Декабрь зурул 4-нний хьхьуниву 03.48. ссят хьусса чIумал Чачаннаву ярагъуннищалсса къачагътал ххявххун бур ДПС-лул пострайн. Чачаннал Виваллил иширттал министерствалул бусласимунийн бувну, бусса кIанай ливтIуну бур ДПС-лул 3 зузала. Яла къачагътал ххявххун бур Чачаннал республикалул кказитру, интернет изданияртту ва федерал СМИ-лул представительстварду дусса Печатьрал къатравун. Грозный шагьрулий баян бувну бур КТО-лул низам.
Чачаннал Республикалул бакIчи Рамзан Кьадировлул баян бунни Грозный шагьру боеквиктурал бувгьуну бур тIисса хаварду къатIайласса бушиву.
— Ва иширайну къачагътурал кьаст лархIунни цалва гуж ккаккан бан, амма миннаща цичIав бан къабювхъунни. Укун кьадарсса тIуллу дан кунмасса къачагътал Чачаннаву нукIува бат бувссар, вай бюхъайссар цайми регионная бувкIсса бикIангу, — тIий ур Рамзан Кьадиров.
Рамзан Кьадировлул бувсунни кIюрххицIунмай, ссят 7 хьусса чIумал, къачагътал бухлаган буллалисса спецоперация къуртал шавай бушиву.
— Цуя ца къачагъ шагьрулува сагъну уккан къаитантIиссар. Хъунмасса тавакъюри зунма щак багьлагьисса кунмасса, ягу къачагътуращал дахIаву дусса кунма чIалачIисса инсантурая бусан, оьвчияра ва номерданийн: 8995- 805-39-39, — тIий баян буллай ур Рамзан Кьадиров.
Грозный шагьрулул дязанниву хьусса ва спецоперациялуву бат унни 7 террорист. Спецоперациялий каялувшиву дуллай ивкIсса органнал зузалал бувсунни, вай къачагътуран шагьрулуву цаймигу хъунисса терактру дан дакIний бивкIшиву.
Къачагътал ххявххун бивкIсса Печатрал къатри ччурччуну дур. Вай къатрайн ххявххун бивкIсса цинявппагу къачагътал ххит бунни.
Ялагу Грозный шагьрулул ца школалийгу бувгьуну бур къачагътурал группа.
Боевиктал бат буллалисса спецоперациялуву оьрмулуцIа хьуну ур 4 инсан, щавурду дирну дур 21 инсаннайн, миннава 3 инсан хъинну захIматсса тагьарданий ур. Ва спецоперациялуву ливтIусса органнал зузалтрал кулпатирттан миллион арцул булун увкунни Рамзан Кьадировлул.
Андриана Аьбдуллаева
