллалисса хIакьсса патриот-муаьллим. Тамансса махъру бур ттунмагума ваная бавсса. Масалдаран, ва тIий ур космос тIисса махъ бурхха лакку мазраву аьлам. Космос тIисса мукъуя хьуну бур космонавт тIимур махъгу, циванни ла­кку мазраву аьламчи тIисса махъ ишла къабан, тIий. Ванащал лицейраву дарс дихьлахьисса Анисат Нажаевагу дакI дарцIуну бур дуклаки оьрчIачIа лакку мазрал хIурмат бушиврул ягу бакъашиврул хъунмур бияла учительтурахь бушиврий. «Ванахха Аьвдулмажид Амсаруллагьовичлулми дуклаки оьрчIру лакку мазрал дарсру хъинну гъирарай лахьлай», — увкуна ванил.
БатIаврий ялагу ихтилат бия лакку мазраву правиларду даххана хьуну душиврия, учебникирттай гъалатIру чIявусса бушиврия. Му ба­къассагу, кIицI лаглай бия МахIачкъалалив буллалисса лакку мазрал учительтурансса курсру, хъунмурчIин, шагьрурдал школардал учительтуралми мурадру хьхьичIун ласласи­сса бушиву, мунийн бувну ми курсру райондалийва булларча ччива, тIий бия.