Немецнал чапхунчитурая Ватан дуручлай, Хъунмасса Буттал кIанттул цIанийсса дяъвилий къучагъшиврий жанну дуллуссар чIявусса дагъусттанлувтурал. Миннавух чансса бакъар лакрал миллатрал арсругу.
Гьашину бувксса «Илчи» кказитрал цаппарасса номердай жу бивщуссия къалмукьнал журналист Андрей Цобдаевлул хъиривлаявурттайну кIул хьусса, Хъунмасса Буттал кIанттул цIанийсса дяъвилий ккаккан дурсса къучагъшиврухлу личIи-личIисса аьрали наградарттан лайкь хьуну бивкIсса, амма ми хъазамраву лачIун кьисмат къавхьусса лакрал вирттаврая. Вана уттигу ца мукунсса виричунал наградной лист ларсун увкIунни «Илчи» кказитрайн къалмукьнал журналист.
Ва ур Шахьуйннал шяравасса Ибрагьин ГъазимухIаммадов. Увну ур Ибрагьин1906 шинал. Дяъвилийн увцуну ур Лакрал райондалул военкоматрал. Талай ивкIун ур 5-мур Орловский битултрал дивизиялул 190-мур битултрал лакрал 1-мур пулеметный роталуву. Дяъвилул цIараву ккаккан дурсса къучагъшиврухлу Ибрагьин ГъазимахIаммадов лайкь хьуну ур 3-мур даражалул Славалул ордендалун ва 1-мур даражалул Буттал кIанттул цIанийсса дяъвилул ордендалун, аьпалул хьуну махъ.
Укун чивчуну бур ванал наградной листрай: 1944 шинал январь зуруй 4-7 гьантлий хьусса талатавурттаву, пулеметрава цIу дирхьуну, Ибрагьиннул байщун бувну бур гьужум бувну нанисса чIявусса немец. Ванал кьатI бувну бур Гитлердул 20-ксса саллатI. Ибрагьиннуйн шамийла куклусса щавурду дирну дур, амма му ялагу талай ивкIун ур вайми аьралитуравунгу гьавас бутлай. Му талатавриву ккаккан дурсса къучагъшиврухлу ва лайкь хьуну ур 3-мур даражалул Славалул ордендалун. Мунияр махъгу, мукуна къучагъну талай ивкIун тIий Ибрагьин лайкь хьуну ур Буттал кIанттул цIанийсса дяъвилул 1-мур даражалул ордендалун, аьпалул хьуну махъ. Укун чивчуну бур Ибрагьиннул наградной листрай: 1944 шинал февраль зурул 21-нний Днепр нех лахълахъисса чIумал сержант Ибрагьин душманнал минометирттал цIаравух цалчин нехгу лархъун, цалва пулеметрава душманталгу кьатI буллай, ханнакьирттачIан авчуну ур. ХаннакьрачIан иян ца-кIира метра лирчIсса чIумал душманнал ккуллалул бяличIан бувну бур ванал оьрму. Аьпалул хьуну махъ ванан Буттал кIанттул цIанийсса дяъвилул 1-мур даражалул орден дулун ккаккан бувну бур.
Тавакъю буллай буру ва виричунал арсру-душру, гъан-маччасса бухьурча, зула гъанчуная гьарта-гьарзану бусан оьвчияра ва номерданий: 89285790564.
