Ларгсса нюжмардий МахIачкъалалив ДР-лул Культуралул министерствалуву хьунни «Душа Дагестана» Республикалул премия дуллалисса ва Республикалул клубрал журалул язимур муниципал учреждениярттал II смотрдануву ххув хьуминнан бахшишру дуллалисса батIаву.
Бадрижамал Аьлиева
Мунивух гьуртту хьун республикалул шагьрурдая ва районная бувкIун бия къачансса инсантал. Шадлугърайсса батIаву дачин дурну бия ДР-лул культуралул министр Зарема Буттаева ва мунил хъиривчу, ДР-лул Культуралул министерствалучIасса Республикалул Халкьуннал творчествалул къатлул директор Марита МухIадова.
Ва батIаву тIитIлай, премиялун лайкь хьуми барчагу бувну, Зарема Буттаевал увкунни:
— Аслийсса культура, уттизаманнул художествалул творчество ядавриву вай проектирдал агьамсса кIану бугьлагьиссар. Вайннул хъунмур мурадгу — шяраваллавусса культуралул идарарттал сий лахъ давур, мукунна культуралул зузалал даврил кьадру-кьимат лавай бавур. Хъуннасса агьамшиву дуссар культуралул ва бигьалагаврил учрежденияртту, миннувух ДР-лул БакIчи Рамазан АьбдуллатIиповлул хIукмулийн бувну тIитIлатIисса Аьрасатнал халкьуннал аслийсса культуралул центрдугу, хьхьичIунну зузаврил. Миннува баллай бикIан аьркинссар музыка, миннуву дуллан аьркинссар фестиваллу, байранну, творчествалул хьунабакьавуртту, — куну.
Гихунмай Зарема Ажуевнал бувсунни, культуралул муниципал учреждениярттан кумаг баву мурадрай, республикалий щаллу дуллалисса «Творческий десант» проектрая, цийгу каялувшиву дуллалисса Республикалул Халкьуннал творчествалул къатлул. Бувсунни ва проектрал агьаммур мурадгу бушиву мунивух шайссаксса чIявусса инсантал хIала-гьуртту баву. Мукунма бувсунни махъппурттуву республикалий хьхьичIунну щаллу дуллалисса «Культура — детям села» проектраягу. Мунил лагрулуву республикалул цимирагу райондалиясса 8 азаруннийн бивсса оьрчIру бивссар МахIачкъалалив паччахIлугърал музейрттавун, театрдавун, филармониялувун. Ва проектрая буслай, Зарема Ажуевнал кIицI лавгунни оьрчIру музейрава, театрданува лап баххана хьуну буккайшиву, дунияллухсса бургаву миннал цамур куццуйсса дикIайшиву. «На мукунсса оьрчIру гъайкъаувкусса авлахъраха лащан бавияв. Миннал яру тIивтIуну бур цIусса кIулшивурттах — миннаву цукунсса кIулшивуртту жура дирхьурив, мукунсса инсантал минная буккангу най бур. Вай проектругу, Культуралул шинал даврийну гьашиву къадурну, гихуннайгу дачин дувантIиссар», — увкунни ванил. Цилва ихтилатраву ванил кIицI ларгунни Республикалул Халкьуннал творчествалул къатлул дуллалисса хъуннасса даву, мунил директор Марита Велихановнал республикалул районнащал дуллалисса багьа бищун къашайсса цIакьсса дахIавуртту, давуртту. Гихуннай культуралул министрнал дуллунни «Душа Дагестана» премиялун лайкь хьуминнансса бахшишру ва дипломру. Му премиялул лауреатътал хьунни; «Народный танец» номинациялуву Лейла Жабраева — «Ботлих» къавтIаврил ансамбльданул каялувчи (Бущихъиял район); «Народное пение» номинациялуву Алмаз Исяева — «Счастливое детство» балай учаврил ансамбльданул каялувчи (ш. Дагестанские Огни); «Народная музыка» номинациялуву Сахратулла Тааев — миллатирттал инструментирттал оркестрданул каялувчи (Лаващиял район); «Народный театр» номинациялуву НурмахIаммад НурмахIаммадов — халкьуннал театрданул режиссер (Гумбетуллал район); «Традиционная народная культура» номинациялуву Наталья Шувалова — «Изюминка» ва «Родничок» ансамбльлал каялувчи (ш. Къизлар); «Народный мастер» номинациялуву — ярагъ бувайсса усттар ХIажи Кьурбанкьадиев (Дахадаевуллал район); «Лучшее юное дарование» номинациялуву — Алина Баранова (ш. МахIачкъала).
Муниципал клубрал учреждениярттал смотрдануву ххув хьуминнан бахшишру дуллунни Марита Велихановнал. Му смотргу хьуссар 4 номинациялуву: «Центры традиционной культуры народов России»; «Лучшее учреждение культуры клубного типа муниципального района»; «Лучшее учреждение культуры клубного типа сельского поселения»; «Лучшее учреждение культуры клубного типа городского округа». Ва смотрдануву «Лучшее учреждение культуры клубного типа муниципального района» номинациялуву 1-мур кIану бувгьунни Ккуллал райондалул КДЦ-нул (Культурно-досуговый центр).
Вай кIирагу проектраву хьхьичIун ливчуминнан дуллай бия арцуйнусса ва багьлул ххирасса бахшишру, дипломру.
Вара кьини, ахттая махъ, Къумукьнал театрдануву хьунни Республикалул «Душа Дагестана» премиялул лауреатътурал ва клубрал идарарттал смотрдануву ххув хьуминнал гала-концерт. Му тIитIлай, культура хьхьичIуннай дуллай, республикалул ва жулла хIукуматрал дазурдал кьатIув Дагъусттан лайкьну ккаккан буллалиминнахь барчаллагь увкунни Марита Велихановнал. Гихуннай республикалул шагьрурдая ва районная дуркIсса творчествалул коллективирдал ккаккан дунни концертрал хъуннасса программа. Ва кьини сахIналийн бувккунни Ккуллал райондалиясса РайхIанат ХIажиева ва «Вихьли душ» къавтIаврил ансамбль.
Вай кIирагу проект дуллай бур Дагъусттан Республикалул ПаччахIлугърал «Развитие культуры в Республике Дагестан на 2014-2018 годы» программа иширайну щаллу даврил лагрулуву. «Душа Дагестана» премия ва Республикалул клубрал журалул муниципал учреждениярттал смотр ДР-лул Культуралул министерствалул ва Республикалул Халкьуннал творчествалул къатлул дуллай кIилчинсса шинни. Вай давурттал щаллу бан аьркинсса агьамми масъаларттугу бур культуралул учреждениярттал зузалтрал, халкьуннал аслийсса ва уттизаманнул творчествалул журарду буручлачиминнал даврил чIарав бацIаву, миннал давурттан кьимат бищаву, культуралул зузалал ва мунал даврил сий ларай даву, клубрал учреждениярттал имидж лавай баву, миннул материалданул ва техникалул база авадан баву, агьали бигьалагансса шартIру заманалуха лархьхьуну щаллу даву.
Дагъусттан Республикалул БакIчи Рамазан АьбдуллатIиповлул бигарданийн бувну, «Душа Дагестана» премия 2015 шиная тиннай ккаллийну дикIан най дур хIукуматрал наградалун.
Шиккува бусан, «Душа Дагестана» Республикалул премия дуккан дурну дур «Душа России» ПаччахIлугърал премиялун лархьхьуну. «Душа России» премия тIурчаннив дуллай бур 2002 шиная шиннай цалва оьрмулул хъунмур бутIа культуралул аралуву зий гьан бувсса инсантуран, искусствалул ва культуралул хьхьичIунсса ишккаккултран. Ва премиялул лауреатътураву бур халкьуннал культуралуву биялсса бутIа бивхьусса, школарду, дуссукъатри, студиярду, творчествалул коллективру сакин бувсса инсантал. Миннавух ур шама дагъусттанлувгу: 2005 шинал «Душа России» премиялун лайкь хьуну ур фольклорист, ансамбльданул каялувчи Къачу МахIаммадов; музыкант, миллатрал гармун баврил усттар Батыр Апаев — 2009 шинал; халкьуннал «Карабудахкент» хорданул каялувчи Шавлух Ибадуллаев — 2012 шинал.
Ва ххуллух хьусса конкурсрал комиссиялуву бивкIссар ДР-лул культуралул министр З. Буттаева, мунил хъиривчу, Республикалул Халкьуннал творчествалул къатлул директор М. МухIадова, ДР-лул Культуралул министерствалул социал-культуралул ва информационно-аналитикалул даврил отделданул начальник С. Шахабасов, Р. ХIамзатовлул цIанийсса библиотекалул директор А. Аьлиев, профессор, «Волна» хорданул каялувчи Ю. Ханжов, ДР-лул Музыкантътурал союзрал председатель Х. Баширов, композитор А. Аскерханов, «Республиканский учебно-методический центр» ГБОУ-лул директор К. Эльдарова, искусствоведениялул доктор М. Маммаев.
Ца кьини хьусса вай кIирагу даву ларгунни миннувух гьуртту хьуми цинявппагу рязийну.
