Ларгсса ххуллун кьини МахIачкъалалив «7 Континент» ресторандалуву хьунни Гъумучиял шяраваллил администрациялул бакIчи Апанни Макьаевлул оьрмулун 60 шин там шаврил юбилейрал мажлис.

Зулайхат Тахакьаева
Цала дус-ихтивар барча ан бувкIун бия Лакрал райондалул бакI дургьуми, идарарттал каялувчитал, му Лакрал хъуншагьрулул бакIчишиву дуллалисса шиннардил дянив Гъумук личIи-личIисса къуллугъирттай зий бивкIсса чиваркI ва ванал гьалмахтал.
Мажлисрал тямадашиву дуллай бия Апанни ХIусайновичлул хьхьичIунсса дус Ражав МахIам­мадов ва гъанчу Аслан Къажлаев. Райондалул бакIчи Юсуп МахIаммадовлул кIицI лавгуна Апанни Макьаев ушиву так ца Гъумучиял шяраву ва Лакрал райондалий хъанахъимунил бакъассагу, Ккуллал ва ЦIуссалакрал районнай хъанахъимунилгу бунияла буру­ккинттарайсса хIакьсса патриот. Бувсуна ЦIуссалакрал райондалул ялун оьсса кьини дирсса чIумал, гайннал агьалинал чIарав бацIан нанисса ополчентурал кьюкьран хъунмасса кумаг бувшиву.
Дагъусттаннал халкьуннал хозяйствалул институтрал ректор ХIамид Бучаевлул бувсуна Апанни Макьаев цачIава дуклай ивкIшиву ва му цана дакIний ливчIшиву зунтталчунан хасъсса язи-язими хасиятирттайну. КIицI лавгуна цана хьунаавкьусса лаккучунахь чара бакъа цIуххайшиву цала ученикная, му чIявучин кIулну лякъайшиву ва гьарцаннал ганая ххуйсса бакъа къабусайшиву, Апанни Макьаев ушиву яла пахрулун лайкьсса студентътуравасса ца.
— На вин личIину цичIав ла­хьхьингу къабав, ина Занналва гьунар бусса ляхъан увну ура, — увкуна.
1990-ку шиннардий ДР-лул Халкьуннал Мажлисрал хъунаманал цалчинма хъиривчуну зий ивкIсса Абакар Аьлиевлул бувсуна чарий чару къаливчIсса буттал шяраву ЧIаяхь цала къатта бувсса чIумал Лакрал райондалий ца къатта бухьурчагу ххи шаврия бунияла ххаригу хьуну, дакIнийхтуну цува барча ан увкIсса инсан увагу хьушиву ца Апанни Макьаев.
— «Ина буси вила дус цумарив, на бусанна ина ци инсан уссарав» тIисса оьруснал учала мяйжан­сса бушиву тасттикь буллай бур хIакьинусса мажлисралгу. Цанчирча лакраву бур учинсса арамтал бувкIун бур хIакьину вил кьини хъун дан, — увкуна ЦIуссалакрал райондалул прокурор Юсуп Сулаймановлул. Бувсуна ЦIуссалакрал райондалий зий уния шихунай цува кIийла увкIшиву Лаккуйн Апанни Макьаевлухлу чIу булун, му лайкьсса уну тIий.
Апанни Макьаев дусшиву дангу, дуруччингу кIулсса дугърисса ва чумартсса инсан ушиву кIицI лаглай, ганащалсса дусшиврия цивппа пахрулий бушиву буслай бия Амучи Амуттинов, хьхьичIва МахIачкъала шагьрулул Ленинский райондалул бакIчину зий ивкIсса Камалуттин Оьмаров, Сапар Аьбдуллаев, личIи личIисса шиннардий Лак­рал РОВД-лул каялувчиталну зий бивкIсса Ризван ПаттахIов ва АьбдурахIман Оьмаров, Да­гъусттаннал паччахIлугърал медакадемиялул проректор Сулайман Маммаев, Лакрал ва Ккуллал районнал прокурор Светозар Оьмаров, Гъумучиял лицейрал директор МахIаммад Хъунбуттаев, ШавкIуллал СПК-лул хъунама Шяъван Рамазанов, шаэр Руслан Башаев ва чIявусса цаймигу.
«Илчилул» редакциягу цачIун хъанай буру Апанни Макьаев барча уллалисса мукъурттицIун. ЧIа тIий буру цIуллушиву, кулпатраву ххаришивуртту, давриву тIайлабацIу. Ина кIулцириннаву вил хIурмат муниярвагу лавай хьуннав.
ЧIал къавхьуну Апанни Макьаевлущал буванну цува бакIчину зий айивхьуния шихуннай Гъумучиял шяраву дан бювхъусса ва гихуннай дан дакIнийсса давурттаясса ихтилатгу.