Ххуллурдив низамрайн буцаву мурадрай

Вай гьантрай ДР-лул ХIу­ку­матрал ва Республикалул Президентнал администрациялул бакIчинал хъунаманал хъиривчу Алексей ХIасановлул каялувшиннаралусса комиссиялул ххал бунни «М-29» федерал ххуллул ва мунил чIарахсса МахIачкъалалия Чачаннавун бияннинсса кIанттурдал марцI-чапалшиврул тагьар. Ххул­лул тагьар ххал дан бувкIсса комиссиялувух бия Ухссавнил ва Дянивмур территориал округ­райсса полпред Вячеслав Паламарчук ва Шамил Зайналов, ДР-лул БакIчинал администрациялул управлениялул виваллил политикалул иширтталсса буллалисса хъунама Мавлидин Маликов, ДР-лул строительствалул министр Муса Мусаев, ДР-лул тIабиаьтрал луртаннал министр Набиюлла Къарачаев, ДР-лул «Роспотребнадзорданул» хъунмур Элеонора Оьмариева ва мукунма цаймигу. Вайннащал ия ЦIуссалакрал райондалул бакIчи ХIажи Айдиевгу.
Ва комиссиялул даврил агьам­мур мурад бия районнал бакIчитуращал, республикалул, кIанттул ва федерал органнал каялувчитуращал «М-29» федерал ххуллийсса марцI-чапалшиврул ялув бацIаву. ЦIуссалакрал райондалийн бухлахисса шанбачIулия байбивхьуну «Герзель-мост» КПП-лийн бияннинсса ххуллуву комиссиялун хIисав хьунни марцI-чапалшивруцIун дархIусса ва закондалуцIун къабавкьуну, аьркинсса документру бакъана, ххуллурдачIа къатри дуллали­сса диялдакъашивуртту. Мунил хIакъираву кIицI лавгунни ва ххуллу чIун-чIумуй марцI буллалишиву, амма дуки-хIачIия дахлахисса мюрщи базарду тIитIаврийн бувну, марцIшиву ядан захIматну бушиву. Райондалул бакIчинал тапшур бунни хасъсса структурардайн ми циняр диялдакъашивуртту дукьан дувансса чаранну лякъин.

Най дур ссуттил лачIа бугьаврил давуртту

ЦIуссалакрал райондалул шяраваллил хозяйствалул пишакартурал ххал дунни райондалий ссуттил лачIа бугьаврил давурттив цукун най дуссарив. Цаппара СПК-рдал къурдарав бивунни райондалул хъунаманал хъиривчу Ися Чергизбиев, Шяраваллил хозяйствалул управлениялул хъунама Пайзуллагь Мирзоев ва Шяраваллил хозяйствалул управлениялул пишакар Закир Аьдуев. Вай бувкIунни «Дагестан-2007» СПК-лийн, мукунма Лениннул ва Орджоникидзел цIанийсса СПК-рдайн.
Ларгсса шинал райондалул шяраваллил хозяйствалуву зузиминнал 3 азаллий 155 гектарданий бувгьуну бур ссуттил лачIа. Шяраваллил хозяйствалул управлениялул хъунаманал бусласимунийн бувну, 2015 шинал ссуттил лачIа бугьан тIий бур 3 азаллий 150 – 3 азаллий 200 гектар аьрщарай. ЦIанасса чIумал райондалул хозяйствардал дургьуну дур 2900 гектар – ларгсса шинал вара чIумувунияр 900 гектар ххишалану.
Цаппара шяраваллил хозяйствардал предприятиярдаву ссуттил лачIа бугьан ххишаласса аьрщи ккаккан дан тIий бур. Мукун ссу­ттил лачIа гьарзану бугьан тIий бур «Гъази-МахIаммад», «Агроном» СПК-рдал ва Саадуллаевлул КПХ-лул. Орджоникидзел цIанийсса СПК-лул тIурча ларгсса шинах бурувгун ссуттил лачIал кIилий ххишаласса аьрщи дугьан тIий бур. Яла хъуннасса аьрщи дугьан дакIний бур Лениннул цIанийсса «Правда» СПК-лун ва «Дагестан» СПК-лун.

ХьхьичIавасса ссупралул буллугъшиву

ЦIуссалакрал райондалийсса ЦIуссачIурттащиял шяравусса Культуралул центрданул ва биб­лиотекалул къатраву хьунни Дагъусттаннал миллатирттал хьхьичIарасса дукрарду даврин хас дурсса мероприятие.
Ва ххаллилсса даву дунни Дагъусттан Республика хьхьичIуннай даву мурадрай кьамул дурсса «Человеческий капитал» приоритет проектравун дагьлагьисса «Культурный Дагестан» тIисса подпроектрал лагрулуву. Ва мероприятиялул агьаммур мурад бур Дагъус­ттаннал халкьуннал аьдатирттая бусаву ва хьхьичIара жулва халкьуннал дуллай бивкIсса дукрарду дан лахьхьин баву. Ва кьини шикку ххал бан бюхълай бия аслийсса лакку дукрардал тIин-тIааьн. Цалла-цалла дурсса дукрардащал бувкIун, авадансса ссупра тIивтIунни Культуралул центрданул, школардал ва детсадрал зузалтрал, мукунма ЦIуссачIурттащиял шяраваллил агьулданул.
Шикку мяйжаннугу аьч хъанай дия ирсирай нанисса Да­­гъусттаннал миллатирттал аьдат­ру. Ва авадансса ссупралух хъиннува мяйжан хъанай бия цукун бузсса, цуксса авадансса диркIссарив жула ниттихъал нукIура дуллай бивкIсса дукрарду.
Дарбант шагьрулул караматшивурттая

Дарбант шагьрулун 2000 шин шаврил юбилейрацIун бавхIуну, ЦIуссалакрал райондалул школарттай хьунни «Каким я вижу будущее самого древнего города России» тIисса сочиненияртту чичаврил конкурс.
Цинявппагу ЦIуссалакрал райондалул школардай ва конкурс хъинну ялув бавцIуну, жаваблувну тIайла бувккунни. Цаппара школардай Дарбант шагьрулул тарихран хас дурсса сочиненияртту чирчунни дук­лаки оьрчIал нитти-бутталгу. ОьрчIал сочинениярттаву кIицI ларгун дия Дарбант шагьрулул ляличIисса архитектура, бувсун бия тарихрал ва культуралул гьайкаллая, 1989 шинал гьану бивзсса караматсса музей-заповедникрая.
Дарбант шагьрулул бучIан­тIимур аьч буллай, дуклаки оьр­чIал ххал бувну бия тарихраву, литературалуву яхьумур. Сайки цинявппагу школардал дуклаки оьрчIру лавгун бия экскурсиялий Дарбант шагьрулийн, бивну бия бусалдаравун багьсса «Нарын-Къалалийн».
ОьрчIру пахрулий бур Ккав­кказуллал ттиркьюкьи – Дарбант шагьру цикссагу миллион инсантурал итталу бушиврия. Яла-яла сочинениярдавусса пикрирдава аьч хъанай бур Дарбантуллал бучIантIимур оьрчIан чанну ва яргну чIалай бушиву, ва шагьругу щаллагу дунияллул туристал кIункIу буллалисса тIабиаьтрал ца яла караматмур мурцIу хьунтIишиву.

Миллатирттал аьдатру дуручлай

ЦIуссалакрал райондалий Гьамиящиял ва ТIюхчардал шяраваллаву­сса культуралул идарарттаву тIиртIунни Аьра­сатнал халкьуннал аслийсса культура машгьур даву мурад­райсса магьирлугърал кюртти. Шиккува кIицI лаган, ва райондалий сайки циняв щархъавугу тIивтIуссар укунмасса магьирлугърал кюртти. Гьамиящиял шяраву магьирлугърал центрдануву миллатрал культуралул кюру тIитIлатIисса шадлугърал мажлисрайн бувкIунни шяраваллил жямат ва дуклаки оьрчIру. Аслийсса культуралул кюру тIитIаврия ляличIинува рязину бия школалул учительтал, Дагъусттаннал халкьуннал культуралул ва аьдатирттал дарсру дишавансса сантирайсса кIану хьунни тIий.
И. Саидова
А. Аьбдуллаева