ХIурмат лавайсса Ккуллал райондалул жямат!
На зухь тавакъю буллай ура, бучIан буллалияра, ккалаккияра лакрал миллатрал дакIурдива нанисса асардая, тарихрая, буруккинтрая, райондалий, республикалий, Аьрасатнаву ва дунияллий хъанахъисса иширттаяту гьарта-гьарзану бусайсса
«Илчи» кказит.
Жула кказитрал караматшиву, ххуйшиву, авуршиву ци дур учирча, шикку ччима лаккучунаща цалла дакIнин тIааьнмуния, тIааьн къабизлазимуния бусан бюхълай бур. Ххишалдаран, ниттил накIлищал цIупI бувсса авадансса лакку мазрай.
Ттул Ккуллал райондалий ва кказитрал зузалану зий бартлаглай дур 2 шин. Ва чIумул мутталий на жулла райондалия чичав сайки 200-нива лирчусса макьаларду. Хъинну зун ххирасса, оькьини дуркнал чIарав бацIан муданмагу хIадурсса, пагьмурдал чулуха Аллагьнал гьунарду буллусса инсантал бур жулла райондалий. ЦIанасса чIумал жунна аьркинну дур, ца телевизорданувух ккаккан дувайсса информация дакъа, цаймигу информацияртту. Учайхха «Информация думанащар дунияллул заллу хьун бюхъайсса», куну.
ХIакьинусса кьини Ккуллал райондалий бучIан буллай бур 600-ннийн бивсса «Илчи» кказитру. Вайннул ялун 200 ххи бувну, 800 кказит бучIан булларча, му хъинну ххуйсса даву хьунссия. Нагу хIарачат буванна райондалул ххазинану хъанахъисса инсантурая личIи-личIисса макьаларду чичлан.
Ялагу, укунсса зат кIицI буван ччива. «Илчи» кказитрал корреспондентнал пункт буссар Ккуллал райондалийсса УО ва ЗАГС-рал идарартту бусса къатраву. Ччинаща кказитрайн тIайла дуккан ччисса цалла макьала шиккун ларсун учIан бюхъайссар.
Нагу, зул хIурмат лавайсса, «Илчи» кказитрал Ккуллал райондалийсса корреспондент ХIажимурад ХIусайнов
