ДакIнийхтуну барча буллай буру юбилейращал дуклаки оьрчIачIагу, гайннал нитти-буттачIагу бусравсса, хIурмат лавайсса, цилла даву ххирасса, цилва оьрмулул 45 шин оьрчIан хас дурсса МахIмудлул душ Мамедова ПатIимат.
ЧIа тIий буру ПатIиматлун вания тихунмайгу оьрмулуву тIайлабацIу, цIакьсса цIуллушиву, давриву хьхьичIуннайшиву, кулпатраву нахIу-хIалимшиву. Ина оьрмулул буччиннин битаннав Хъунасса Заннал.
Виха дуаьлийсса
гъан-маччами
————————————
Декабрь зурул 7-нний оьрмулул 50 шин бартлаглай дур ххаллилсса, цалва хIарачатрай дугу дурккуну, даву дуван кIулшивугу ккаккан бувсса зунтталчу, ГьунчIукьатIатусса Абусупияннул ва ПатIиматлул арс ХIажимирзаев Зиябуттиннун.
1981 шинал ххуйну ГьунчIукьатIрал дянивмур даражалул школагу къуртал бувну, цалва аьрали буржгу лавхъун, 1983 шинал Москавуллал автодорожный институтравун увххун ур. 1991 шинал институт къуртал бувну, ххуллурду бувайсса инженернал диплом лавсун, Дагъусттаннайн зана хьуну, 1998 шинайннин «Главдагестанводострой» трестрай, «Корводстройрай» инженерну зий ивкIун ур. 1998 шиная цIанакулнин зий ур «Дагестанавтодорданий», 2003 шин хьуннин – ведущий инженерну, муния шинай – ца агьамсса отделданул хъунаману.
ХIажимирзаев Зиябуттин, хIукуматрал даву дуваврищал, 2007 шинал ГьунчIукьатIрал ккурандалул увчIунни цала председательну. Ва харж ласайсса даву дакъар, ва дур цала буттахъал миналий дакI цIуцIинал дувайсса даву. Зиябуттиннул, цала лагма цаймигу лаган бувну, хъунмасса захIмат бивхьуссар шяраваллил жинс ххуй давриву. Зиябуттиннул кумаграйну бувссар ГьунчIукьатIув шагьраххуллу, цала чIявусса харж буккан бувну мемориал «Унчукатль» реконструировать дунни, музей бусса къатрал гьанурду цIакь бунни. ЧIярусса цаймигу давуртту дунни шяраваллин аьркинсса. Зиябуттиннул хоббигу бур зунттал бакIру ласласисса. Ва цала стимулятор дирхьусса къюкIлищал лавхъунни вай зунттал бакIурдайн: ПпабакIуйн (3-ла, 3 994 м.), Шалбуздаг ( 4 142 м.), Эльбрус ( 5 642 м.), Адалло Шухгельмеэр (4 151 м.), Тейда (Испания, 3 718 м.), Килиманджаро (Танзания, 5 895 м.), Монблан (4 810 м.). Вана укунсса ур ГьунчIукьатIрал ккурандалул бакIчи ХIажимирзаев Зиябуттин.
ХIурмат бусса Зиябуттин! Жу цинявппагу, ина ххирами, дакIнийхтуну барча уллай буру юбилейращал. Ина вила дакIнил мурадирттайн иян аннав Аллагьнал. Оьрмулул уччиннин итаннав вила Валидащал, оьрчIая неъмат ккакканнав.
ГьунчIукьатIрал ккурандалул чулуха
Амин Аьбдуллаев
———————————
Лакравугу хIурмат лавайсса, жунагу акъа чара бакъасса жул дус-ихтивар, одноклассник, лакрал бучIантIимуний, буттал шяраваллий дакI цIуцIисса, ци хъинбала бан хъинавав тIисса чув Зиябуттин!
Барча вил оьрмулуву хъанахъисса ххаллилсса 50 шинал юбилей. Ина уттинингу биялсса ка-кумагру, вищава шаймур бувунни лакрал инсантуран, буттал шяраваллин, дустуран. Уттиния тихунмайгу вила дакIнин ччимур буван бюхълай личIаннав ина, Занная цIуллушиву ва щалихханнинсса оьрму нясив бувну лякъиннав, оьрчIая, кулпатрая рязийсса, ххарисса дакъасса чIун къадучIаваннав, уттигу микссара шинну жагьилнува, чурххаву аргъ дунура дичлансса кьудрат-каши Заннал ххи даннав.
Вин давриву тIайлабацIу, ичIура буллугъшиву, оьрмулуву цIуллушиву ва лахъишиву, оьрчIая ххаришиву чIа тIисса
цинявппагу архIал дуклай бивкIми.
————————————
Жулва ххирасса ссу, кулпат, нину, ниттирссу, ххаллилсса инсан СалихIова Зинаида Аьбдуллагьлул душ дакIнийхтуну барча буллай буру оьрмулул 55 шинащал!
ЧIа тIий буру вин, хьхьичIра-хьхьичI, цIуллу-сагъшиву, кулпатраясса, гъанминнаясса ххаришиву, давриву тIайлабацIу. Вил дакIнийсса мурадру цинявппагу бартлаганнав, ябаннав ина Заннал винмагу, инава ххираминнангу.
Виха дуаьлийсса ссурвал, уссурвал, миннал оьрчIру, лас, куявтал, ина кIулми
