Терапиялул субординатура ккалай, Дагъусттаннал паччахIлугърал медициналул институтрал 6-мур курсирай жул группа багьуна госпитальный терапиялул кафедралул доцент Дибиров Дибир АьбдуллаевичлучIан. Чурххал лахъсса, къалип бавкьусса, даврил опыт бусса хIакиннал иминну хьунабавкьуна Аьрасатнал личIи-личIийсса кIанттурдаясса шестикурсниктал.
Хъинну ххуйну дакIний бур цалчинсса хьунабакьаврийва га гьарта-гьарзану цIухлай ивкIсса гьарцаннахь цума часса уссарив, мархри ча най буссарив. Жул группалуву бия Дагъусттаннал цинявппагу миллатирттал вакилтал, Чачаннавасса, Ингушетиянавасса жагьилтал ва душру.
На хъинну махIаттал хьунав Дибир Аьбдуллаевич цува Буттал кIанттул цIанийсса Хъунмасса дяъви къуртал хьуну махъ Лакрал райондалийсса цала буттал шяраву Ххутив дарсру дихьлай, ттула буттауссищал архIал зий ивкIшиву кIул шайхту, мунан ттулва мархри, агьлу-авлад ттуярва хъинну кIулну лявкъукун. Махъ тIурча ттун кIул хьуна Дибир Аьбдуллаевичлул бувккушиву Гъумучиял педагогикалул училище, шяраву дарсру дихьлай ивкIун махъ му зий ивкIшиву РайОНО-рал отделданул заведующийну, заочнайну дуклай ивкIшиву Дагъусттаннал педагогикалул институтрал физикалул факультетрай. Амма, кIулшиву дулаврил аралуву зий гьан дурсса чIумух къаурувгун, учительналмур пиша сивсуну канил бувгьуну ачин мунахун цирив дахчилай диркIун дур, ссаллив ацIан уллай. Мунал дакI кIункIу тIий диркIун дур инсантурачIан, къашайшалтрачIан. Мукун, увххун ур Дибир Аьбдуллаевич Дагъусттаннал медициналул институтравун. Му къуртал бувну махъ шяраваллал азарханардай зийгу ивкIун, аспирантуралувун уххан Москавлив лавгун ур. Тийх оьтту татаврил механизмардан хас дурсса диссертация ххаллилсса даражалий дурурччуну дур цIанихсса клиницист ГусекяннучIа. Тийхва ацIу, дайдирхьусса давугу докторантуралуву гихуннай дачин дуван тIисса цала элмийсса каялувчинахгу къавичIидирхьуну, жагьилсса, зунсса гужрал ва гъирарал виувцIусса пишакар зана хьуну ур цалва аьзизсса институтравун, дагъусттаннал медициналул ва элмулул школа хIадур бавриву, ччаннай бацIан бавриву кумаг буван. Му бакъассагу, мунан ччай бивкIун бия цалва гъан-маччанал, ляхъиндалул чIарав икIан, цанна дазу-зума дакъа ххирасса, аьзизсса ватандалий ялапар хъанан.
Гьарца преподавательнал бикIай кIулшиву дулаврил цалва-цалва кьяйдарду, цалла-цалла методика. ДакIний ливчIунни Дибир Аьбдуллаевичлущалсса обходру, клинический разборду. Дибир Аьбдуллаевичлун гьарца къашайшалаву цала дус, гъанчу чIалай икIайва. Къашайшалал шанучIа Дибир Аьбдуллаевичлул хIарачат бикIайва, цIуцIавриясса аьрзирдах, угь-къаклих личIийсса ургъил цалвагу къабувну, къашайшала мукунми пикрирдая арх увну, цамур ихтилатрайн укканмур буван, къашайшалахь цалла даврия, гъан-маччаминная цIухлай, мунан цалла цIуцIаву, къюву хъамадитанмур буллай. Жун, дахьва зий байбихьлахьисса хIакинтуран, му методикалуву цимурца тIайлану, ишлану чIалай къабикIайва. Аммарив мукун хъинсса, дакIнийхтунусса, иминсса, ихтилатирттайну Дибир Аьбдуллаевичлул къашайшалтрал къювурду лагь дайва. Ва бакъарив туну хIакьсса клинистуран лайкьсса кьяйда — мукъуйну, дакIнил гъилишиврийну, аьчухсса ихтилатрайну инсантал хъин баву. Жулла республикалул цавагу мурцIу бакъахьунссар бусраврай, барчаллагьрай, хъинсса мукъуйну жул учитель дакIнийн къаутансса, мунал цIуллу-сагъсса оьрмулийн зана бувсса инсантал бакъасса.
Виваллил медициналул куртIшивуртту, кьюлтIшивуртту аьч дуллай, диагностика дувансса захIматсса къашайшалт чIалай, жу Дибир Аьбдуллаевичлухь чIявусса суаллу буллай бикIайссияв клиникалул ляличIишивурттая, миннул ва лабораториялул ва инструментал кьяйдардал хъиривлаявурттал хIасиллал цалийн къабучIаврил хIакъиравусса. Амма аькьилсса педагогнал тачIав жул суаллахьхьун жавабру къадулайва, миннул хъирив жу библиотекалувун тIайла буккайвав, аьркинсса литературалух луглан, жува цачIу дихьлахьи байвав дифференциальный диагнозрал захIматсса схемарду, къашайшалт хъин баврил кьяйдарду. КIулшиву дулаврил мукунсса методикалул, кьяйдалул жун кумаг бувайва жулла даврил пишакартал хьун, бувчIин байва луттирай чивчусса кунма къабикIайшиву цимурца клиникалул тагьардануву, аьркиншиву цачIу дихьлан гьарцагу къашайшалал цIуцIаврил ляличIийшивуртту ва тарихийсса аспектру. Мукун, жул насихIатчинал, жул наставникнал хIарачатрал хIасилну хьунни Дагъусттаннал медициналул институтрал 1992-ку шиналсса выпускрал лечебный факультетрал 21-мур группалул 12 студентнава уккаву медициналул элмурдал 3 доктор ва 1 кандидат, отделениярдал заведующийтал, ххаллилсса акушер-гинекологтал ва цаймигу хIакинтал.
Ординатура бувккуну махъ, кафедралий ассистентну зий, Дибир Аьбдуллаевичлущал жу хъиннува дус хьунав. ЧIа-чIаннин кунначIан кув шаппайгу лагайссияв. Мунал хасиятрал, инсаншиврул язими лишаннацIун ттуйн яла-яла асар биян байва мунал цалла ниттихсса хIурматрал, ттюнгъашиврул, миннал куннал куннахсса ччаврил. Цила аьзизсса арс даврия учIаннин ялугьлай дикIайва нину, увкIун махъгу куннащал кув яхши-хашрай, ихтилатрай щябивкIун. Дибир Аьбдуллаевичлул 90 шинавусса цалла ниттил бакI зехлахисса, мунин къусух кьацIливу дихьлай дукра дуллалисса куц чIалай, ттул ттула учительначIансса хIурмат хъиннува лавай хьуна.
Дибир Аьбдуллаевич ия ВУЗ-раву ва мунил кьатIув хъанахъисса гьарцагу шадлугърал ттарцIну. ХIакьсса тямада, ххаллилсса къавтIала. Мунал бищайва дагъусттаннал музыкалул чIявуми инструментру, ххаллилну учайва балай. Му ия общественникгу, хIарачат буллай икIайва райондалул ва республикалул даражалий хъанахъисса гьарцагу жяматийсса иширттавух гьуртту хьун.
Республикалий хьусса иширттава яла-яла цумур дакIний ливчIри тIисса ттул суалданухьхьун, мунал бувсуна цайнма яла асар биян бувшиву 1988 шинал Дагъусттаннайн, буттал шяравун Гъумукун, цала дустуращал СССР-данул летчик-космонавт, СССР-данул Виричу Муса Маннаров учIаврил. Дибир Аьбдуллаевич хъунмасса хIаллай буслай ия лакрал аьрщарай та шинал хьусса батIаврия, хьунабакьавурттая, тикку цалва лавхъсса махъгу дакIнийн бутлай.
Союз лирну махъ билаятрай ва республикалий хIасул хьусса жяматийсса ва политикалул тагьарданул, жагьилтал шяраваллава шагьрурдайн бизлай, ми дачIра хъанахъаврил, жагьилтуран республикалул шагьрурдайгу зунсса кIанттурду бакъашиврул ялув хъинну буруккинттарай икIайва. Республикалул хIакьсса патриотнан лайкьну, ва хьуна цалла аьзизсса буттал шяраву Ххутив хьхьичIва-хьхьичI къатри бувминнал кьюкьлувусса ца. Лакрал райондалул ца яла ххуйми кIанттурдай, райцентрдания хъиннура арх дакъа, дирхьуну дур Ххутрал шяравалу. Генералтал Халиловхъал, Исяевлул ва цаймигу цIа ларгсса пишакартурал шяравалу. Буттал шяраву къатри баврийну мунал чIявуминнан эбрат ккаккан дунни, чIалачIи бунни тава тававгу жува жулла ватандалийн зана хьун аьркиншиву, жулва мархри бяйкьин битан къабучIишиву. Му мисалданийну, ттул пикрилий, мунан ччай бунуккива аьзизсса Дагъусттаннайн цалва ххирасса арсру зана хьуну. Шиккува кIицI лаган, мигу цанма лайкьну, ххаллилсса даражалий тарбия бунни Дибир Аьбдуллаевичлул. Москав шагьругу, мунил ххуйшивурттугу, тийхсса ххуйсса давугу кьадиртун, Лаккуйн, Гъумукун, мунал арс, хIурмат бусса АьвдурахIин Дибирович зана хьуну, Лакрал райондалул азарханалий хъунама хIакинну зий ур. КутIасса чIумул мутталий ххира хьунни му Гъумучиял ва щалларагу райондалул жяматран. Райондалул медицина му учIаврищал цукссагу хьхьичIуннай хьунни, вания тиннайгу хьунссар. Цала аьзизсса буттал ххуллу язи бувгьуну, цалва оьрму инсантурал оьрмурду, цIуллу-сагъшиву дуруччаврин хас бувну, лакрал миллатраву ва дагъусттаннал цаймигу миллатирттал инсантураву лавайсса хIурматрай ур АьвдурахIин Дибирович.
Инсан кIийла ивчIайссар: цал — мунал къюкI ришлашисса дацIайхту, кIилчингу — сагъминнан мунал цIа хъамадитайхту. Яла захIматмур бивкIугу кIилчинмурди. Амма Дибир Аьбдуллаевичлун абадлий бивкIу бакъассар. Дибир Аьбдуллаевичлул хъинсса, марцIсса цIа мунал дарс дирхьуминнал, дустурал, гъан-маччаминнал дакIурдиву мудангу уттарана дикIантIиссар.
Сулайман Маммаев,
профессор,
ДГМА-лул проректор
