ХIажиева (МахIаммадова) Муъминат бувну бур Ккуллал райондалийсса ЦIущуллал шяраву хъудугьул Шагьимарданнул ва Марияннул кулпатраву. Дуклай бивкIун бур ЦIущуллал байбихьулул школалий, 2-мур ЦIувкIуллал арулла шинал школалий. 1957-сса шинал Буйнакскаллал зунттал душварал интернат къуртал бувну бур.
ЧIивинийсса цилва хиял бартбигьинсса мурадрай, 1957 шинал Муъминат дуклан бувххун бур Щурагьиял медициналул училищалувун акушертал шайсса отделениялийн. ЗахIматсса чIун дунугу, дуклай бивкIун бур гъира буну, куртIсса кIулшиву ласунсса кьасттирай.

Училище къуртал бувну махъ ва тIайла бувккун бур зун Ккуллал райондалийн. Цилва лавсъсса пишалий зун байбивхьуну бур 2-мур ЦIувкIуллал фельдшерско-акушерский пунктрай акушеркану. Цуксса захIмат шайхьунссия чIавасса Муъминатлун, аьркин­сса шартIру да­къасса къатраву (тани шаппая ни­ттихъал оьрчIру байсса), оьрчI буллалисса хъаннил оьрчIру лаласлан. Шикку зузисса 2 шинал мутталий ванил хIурмат лавайсса бивкIун бур шяраваллил агьалинаву. Хьхьу-кьини къакуну, ва лагайсса бивкIун бур къашайшалтрачIан, цищава шайсса кумаг бувну, гай рахIат бан. Зий 2 шин шайхту, Муъминат тIайла бувккун бур цила буттал шяравун зун. ЦIущарнив зузиссаксса хIаллай цавагу иш къавхьуну бур оьрчI лякьлуву бу­­сса хъамитайпа захIматшиврухун багьсса, цанчирча, мукунсса хъанних (хаснува жагьилсса) ванил чулуха хъуннасса дакI цIуцIаву диркIун тIий.
Щар хьуну бур Муъминат 1962-сса шинал цала шяравасса учитель Ися МахIаммадовлун, цувгу зий ивкIсса Рутуллал райондалий, Вихьлив дарсру дихьлай, Ккуллал райондалул школардал инспекторну, директорну, учительну.
Щар хьуну махъ Муъминат зун бивкIун бур акушеркану лас учительну зузисса Вихьуллал шяраву. Шикку зузисса 4-гу шинайгу, царагу аьй-бювкьу къадансса куццуй, цилла даву марцIну би­ттур дуллай бивкIун бур. Вихьуллал жяматрачIа ванил ва Исял хIурмат хъинну лавайсса бивкIун бур. Вай ттиваттигу барчаллагь тIий бур Вихьуллал жяматрахь, цахара дурсса аякьалухлу.
Цила лас зун Ваччав увтукун, Муъминат зун гьан бувну бур райондалул больницалийн патронажная медсестрану. Ва даврий зий дурну дур 11 шин. Бигьасса иш къабикIай шяравусса мюрщи оьрчIал цIуллу-сагъшиврул ялув бацIан, цила чIумал миннайн прививкарду дуллан, къашавай хьуминначIан занан, больницалий уттуишин тIайла уклан.
Вай давуртту багьайсса даражалий, кIанийн дуртун, бу­ххаву цирив къакIулну дуллай бивкIссар ва. Ва 1979 шинал зун бивкIун бур фельдшерну по спецработе (хасъсса даврий). Вара даврий зий бур хIакьинусса кьинигу. Фельдшернал дайсса хасъсса даву бигьасса дур чин къахьунссар. Ванин багьай гьарца медработникнал личныйсса делорду дачин дан, захIматрал книжкарттай аьркинсса чичрурду дуллан, гьарца зуруй табеллу дуллан, учетру, амрурдал лу, сертификат ва категория ласунсса документиртталсса тIий буллан. Вай давурттивгу ккаккиялунну щаллу дай Муъминат Шагьимардановнал.
Ванил цила ласнащал хъунигу бувну, дуккингу бувну бур 2 оьрчI ва 3 душ. Хъунмур душ СалихIат ва арс АхIмад яхъанай ва зий бур Ростов шагьрулий. Марина Каспийскалий биологиялул учительницану зий бур. Залина МахIачкъалалив Миграциялул къуллугърай зий бур. МахIаммад нитти-буттащал Ваччав яхъанай ур.
Муъминатлул даврил стаж хъанай бур 55 шин. ЧIярусса шиннардий тIайлану ва марцIну бувсса захIматрахлу ванин дуллуну дур цикссагу ХIурматрал грамотарду Ккуллал райкомпартиялул, медработниктурал проф­союзрал ва ЦРБ-лул хъунама хIакиннал чулухасса.
Ванил цIа 1968 шинал райондалул ХIурматрал улттуйн лахъан дурссар. Мукунна дуллуну дур «ЗахIматрал ветеран» тIисса медаль, дур «Медаль Материнства».
— Гьарца инсаннал оьрмулуву ва давриву хьунадакьайссар захIматшивуртту ва ххаришивур­тту. Ттунгур ми хьунадаркьусса. КIилчинмур дунияллул дяъви наниний ва къуртал хьуну махъсса цаппара шиннардий дия цикссагу захIматшивуртту. Ххари хьунсса, ххуйсса ишругу хьунабавкьуссар, миннуя бусларчан, гъалгъа лахъи буккантIиссар, — тIий бур ва.
Муъминат бур дакI хъин­сса, инсаннал бигар биттур бан хIарачат буллалисса, иминсса хасиятрал заллу. Даврия бувкьун, бигьалагансса чIун дуркIун дунугу, цIанагу зийнма бур, давриву махъун багьан бацIлайгу бакъар.
Вания тинмайгу зун, яхъанан цIуллушиву дулуннав, лякьлул оьрчIал дард къаккакканнав. ЛивчIмур оьрмулийгу укунма цинявннан бусравнува личIаннав ина, Муъминат.
К. ХIажиева, ш. Ваччи