Аьрасатнал халкьуннал ЦачIуншиврул байрандалул хьунийн жулва щалва билаятрай ноябрьданул 3-нний хьуссар «Магьирлугърал хьхьу» цIанилусса культуралул акция.
З. АьбдурахIманова
Акция цурдагу, цIаниха лархьхьуну, сакин дурну дур хьхьунил чIумал ссят 9-нния 12 хьуннин.
МахIачкъалаливгу ва чIумул манзилданий цалва тамашачитуран нузкьунтту тIиртIунни П. ХIамзатовал цIанийсса Дагъусттаннал паччахIлугърал изобразительный искусствалул музейрал, МахIачкъала шагьрулул тарихрал музейрал ва «Дагестанский аул» музейрал филиалданул «Вагидат» галереялул.
ИЗО-рал музейравун бувкIминнан ва хьхьуну ккаккан дурну дур цаппара выставкарду, миннувухра – Олег Пирбудагъовлул суратирттал выставкагу. Художниктурал давурттай тамаша буллай буна вайннаща вичIидишин бювхъуну бур Дагъусттаннал паччахIлугърал филармониялул ва Камерный оркестрданул дурцусса макьаннах ва балайрдах.
Шагьрулул тарихрал музейравун бувкIминнан тIурча музейрал директор Зарема Дадаевал СССР-данул ва Дагъусттаннал халкьуннал артистка Барият Мурадовал оьрмулия ва творчествалия бусласисса хъун дакъасса экскурсия дурну дур. Халкьуннан ххира хьусса артисткан хасну дурсса ва музейрал хьхьу хъиннура чIюлу дурну дур Халкьуннал инструментирттал оркестрданул дурцусса дагъусттаннал миллатирттал макьанналгу.
«Вагидат» галереялуву тамашачитал ххари бувну бур «Современный дагестанский видео-арт» тIисса программалул. Шикку «Первая Галереялул» директор Жамиля Дагъировал ва «Вагидат» галереялул директор Вагьидат Шамадаевал бувсун бур жагьилсса гьунар бусса автортурая, вайннал дузрайн буккан бан мурадрайсса хияллая.
Хъуншагьрулийсса музейрдаву хьусса циняр выставкардайн бивсса ДР-лул культуралул министр Зарема Буттаева кIицI лаглай бур, цуппа хъинну, ххишала бакъа рязийну ливчIшиврия жучIара хьусса «Магьирлугърал хьхьу» акциялия: «Хъинну ххари хьура вай выставкардай хаснува чIявусса жагьи-жугьулт ххал хьуну, ми классикалул макьаннах ва халкьуннал инструментирттай руцлацисса макьаннах гъирарай вичIилий ххал хьувкун. Хъинну тIааьнну бур жула ялун нанисса ник ва акциялувун кIункIу дан бювхъуну тIий. Шагьрулул шанма-шанма музейравун вайксса тамашачитал бучIанавав тIий щакирай бивкIсса на мукIру хьура жучIава магьирлугъ, культура ххирами чансса къабивкIшиврийн», — тIий бур ва.
Ванил бусаврийну, вания гихуннайгу жагьилтураву магьирлугърахсса къулагъас ххи дуван мурадрайсса укунсса журалул акциярду, батIавуртту ва выставкарду ттигу цимирагу дан дакIний бусса бур.
