Ларгсса нюжмардий МахIачкъалаллал шагьрулул мажлисрал депутат Аьбдулмуъмин Ибрагьимовлул халкь кьамул буллай, миннал масъаларттал хъирив лаллалисса, ми бюхъайссаксса щаллу бан бакIрайн ласласисса кьини хьунни.

АцIра шинал мутталий цува заллусса аьрщарал касакран ча­гъарду батIин къабюхълай ивкIсса Красноармейскалиясса Якьуб Эржеевлул масъала мугьлат бакъа щаллу бан бакIрайн лавсунни депутатнал. Ва ур 81 шинал оьрмулувусса, цIуллу-сагъшиврул чулухагу инжитсса угьарачу. АцIра шинал мутталий Якьуб икъавсса идара, кабинет бакъар. Уттигъанну шагьрулул мажлисрайн тавакъюращал увксса Эржеевлул аьрза къулагъасралун лавсун бур шагьрулул бакIчи МахIаммад Сулаймановлулгу ва амру бувну бур, инсан авара къауллай, чагъардал масъала щаллу бан.
Ва кьини мукунма депутатначIа ххалбивгьунни Гьарун Саэдовлул кIичIираву ялапар хъанахъисса халкьуннал ва къатри буллай айивхьусса Мурад Аьлиевлул дянивсса бяст-ччалгу. Ва иширал хъирив лаллалийни Аьбдулмуъмин Ибрагьимовлул кIицI лавгунни шагьрулул бакIчинал къатри дуллалими масъалартту цалла къулагъасралун лавсун бушиву. Бувсунни бакIчинал кьянкьану баян бувшиву лагьсса къатри дусса кIанай чIярузивурду дусса къатри дуллалисса давуртту дацIан дуван, ми дуллансса ихтияр къадуллантIишиву. Депутатнал махъ буллунни, лагьсса къатри дусса кIичIираву шанна ва ххишаласса зивурду дусса чIяву квартирарду бусса къатри дуварча Архстройнадзорданул зузалтрал, цалла техникалущал бувкIун, ми лекьан дуллантIишиву.
Мукунма шиккун бувкIун бия Ахъушинскийл кIичIираву №30 ва №30 «а» къатрал дяниву ххуллуцI къатри дуллалисса залуннайн къарши бувксса халкь. Ваниннин хьхьичI вайва халкь бувкIун бивкIссар шагьрулул администрациялийн гьанурду бувксса котлован ма­хъуннай аьрщарал дуцIин дувара тIисса аьрзлущал. Ва аьрххи тIурча вайннал чулухасса бия шагьрулул администрациялийн барчаллагьращал бувкIсса, умудрайгу бия вания гихунмайгу, цаннал ца чIарав бавцIуну, республикалул хъуншагьру цIулаган буллан.
Ва иширал хIакъираву депутатналгу тасттикь бунни, гъили дагьувкун, гиккун лухIи аьрщи дирчуну, уртту-тIутIив, мурхьру бувгьуну, хъунбакъасса, бигьалаган, щябикIансса парк бувантIишиву.
Ахирданийгу Аьбдулмуъмин Ибрагьимовлул бувсунни цув умудрай ушиву ва кьини мюнпатсса, цалва-цалва масъаларттащал бувкIун бивкIсса халкь рязийсса хьушиврийн.