МАХIАММАДАЛ АРС МАХIАММАДОВ ХIАЖИЯВ
Уттигъанну ахиратравун лавгунни Хъусрал ЧIардал шяравасса, Ккуллал райондалул инсантурал дянив хъинну хIурмат лавайну оьрму бувтсса, чIярусса шиннардий Ккуллал райондалул судияну зий ивкIсса МахIаммадов ХIажияв МахIаммадал арс.
ХIажияв МахIаммадов увну ур 1938-ку шинал Ккуллал райондалий Хъусрал ЧIардал шяраву МахIаммадлул ва Уммугьанил кулпатраву. Ванал бутта га чIумал колхозрал председательну зий ивкIун ур. Яла 1944-ку шинал вайннал шяравалу, цайми шяраваллащал, дизан дурну дур ЦIуссалакрал райондалийн Чапаево шяравун. Шикку школалийн лавгун, 1955-ку шинал ХIажиявл ЦIуссалакрал шяраву къуртал бувну бур 10 класс. Гара шинал ва дуклан увххун ур Астраханнал культпросветучилищалувун. 1958-ку шинал му къуртал бувайхту зун увххун ур ЦIуссалакрал райондалул Культуралул къатлувун. Гикку зий унува, Краснодардайсса юридический институтравун экзаменну дуллуну, очнайну дуклан тихун лавгун ур. ЧIал къавхьуну ва институт Краснодардая Ленинградрайн бизан бувну бур. 1962-ку шинал ванал къуртал бувну бур га Ленинградуллал юристал итабакьайсса институт. Гания махъ зий ивкIун ур ЦIуссалакрал, Тарумовкаллал, Хасавюртуллал прокуратурардал силисттачину, хъунама силисттачину.1979-ку шинал ХIажияв увчIуну ур Ккуллал райондалул судияну ва зий ивкIун ур микку 2005-ку шинайнин. Ванан дуллуну дур «Заслуженный юрист Республики Дагестан», «ЗахIматрал ветеран» хIурматрал цIарду. Дуллуну дур Дагъусттаннал Верховный судрал чулухасса ХIурматрал грамотартту ва чIярусса бахшишру. Ккуллал райондалий судияну зузисса мутталий МахIаммадов ХIажиявл бувсса цавагу приговор, хIукму Дагъусттаннал Верховный судрал цIакь къабувсса иш хьуну бакъар. Ванайн халкьуннал дянив учайва «миски-гъаривнал судия» куну. Цалва бувайсса приговор, хIукму кIивагу чул рязийну бикIансса кьяйдалий, чирчусса законнайн хъарну бувайва. Акъая ХIажияв дакI хъунасса, хIатта Конституциялийн бувну хъунисса ихтиярду дуллусса къуллугърай зий ивкIхьурчагу.
Цалва кулпат Разиятлущал 2 арс ва 3 душ хъуни бувну, цалва-цалва ххуллурдайн бивчунни. КIия арс ва ца душ ванал цалвамур ххуллийх бавчуну бур. ХIажияв цалва кулпатраву, бутта, хъунбутта хIисаврай, эбратранну оьрму бувтсса зунтталчу ия.
ХIажияв ахиратравун лагаврил кьурчIишиву кIидачIлай буру ванал кулпатращал, арсурвавращал, душваращал, куявтуращал, махъсса цинявппагу гъан-маччанащал. Паракьат хьуния нур дизаннав, рухI АллагьначIан гъансса кIанай паракьат хьуннав. Аьпа буваннав.
Ккуллал райондалул 14-рагу шяраваллил жямат
Мукъуй цIу бусса, тIуллу уздансса хъамитайпа
Хъюйннал шяравасса ХIажихъал АхIмадил душ АхIмадова ХIурун оьрмулул 86 шинаву, къашавайгу бивкIун, аьпалул хьунни.
Миллатрал язисса душ, буттал шяраваллил, райондалул шяраваллал жяматирттан бусравсса хъамитайпа, муаьллим, тарбиячи АхIмадова ХIурун бувссар мартрал 20-нний 1927-ку шинал, Хъюйннал шяраву чIявучин кIулсса, колхозру сакин хьуния шинай хIухчуну зий ивкIсса АхIмадил къатлуву. Цила буттал шяраву 4, ЧIяйннал шяраву 7 классругу бувккуну, 1939-ку шинал дуклан бувххун бур Гъумучиял педучилищалувун. Га къуртал бувайхту, 1942-1944-ку шиннардий зий бивкIун бур Вихьуллал школалий, хъиривмур шинал – ЦIуйшиял школалий. Махъ зий бивкIссар Хъюйннал шяравусса байбихьулул школалий. Шикку ванил 50 шин дурссар дарсру дихьлай.
Ва бия шяраваллил коммунистурал парторг, райондалул ва шяраваллил депутат. Гьуртту къавхьусса цавагу сессия къабивтссар ХIуруннул. Ва гьарца партиялул конференциярттай, собраниярттай гьуртту шайссия. Фермалийсса дояркахъул бикIайва буслай, ЦIуйшату дояркахъул къабувкIсса чIумал, цилва оьллу ттивзуну, накI тапшур дувайва фермалул бакIчинайн тIий, Вихьлив нис дувай заводрайн лагайва накI ларсун тIий. ХIатта му ганийн багьайсса бурж къабивкIун бунугу. ХIуруннул 20 шинай директоршиву дурссар Хъюйннал шяраваллил школалийгу.
Ххаллилсса, ас-ламусрал бувччусса зунттал душнил ХIуруннул бувтссар яргсса, шавкьирайсса, амма бигьа бакъасса оьрму. Ва бия кулпатраву хъунмамур душ, нитти-буттал кумагчи, уссу-ссурвавран насихIатчи, гъанцириннан кумагчи. ЯхIлувсса зунттал душнил, гьарца затгу бувхIуну, цила арс ва душ дуккин бувну, учительтал бувну, цала ххуллийн буккан бувуна. Мунил арс ХIажиев Сергей РахIимович кIукъакIулсса инсан я райондалий ягу шагьрулий акъахьунссар. ХIакьинусса кьини му директорну зий ур Каспийск шагьрулий 9-мур школалий. Душгу оьрус мазрал учительницар.
Оьрмулул бугьара хъанан бивкIукун ХIурун бувцуна шагьрулийн душничIан.
ХIуруннул хIарачат хIисавравун лавсун, ванин дуллуна ххуйсса наградартту. Ва бия захIматрал ветеран ва цаймигу лишанну ва цIарду лайкь хьусса хъамитайпа. ХIуруннул цIа тачIав хъамакъадитантIиссар, ванил инсаншиву оьрмулул кьибламарттуну жулла дакIурдиву яхьунтIиссар.
ХIуруннул ссу
АхIмадова ПатIима
ш. Хъюйми
