Хъинну рязийра 14-мур ноябрьданий 46-мур номерданий «Илчи» кказитрай рирщусса «Лакку мазрайн бивсса цIарал лама» макьалалул залуннащал, муданагу цIакьну лакку мазрал къаралданий авцIусса, АьФ-лулгу, Дагъусттанналгу лайкь хьу­сса муаьллим, Хъусрал ЧIаратусса ХIусманов МахIаммадлущал, мунал макьалалувусса гьарицагу мукъущал, хIарпиращал, пикрилущал.

Вил жангу, бакIгу цIуллу бивуй, МахIаммад Макьсудлул арс! Дагъусттаннал мазурдиву яла нигьачIавриву бушиву лакку маз – му пIякь бивкIун чIалачIисса тIайласса затри. Лакку мазрансса нигьачIаву гуж дуллай чIярусса шартIру дур, миннуватугу ца – къатта-къушлий, ичIува ниттил мазрай ихтилат къабуллалаву. Сайки 84% лакрал шагьрурдай миналул шавугу мазрансса ца балари.
ЛичIисса къулагъас ниттил мазрах дакъар жулва учкъуларттай, мюрщи оьрчIансса идарарттайгу.
ХIисавравун ласияра, буругияра яларай кIицI дуллалисса ккалданух.
«Илчи» — 3135, миннувагу:
Лакрал райондалий – 750
Ккуллал райондалий – 600
ЦIуссалакрал райондалий – 200.

«ЧIавалачин» — 953, миннувагу:
Лакрал район — 67
Ккуллал район – 2
ЦIуссалакрал – 215.

«ЦIубарз» – 570, миннувагу:
Лакрал район – 200
Ккуллал район – 35
ЦIуссалакрал район – 40.
Сайки шаннагу райондалий ялапар хъанай ур 34 000 инсан.
«Аьрщи ва агьлу» передачалийн, Лакрал радиолийн бувкIминнан, ми передачар­ттал редактортуран хьхьичIва-хьхьичI, кIулну бикIан аьркинни микку марцIсса ниттил мазрай гъалгъа тIун аьркиншиву (муниятур передачартту тIиртIуссагу). Хаснува къабучIир магьирлугърал, маданиятрал, адабиятрал агьулданун, аьлимтуран, муаьл­лимтуран, къуллугъчитуран ми передачарттай гьуртту хъанай, чил мазурдивасса махъру гьарзану ишла буллалаву.
Ниттил мазраха – лакку мазраха дувара аякьа!
Му жуйва бивхьусса хъунмасса буржри, му аякьа яла бюхттулмур, щищакIуй кьимат бищун къабюхъаймур ххазинар жува кьабитлатисса ялун нани­сса никиран!
Буруччира Лакку маз, Ни­ттил маз, ххаллилсса Лакрал агьалий!

Мудангу Лакку мазрайн икрамрайсса
Шалласу Шалласуев